ក្នុងឆ្នាំ២០១៨នេះ រដ្ឋាភិបាលលោកហ៊ុន សែន បានទទួលទណ្ឌកម្មអន្តរជាតិ ជាហូរហែ ដោយសារតែស្ថានភាពរំលោភសិទ្ធិមនុស្ស និងប្រជាធិបតេយ្យ។
ទណ្ឌកម្មទាំងនេះរួមមាន៖រដ្ឋាភិបាលសហរដ្ឋអាមេរិក កាលពីថ្ងៃទី២៧ ខែកុម្ភៈ បានសម្រេចកាត់ផ្ដាច់ជំនួយជាផ្លូវការទៅរបបលោកហ៊ុន សែនដោយសារតែស្ថានភាពរំលោភសិទ្ធិមនុស្ស និងប្រជាធិបតេយ្យធ្ងន់ធ្ងរ ក្រោយរបបលោកហ៊ុន សែនធ្វើទុក្ខបុកម្នេញយ៉ាងដំណំទៅលើគណបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យនៅកម្ពុជា។
ជំនួយសំខាន់ៗ ដែលអាមេរិក សម្រេចឈប់ផ្ដល់ដល់របបលោកហ៊ុន សែនតទៅទៀត រួមមានកម្មវិធីជំនួយបរទេស ជំនួយតាមរយៈកម្មវិធីរបស់ទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ(USAID)និងកម្មវិធីជំនួយផ្នែកយោធាអាមេរិក ដែលធ្លាប់ផ្ដល់ឲ្យរបបលោកហ៊ុន សែនក្នុងការជួយដល់អគ្គនាយកដ្ឋានពន្ធដារ ជួយដល់ការកសាងសមត្ថភាពអាជ្ញាធររដ្ឋនៅតាមមូលដ្ឋាន និងជួយដល់កងយោធពលខេមរភូមិន្ទ នៅពេលកន្លងមក។
នៅខែកុម្ភៈដដែលនេះ សហព័ន្ធភ្នាក់ងារចារកិច្ចអាមេរិកាំង ដែលជាបណ្តុំភ្នាក់ងារចារកិច្ចចំនួន១៧ស្ថាប័ន ក្នុងនោះរួមមានទាំងភ្នាក់ងារសេ.អ៊ី.អា.(CIA)ផង បានដាក់លោកហ៊ុន សែនចូលក្នុងបញ្ជីនៃឈ្មោះក្រុមមេដឹកនាំ«បង្កការគំរាមកំហែងប្រចាំតំបន់»អាស៊ីអាគ្នេយ៍ ដែលអាចធ្វើឲ្យប៉ះពាល់ដល់សន្តិសុខជាតិរបស់អាមេរិក និងអត្ថប្រយោជន៍អាមេរិក នៅលើពិភពលោក។
ប្រទេសអាល្លឺម៉ង់កាលពីថ្ងៃទី២១ខែកុម្ភៈបានជូនដំណឹងទៅរបបលោកហ៊ុនសែនអំពីការព្យួរការផ្ដល់ទិដ្ឋាការចំពោះការធ្វើដំណើររបស់មន្ត្រីជាន់ខ្ពស់របបក្រុងភ្នំពេញរួមមានលោកហ៊ុនសែននិងក្រុមគ្រួសារនិងមន្ត្រីជាន់ខ្ពស់ផ្នែកយោធានិងប្រធានតុលាការកំពូលផងដែរ។
សហរដ្ឋអាមេរិក កាលពីថ្ងៃទី១២ខែមិថុនា បានដាក់មេកងអង្គរក្សលោកហ៊ុន សែនឈ្មោះហ៊ីង ប៊ុនហៀងជាបុគ្គលទីមួយនៃក្រុមមន្រ្តី គ្រាគ់ក្នុងរដ្ឋាភិបាលលោកហ៊ុន សែនទៅក្នុងបញ្ជីខ្មៅ ក្រោមច្បាប់ GLOBAL MAGNITSKYដែលត្រូវបង្កកទ្រព្យសម្បត្តិ បិទទិដ្ឋាការមិនឲ្យជាន់ដីអាមេរិក និងហាមឃាត់ក្រុមហ៊ុន អាមេរិកមិនឲ្យរកស៊ីជាមួយបុគ្គលរូបនេះថែមទៀត ដោយសារមេកងអង្គរក្សពាក់ផ្កាយបួនរូបនេះពាក់ព័ន្ធនឹងការរំលោភសិទ្ធិមនុស្ស និងប្រជាធិបតេយ្យ។
សភាអាមេរិក កាលពីថ្ងៃទី២៦ខែកក្កដា បានអនុម័តច្បាប់ស្តីពីប្រជាធិបតេយ្យកម្ពុជាឆ្នាំ២០១៨លេខ HR 5754 ដើម្បីដាក់ទណ្ឌកម្មក្បាលម៉ាស៊ីន ដឹកនាំរបបលោកហ៊ុន សែនទាំងអស់ដែលចូលដៃក្នុងការបំផ្លាញប្រជាធិបតេយ្យ និងសិទ្ធិមនុស្សធ្ងន់ធ្ងរនៅកម្ពុជា។
បុគ្គលដែលត្រូវបានបញ្ចូលក្នុងច្បាប់ដើម្បីដាក់ទណ្ឌកម្មលើរបបលោកហ៊ុន សែនទាំងនោះរួមលោកហ៊ុន សែន លោកស ខេង លោកទៀ បាញ់ លោកប្រាក់ សុខុន លោកអូន ព័ន្ធមុនីរ័ត្ន ស៊ុន ចាន់ថុល និងលោកកើត រិទ្ធ លោកឱម យ៉ិនទៀង លោកជួន សុវណ្ណ លោកប៉ុល សារឿន លោកនេត សាវឿន និងលោកសៅ សុខា លោកគន់ គីម លោកហ៊ីង ប៊ុនហៀង លោកហ៊ុន ម៉ាណែត លោកស្រីហ៊ុន ម៉ាណា និងលោកសុខ ពុទ្ធិវុធ។
នៅថ្ងៃទី២៨ខែកក្កដាកម្ពុជាបានរៀបចំការបោះឆ្នោតជាតិដ៏ចម្រូងចម្រាសដោយសារអវត្តមានរបស់គណបកសង្រ្គោះជាតិក្រោយពីតុលាការកំពូលនៃរបបលោកហ៊ុនសែនរំលាយចោលនិងចាប់ខ្លួនមេដឹកនាំគណបក្សនេះដាក់ពន្ធនាគារ។ជាលទ្ធផលគណបក្សប្រជាជនកម្ពុជាបានប្រកាសឈ្នះភ្លូកទឹកភ្លូកដីហើយទទួលបានអាសនៈ១២៥លើ១២៥ក្នុងរដ្ឋសភាដែលនាំឲ្យសហគមន៍អន្តរជាតិរិះគន់ថា ជារដ្ឋសភាឯកបក្ស។
ក្រោយមកនៅខែសីហារដ្ឋាភិបាលបានសម្រេចដោះលែងអ្នកទោសនយោបាយជាច្រើនរូបរួមមានលោកមាជសុវណ្ណារ៉ាលោកអ៊ំសំអាននិងមនុស្សជាច្រើនទៀតរួមទាំងអតីតអ្នកយកព័ត៌មានរបស់វិទ្យុអាស៊ីសេរីពីររូបគឺលោកអ៊ួនឈិននិងលោកយាងសុធារិនផងដែរ។ហើយបន្ទាប់មកក៏មានការបញ្ជូនខ្លួនលោកកឹមសុខាពីគុកត្រពាំងផ្លុងមកឃុំឃាំងក្នុងផ្ទះរហូតមកទល់ពេលនេះ។
នៅខែតុលា សហភាពអឺរ៉ុបបានជូនដំណឹងផ្លូវការទៅរបបលោកហ៊ុន សែនអំពីចំណាត់ការឈានទៅរកការលុបចោលប្រព័ន្ធអនុគ្រោះពន្ធ «ទំនិញគ្រប់មុខលើកលែងគ្រឿងសព្វាវុធ ឬ EBA» នេះ។ សហភាពអឺរ៉ុបបញ្ជាក់ថា ចំណាត់ការនេះ គឺដោយសារតែពុំមានការកែប្រែស្ថានភាពវិបត្តិប្រជាធិបតេយ្យ និងការរំលោភសិទ្ធិមនុស្សធ្ងន់ធ្ងរនៅកម្ពុជា ក្នុងរយៈកាលកន្លងទៅនេះ។ សហភាពអឺរ៉ុបទុករយៈពេល៦ខែពីរដងឱ្យរបបលោកហ៊ុន សែនស្តារប្រជាធិបតេយ្យ និងការគោរពសិទ្ធិមនុស្សឡើងវិញ ហើយបើក្នុងរយៈពេលនេះ របបក្រុងភ្នំពេញមិនអនុវត្តតាមលក្ខខណ្ឌនេះទេ នោះសហភាពអឺរ៉ុបនឹងលុបចោលប្រព័ន្ធអនុគ្រោះពន្ធនេះ។ គណៈកម្មការអឺរ៉ុបនឹងធ្វើសេចក្ដីសម្រេចចុងក្រោយនៅមុនដំណាច់ឆ្នាំ២០១៨ នេះពីការត្រូវគិតពន្ធនាំអង្ករចូលពីកម្ពុជា ក្រោយពីមានសំណើពីប្រទេសអ៊ីតាលី។
នៅអំឡុងដើមខែធ្នូនេះលោកហ៊ុនសែនបញ្ជាឲ្យមានការធ្វើវិសោធនកម្មលើច្បាប់ស្តីពីគណបក្សនយោបាយត្រង់មាត្រា៤៥ថ្មីស្ទួនដើម្បីបើកផ្លូវឲ្យមន្រ្តីគណបក្សសង្គ្រោះជាតិមានសិទ្ធិធ្វើនយោបាយឡើងវិញ៕