អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាអ្នកស្រីរ៉ូណាស្មីត បានជួបពិភាក្សាជាមួយរដ្ឋមន្ត្រីក្រសួងយុត្តិធម៌លោកអង្គវង្សវឌ្ឍានា កាលពីម្សិលម៉ិញដើម្បីពិភាក្សាអំពីការលើកកម្ពស់ដល់ការកែលំអរប្រព័ន្ធយុត្តិធម៌នៅកម្ពុជា។
អ្នកស្រី រ៉ូណាស្មីតបានប្រាប់ក្រុមអ្នកសារព័ត៌មានថា ភាគីទាំងពីរបានជជែកអំពីការស្វែងរកលទ្ធភាពក្នុងការកែលំអប្រព័ន្ធយុត្តិធម៌នៅកម្ពុជា។
នៅក្នុងជំនួបនោះអ្នកស្រីបានបង្ហាញពីក្តីបារម្ភនៃវិសោធនកម្មច្បាប់រដ្ឋធម្មនុញ្ញដែលធ្វើឡើងកាលពីពេលថ្មីៗនេះ។
អ្នកស្រីបន្តថា ការកែប្រែរដ្ឋធម្មនុញ្ញឬក៏ច្បាប់ផ្សេងៗទៀតនោះ គួរតែមានការវិភាគយ៉ាងប្រយុងប្រយ័ត្ននិងមានការពិគ្រោះយោបល់ពីគ្រប់ភាគីពាក់ព័ន្ធ។
ជាងនេះទៅទៀតអ្នកស្រីរ៉ូណាស្មីត បានសម្តែងក្តីបារម្ភជាខ្លាំងអំពីវិបត្តិស្ថានការណ៍នយោបាយនៅកម្ពុជាខណៈការបោះឆ្នោតជាតិដ៏ធំមួយ កំពុងខិតជិតចូលមកដល់។
ចំណែកអ្នកនាំពាក្យក្រសួងយុត្តិធម៌លោកជិនម៉ាលីន បានប្រាប់ក្រុមអ្នកសារព័ត៌មានក្រោយកិច្ច ប្រជុំបិទទ្វារអស់ជាច្រើនម៉ោងនៅក្រសួងយុត្តិធម៌ថាជំនួបលើកនេះមានភាពវិជ្ជមានច្រើន និងបានពិនិត្យមើលឡើងវិញនៅអ្វីដែលបានព្រមព្រៀងកាលពីកិចុ្ចប្រជុំលើកទី៤នៅថ្ងៃទី១០ខែសីហាឆ្នាំ២០១៧ ក្នុងនោះមានដូចជាការរៀបចំច្បាប់ស្ដីពីការពពោះជំនួសជំនួយផ្នែកច្បាប់ ការអនុវត្តយុត្តិធម៌និងបញ្ហាច្បាប់។
ដំណើរទស្សនកិច្ចរយៈពេល១០ថ្ងៃដែលបានចាប់ផ្តើមពីថ្ងៃទី៥ ដល់ថ្ងៃទី ១៤ខែមីនាឆ្នាំ២០១៨របស់អ្នកស្រី រ៉ូណាស្មីតលើកនេះ អ្នកស្រីក៏បានស្នើទៅក្រសួងមហាផ្ទៃដើម្បីសុំចូលជួបនឹងលោក កឹម សុខា ប្រធានគណបក្សសង្គ្រោះជាតិនៅពន្ធនាគារត្រពាំងផ្លុងផងដែរ៕