សាលាដំបូងរាជធានីភ្នំពេញសម្រេចលើកពេលជំនុំជម្រះក្តីរបស់លោករ៉ាត់ រត្នមុនីសកម្មជនសិទ្ធិការងារ និងជាអ្នកជួុយបកប្រែផលិតវីដេអូរឿង«ម្តាយខ្ញុំលក់ខ្ញុំ»ទៅថ្ងៃទី១៣ខែមិថុនា ខាងមុខ ដោយតម្រូវឲ្យដើមបណ្តឹងចូលមកតតាំង ទល់មុខគ្នាជាមួយលោករ៉ាត់រត្នមុនីនៅពេលកាត់ក្តី។
ដំបូងឡើយសំណុំរឿងត្រូវបានតុលាការកំណត់យកថ្ងៃទី៣០ខែឧសភា ម្សិលមិញដើម្បីជំនុំជម្រះ។ប្រធានសហព័ន្ធសហជីពកម្មករសំណង់កម្ពុជាលោករ៉ាត់ រត្នមុនីត្រូវបានតំណាងអយ្យការចោទប្រកាន់ពីបទញុះញង់ឲ្យមានការរើសអើងតាមមាត្រា៤៩៦នៃក្រមព្រហ្មទណ្ឌប្រព្រឹត្តកាលពីថ្ងៃទី១៥ខែតុលា ឆ្នាំ២០១៨។ ដើមបណ្ដឹងក្នុងសំណុំរឿងក្ដីនេះមាន៤នាក់។
លោកត្រូវសមត្ថកិច្ចឃុំខ្លួនថ្ងៃទី១៣ធ្នូឆ្នាំ២០១៨។ សមត្ថកិច្ចចោទថា លោក បានឱ្យលុយប្រភព ដើម្បីនិយាយប្រតិដ្ឋសាច់រឿងក្នុងភាពយន្តឯកសារជួញដូរផ្លូវភេទដែលលោកបានជួយផលិតឱ្យសារព័ត៌មានRT (Russia Today) របស់រុស្ស៊ី។
ប៉ុន្តែលោករ៉ាត់ រត្នមុនីតែងឆ្លើយបដិសេធមិនទទួលយកការចោទប្រកាន់នោះទេ ដោយអះអាងថា ឈ្មោះហ្វេសបុកដែលគេបង្ហោះនោះមិនមែនជារបស់លោកទេ ហើយលោកមានតួនាទីគ្រាន់តែជាអ្នកបកប្រែភាសាប៉ុណ្ណោះ។
ចំណែកនារីជាតួអង្គពិតក្នុងភាពយន្តឯកសារនោះខ្លះក៏ចេញមុខមកនិយាយថា មិនមានអ្នកណាឱ្យលុយនាងដើម្បីនិយាយការណ៍ពិតនោះដែរ។
ភរិយាលោករ៉ាត់ រត្នមុនី លោកស្រីឡុងគីមហ៊ាង តែងចេញមុខទាមទារតវ៉ានៅមុខតុលាការស្ថាប័នជាតិសំខាន់ៗ និងមុខស្ថានទូតប្រទេសរុស្ស៊ី ដើម្បីទាមទារយុត្តិធម៌សម្រាប់ប្តីរបស់អ្នកស្រីប៉ុន្តែមិនទទួលបានការឆ្លើយតបជាវិជ្ជមានណាមួយនៅឡើយទេ។
កាលពីដើមខែឧសភាក្នុងអំឡុងពេល អ្នករាយការណ៍ពិសេសរបស់អង្គការសហប្រជាជាតិអ្នកស្រីរ៉ូណា ស្មីត(Rhona Smith)មកបំពេញបេសកកម្មនៅកម្ពុជា អ្នកស្រីឡុង គីមហ៊ាងក៏បានជួបបេសកជនពិសេសរបស់អង្គការសហប្រជាជាតិរូបនេះដើម្បីស្នើសុំឱ្យស្វាមីរបស់អ្នកស្រីរួចផុតពីការឃុំឃាំង។
ជាការឆ្លើយតប អ្នកស្រីរ៉ូណា ស្មីតបានទទួលយកញត្តិរបស់លោកស្រីឡុង គីមហ៊ាងនិងនិយាយលើកទឹកចិត្តអ្នកស្រីនិងកូនប្រុស។ក្រុមមន្រ្តីសិទ្ធិមនុស្សយល់ថា ចំណាត់ការលើលោករ៉ាត់ រត្នមុនីគឺជាការរំលោភសិទ្ធិមនុស្ស និងជាការធ្វើទុក្ខបុកម្នេញលើថ្នាក់ដឹកនាំសហជីពដែលមានជំហរឯករាជ្យ៕