ព្រះករុណាព្រះបរមនាថ នរោត្តម សីហមុនី និងលោក ហ៊ុន សែន នឹងធ្វើដំណើរទស្សនកិច្ចទៅកាន់ប្រទេសវៀតណាម នៅខែធ្នូខាងមុខ។
ដំណើរទស្សនកិច្ចនេះនឹងធ្វើឡើងក្រោយពីលោកប្រាក់ សុខុន រដ្ឋមន្រ្តីក្រសួងការបរទេសកម្ពុជា បានជួបជាមួយលោក ផាម ប៊ិនម៉ិញ រដ្ឋមន្រ្តីការបរទេសវៀតណាមក្នុងដំណើរទស្សនកិច្ចរយៈពេល២ថ្ងៃទៅកាន់ទីក្រុងហាណូយពីថ្ងៃទី២៦ដល់២៨ខែវិច្ឆិកាកន្លងទៅ។
សេចក្តីប្រកាសព័ត៌មានក្រសួងការបរទេសកម្ពុជាដែលចេញផ្សាយកាលពីថ្ងៃទី២៩ខែវិច្ឆិកាឲ្យដឹងថា លោកប្រាក់ សុខុនបានជួបពិភាក្សាការងារជាមួយលោកនាយករដ្ឋមន្រ្តីវៀតណាមង្វៀន សួនហ្វុកដើម្បីត្រៀមទទួលដំណើរទស្សនកិច្ចរបស់លោក ហ៊ុន សែន និងព្រះមហាក្សត្រនាពេលពេលខាងមុខនេះ។
ទោះជាយ៉ាងណាក៏ដោយ សេចក្តីប្រកាសព័ត៌មានដដែលមិនបាន បញ្ជាក់ពេលវេលាជាក់លាក់ដែលប្រមុខដឹកនាំរបស់កម្ពុជាធ្វើដំណើរទៅកាន់ប្រទេសវៀតណាមនោះឡើយ។
កាលពីថ្ងៃទី២៧ ខែវិច្ឆិកា កម្ពុជានិងវៀតណាម ប្រកាសថា ខ្លួននឹងមិនអនុញ្ញាតមានកម្លាំងអមិត្តណាមួយប្រើប្រាស់ទឹកដីរបស់ខ្លួនដើម្បីប្រឆាំង ឬជ្រៀតជ្រែកកិច្ចការផ្ទៃក្នុងរបស់ប្រទេសដទៃនោះឡើយក្រោយពីសារព័ត៌មានThe Asia Times បានចុះផ្សាយថា កម្ពុជាអាចក្លាយជាចំណុចកណ្តាលនៃសង្គ្រាមត្រជាក់ថ្មី ដោយសារកម្ពុជាកំពុងផ្តល់លទ្ធភាពឲ្យប្រទេសចិនបោះទីតាំងមូលដ្ឋានទ័ពជើងទឹករបស់ចិនក្នុងខេត្ត កោះកុង។ហើយករណីមួយទៀតគឺការជម្លៀសពលរដ្ឋវៀតណាមដែលកំពុងរស់ក្នុងបឹងទន្លេសាបឲ្យមករស់នៅលើគោកវិញ ដែលកំពុងមានការតវ៉ាខ្លាំងពីសមាគមវៀតណាមនៅកម្ពុជានោះ៕