ប្រតិភូសហភាពអឺរ៉ុប នឹងមកបំពេញបេសកកម្មដើម្បីប្រមូលភ័ស្តុតាងបន្ថែមអំពីបញ្ហាសិទ្ធិមនុស្សនិងប្រជាធិបតេយ្យនៅកម្ពុជា។ ការមកបំពេញទស្សនកិច្ចនៅកម្ពុជានាដើមខែក្រោយនេះ បន្ទាប់ពីអឺរ៉ុបប្រកាសនីតិវិធីឈានទៅព្យួរប្រព័ន្ធអនុគ្រោះពន្ធEBAមកលើកម្ពុជា។
ទំព័រហ្វេសប៊ុករបស់អតីតមន្ត្រីជាន់ខ្ពស់គណបក្សសង្រ្គោះជាតិលោកមាជ សុវណ្ណារ៉ានៅថ្ងៃនេះ បានអះអាងថា ក្រុមប្រតិភូសហភាពអឺរ៉ុបនឹងចុះមកដល់កម្ពុជាដើម្បីស្វែងរកការណ៍ពិតពីរឿងប្រព័ន្ធអនុគ្រោះពន្ធEBA ចាប់ពីថ្ងៃទី៣ដល់ថ្ងៃទី៧ខែមិថុនានាសប្តាហ៍ក្រោយ។
លោកបានបញ្ជាក់ផងដែរថា នៅថ្ងៃនេះ លោកក៏បានបញ្ចប់ការសន្ទនាគ្នារយៈពេល១ម៉ោងជាមួយលោកឯកអគ្គរដ្ឋទូតរបស់សហភាពអឺរ៉ុបប្រចាំនៅកម្ពុជាគឺលោកGeorge Edgarទាក់ទងបញ្ហា EBA និងការដោះលែងលោកកឹម សុខា ប៉ុន្តែលោកសុំមិនអត្ថាធិប្បាយព័ត៌មានលម្អិតនៃជំនួបជាមួយលោកGeorge Edgar
នោះឡើយ។
សហភាពអឺរ៉ុប កាលពីខែកុម្ភៈបានប្រកាសអំពីដំណើរការព្យួរប្រព័ន្ធអនុគ្រោះពន្ធ EBAមកលើកម្ពុជា ក្រោយពេលអឺរ៉ុប រកឃើញថា រដ្ឋាភិបាលកម្ពុជាបានបរាជ័យក្នុងការស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យ ដោយកន្លងមកអឺរ៉ុប បានស្នើឱ្យរដ្ឋាភិបាលលោកហ៊ុន សែនដោះលែងអតីតប្រធានគណបក្សសង្រ្គោះជាតិលោកកឹម សុខាព្រមទាំងផ្តល់តំណែងឱ្យមន្ត្រីក្រុមប្រឹក្សាបក្សប្រឆាំងទាំងអស់ និងអនុញ្ញាតឲ្យបក្សប្រឆាំងមួយនេះអាចដំណើរឡើងវិញបាន។
ជាងនេះទៅទៀត សហភាពអឺរ៉ុបក៏បានស្នើឱ្យរដ្ឋាភិបាលផ្តល់សិទ្ធិសេរីភាពដល់ សមាគមសហជីព អង្គការក្រៅរដ្ឋាភិបាល ព្រមទាំងអ្នកសារព័ត៌មានឯករាជ្យ ក្នុងការបំពេញការងារដោយគ្មានការភ័យខ្លាច និងរងសម្ពាធណាមួយឡើយ។ ចំណែកសហរដ្ឋអាមេរិកបានប្រាប់មេដឹកនាំរដ្ឋាភិបាលថា កម្ពុជាអាចបញ្ចៀសហានិភ័យនៃការដកហូតប្រព័ន្ធអនុគ្រោះពន្ធ EBA បាន ដោយគ្រាន់តែស្តារលទ្ធិ ប្រជាធិបតេយ្យនិងសិទ្ធិមនុស្សនៅកម្ពុជាឡើងវិញ។ អាមេរិកក៏បានណែនាំមេដឹកនាំខ្មែរថា គប្បីរក្សាផលប្រយោជន៍ជាតិឱ្យធំជាងផលប្រយោជន៍នយោបាយឬផលប្រយោជន៍ផ្ទាល់ខ្លួន៕