ក្រសួងការងារ និងបណ្តុះបណ្តាលវិជ្ជាជីវៈបានជូនដំណឹងឱ្យកម្មករនិយោជិកទាំងអស់ឈប់សម្រាកចំនួន៤ថ្ងៃក្នុងឱកាស បុណ្យចូលឆ្នាំថ្មីប្រពៃណីជាតិខាងមុខនេះ។
លិខិតជូនដំណឹងរបស់រដ្ឋមន្ត្រីក្រសួងការងារលោក អ៊ិត សំហេង កាលពីថ្ងៃទី១៩ខែមីនាបានប្រកាសថាថៅកែឬម្ចាស់សហគ្រាស គ្រឹះស្ថានទាំងអស់ដែលស្ថិតក្នុងដែនអនុវត្តនៃច្បាប់ការងារត្រូវអនុញ្ញាតឱ្យកម្មករនិយោជិកទាំងអស់ឈប់សម្រាកដោយមានប្រាក់ឈ្នួលគឺចាប់ពីថ្ងៃទី១៤រហូតដល់ថ្ងៃទី១៧ ខែមេសា ឆ្នាំ២០១៨។
ប៉ុន្តែក្នុងករណីចាំបាច់បំផុតដែលសហគ្រាស និងគ្រឹះស្ថានទាំងឡាយដែលត្រូវការកម្មករធ្វើការក្នុងអំឡុងពេលឈប់សម្រាកនេះ និយោជកត្រូវសម្របសម្រួលជាមួយកម្មករទៅតាមការស្ម័គ្រចិត្ត ព្រមទាំងបែងចែកពេលវេលាឱ្យបានសមស្រប។
លោក អ៊ិតសំហេងបន្តថាកម្មករទាំងឡាយណាដែលធ្វើការក្នុងថ្ងៃ បុណ្យចូលឆ្នាំខ្មែរនឹងទទួលបានប្រាក់បំណាច់បន្ថែម ដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា។
ជាងនេះទៅទៀតក្រសួងការងារក៏ស្នើឱ្យម្ចាស់រោងចក្រសហគ្រាស និងគ្រឹះស្ថានទាំងអស់ គួរចាត់តាំងឱ្យមានការលេងល្បែងកំសាន្តប្រពៃណីខ្មែរដើម្បីចូលរួមអបអរសាទរពិធីបុណ្យចូលឆ្នាំខ្មែរខាងមុខនេះ៕