សាលាដំបូងរាជធានីភ្នំពេញ កាលពីថ្ងៃទី២២ ខែមិថុនា ឆ្នាំ២០២១ បានសម្រេចបង្កកអចលនទ្រព្យ និងគណនីធនាគាររបស់អតីតប្រធានអង្គការ សុវណ្ណកុមារ បន្ទាប់ពីរកឃើញថា អតីតប្រធានអង្គការរូបនេះបានរំលោភសេពសន្ថវៈលើកុមារ និងឆបោក។
សេចក្តីប្រកាសព័ត៌មានរបស់អង្គការសុវណ្ណកុមារ ដែលសារព័ត៌មាន The Cambodia Daily ទទួលបាន ឱ្យដឹងថា សាលាដំបូងរាជធានីភ្នំពេញបានសម្រេចបង្កកអចលនទ្រព្យ និងគណនីធនាគាររបស់លោក សុធា អរុណ ដែលជាអតីតប្រធានអង្គការសុវណ្ណកុមារ បន្ទាប់ពីចុះស៊ើបអង្កេតដោយរកឃើញថា ភស្តុតាងអំឡុងពេលលោកគ្រប់គ្រងរយៈពេលជាង ១៦ឆ្នាំកន្លងមកនេះ បានធ្វើទារុណកម្ម ការរំលោភបំពានសេពសន្ថវៈ ការលួចបន្លំ អំពើពុករលួយ និងការកេងប្រវ័ញ្ចនៅមណ្ឌលកុមារកំព្រាជាដើម។
ទ្រព្យសម្បត្តិដែលតុលាការបង្កកនោះរួមមាន៖
- គណនីធនាគារអេស៊ីលីដា
- គណនីធនាគារ ជេ ត្រាស់ រ៉ូយ៉ាល់ (JTRUST Royal Bank) និង
- គណនីធនាគារ កាណាឌីយ៉ា (Canadia Bank)
ខណៈទ្រព្យសម្បត្តិផ្សេងៗ ដូចជា ដីជាច្រើនឡូត៍ និងវីឡារាប់លានដុល្លាររបស់លោកដែលមានបន្ទប់ខារ៉ាអូខេ និងអាងហែលទឹក ដែលលុយយកមកសាងសង់ជាមូលនិធិលួចពីអង្គការសុវណ្ណកុមារ។
លើសពីនេះទៀត អចលនទ្រព្យ និងគណនីធនាគាររបស់លោកស្រី ពៅ ស្រីមុំ (ភរិយារបស់លោក សុធា អរុណ) និងលោកស្រី ជាតិ ច័ន្ទ មរកត (បក្សពួករបស់លោក សុធា អរុណ និងជាអតីតគណនេយ្យករនៅអង្គការសុវណ្ណកុមារ អ៊ិលអ៊ិលស៊ី) ក៏ត្រូវបានបង្កកផងដែរ។
លើសពីនេះទៀត អចលនទ្រព្យ និងគណនីធនាគាររបស់ភរិយារបស់លោក សុធា អរុណ និងបក្សពួកដែលជាប់ចោទនឹងកេងប្រវ័ញ្ច ការរំលោភសេពសន្ថវៈលើកុមារ និងការប្រើទារុណកម្ម នោះក៏ត្រូវបានបង្កកដែរ។
លើកឡើងក្នុងសេចក្ដីប្រកាសព័ត៌មាន អ្នកស្រី ខារ៉ា ហេត (Kara Heide) ដែលជាតំណាងមួយរូបរបស់ក្រុមគ្រួសារ ចន សុន បានសាទរចំពោះសេចក្ដីសម្រេចរបស់តុលាការ។
ប៉ុន្តែអ្នកស្រីយល់ថា ចំណាត់ការរបស់តុលាការចំពោះការចោទប្រកាន់ប្រឆាំងនឹងលោក សុធា អរុណ ពាក់ព័ន្ធនឹងការរំលោភបំពានយ៉ាងព្រៃផ្សៃមកលើកុមារ និងសកម្មភាពដ៏សាហាវឃោរឃៅរបស់លោក សុធា អរុណ និងបក្សពួក ហាក់ដូចជាមានការពន្យារពេលយូរ បើទោះបីជាមានភស្តុតាងអំពីការបង្អត់អាហារ និងការចាប់ឃុំឃាំងយុវជនពីររូបនៅអង្គការសុវណ្ណកុមារ ក្នុងឆ្នាំ២០១៧ ដោយខុសច្បាប់ក៏ដោយ។
អ្នកស្រីបន្តថា ចាប់តាំងពីអ្នកស្រី ចន សុន ចាប់ផ្តើមកម្មវិធីនេះមក ភស្តុតាងបង្ហាញថា លោក សុធា អរុណ បានលួចបង្វិលថវិកាឧបត្ថម្ភដោយខុសច្បាប់ដែលជាថវិកាឧបត្ថម្ភសម្រាប់កុមារកំព្រា និងកុមារដែលត្រូវបានគេបោះបង់ចោល ហើយលោកក៏បានដំណើរការមណ្ឌលកុមារកំព្រាយ៉ាងតិចពីរកន្លែងផ្សេងទៀតនៅកម្ពុជា ដោយមួយក្នុងចំណោមនោះ គឺមណ្ឌលកុមារកំព្រានៅខេត្តព្រៃវែង ដែលរដ្ឋាភិបាលកម្ពុជាបានបើកការស៊ើបអង្កេតកាលពីមួយឆ្នាំកន្លង។
អ្នកស្រីបញ្ជាក់ថា លោក សុធា អរុណ និងបក្សពួក បានបង្ក និងបន្សល់ទុកនូវការប៉ះទង្គិចផ្លូវចិត្តដែលនៅតែដិតដាមក្នុងចិត្តអង្គការសុវណ្ណកុមាររហូតមកដល់ពេលបច្ចុប្បន្ន។
កាលពីខែកុម្ភៈ ឆ្នាំ២០២១ មេធាវីការពារក្ដីអង្គការសុវណ្ណកុមារ លោក Bradley James Gordon បានប្រាប់សារព័ត៌មាន The Cambodia Daily ថា រូបលោកបានផ្ញើលិខិតមួយទៅលោកនាយករដ្ឋមន្ត្រី ហ៊ុន សែន ដោយសុំឱ្យជួយផ្ដល់យុត្តិធម៌ និងសិទ្ធិស្របច្បាប់សម្រាប់អង្គការ និងខ្លួនលោកផ្ទាល់។
ក្រៅពីផ្ញើទៅលោក ហ៊ុន សែន នោះ លោក Bradley James Gordo ក៏បានផ្ញើទៅអង្គភាពប្រឆាំងអំពើពុករលួយ រដ្ឋមន្ត្រីក្រសួងយុត្តិធម៌ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ស្ថានទូតសហរដ្ឋអាមេរិកប្រចាំនៅកម្ពុជា ទីភ្នាក់ងារអភិវឌ្ឍន៍ USAID អង្គការ Save The Children និងអង្គការយូនីសេហ្វ ដោយរៀបរាប់អំពីកំហុសលោក សុធា អរុណ និងបក្ខពួកក្នុងការគ្រប់គ្រងអង្គការសុវណ្ណកុមារ ដែលនាំឱ្យមានការកេងប្រវ័ញ្ចផលប្រយោជន៍របស់អង្គការ និងការរំលោភបំពានសិទ្ធិកុមារ រហូតដល់ទៅមានការរំលោភបំពានសេពសន្ថវៈ។
ជាងនេះទៅទៀត លោក សុធា អរុណ ក៏បានប្រព្រឹត្តអំពើពុករលួយពាក់ព័ន្ធនឹងថវិកាម្ចាស់ជំនួយ ១,៤លានដុល្លារ។
ក្រៅពីប្រព្រឹត្តអំពើពុករលួយហើយ លោកក៏ត្រូវបានកុមារនៅក្នុងអង្គការសុវណ្ណកុមារ អះអាងថា បានរំលោភបំពានផ្លូវភេទលើកុមារ និងបណ្តោយឱ្យមានអំពើហិង្សាលើកុមារជាដើមកាលពីចុងឆ្នាំ២០១៩។
អង្គការសុវណ្ណកុមារ គឺជាអង្គការក្រៅរដ្ឋាភិបាលអន្តរជាតិមួយនៅកម្ពុជា ដែលបានបង្កើតឡើងតាំងពីឆ្នាំ២០០៣ ដោយអ្នកស្រី Elisabeth Rose Johson ប៉ុន្តែអ្នកស្រីបានទទួលមរណភាពកាលពីឆ្នាំ២០១៧។
ក្រោយពីអ្នកស្រី Elisabeth Rose Johson ទទួលមរណភាពមក លោក សុធា អរុណ ដែលជាបុគ្គលិករបស់អង្គការនេះ ត្រូវបានគេតែងតាំងជានាយកប្រតិបត្តិ។ អង្គការសុវណ្ណកុមារ មានចក្ខុវិស័យ និងភារកិច្ចតួនាទីបេសកកម្ម ដើម្បីថែរក្សា ចិញ្ចឹមកុមារទុគ៌ត និងកុមារកំព្រាជាដើម៕