លោក ហ៊ុន សែន សម្រេចដាក់ចេញនូវវិធានការពង្រឹងយុទ្ធនាការទប់ស្កាត់ការឆ្លងរាលដាលនៃជំងឺCovid-19 ទាំង ២៥រាជធានី-ខេត្តរយៈពេល ១៤ថ្ងៃ ដោយគិតចាប់ពីម៉ោង ២៣:៥៩នាទី នៅថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ឆ្នាំ២០២១ ជាកំហិត។
ការសម្រេចចេញនូវវិធានការថ្មីរបស់លោក ហ៊ុន សែន ធ្វើឡើងស្របពេលដែលកម្ពុជារកឃើញជាបន្តបន្ទាប់នូវវត្តមានវីរុស Covid-19 បំប្លែងខ្លួនថ្មីប្រភេទ DELTA ដែលធ្វើឲ្យមានការព្រួយបារម្ភយ៉ាងខ្លាំង។
លោក ហ៊ុន សែន អះអាងថា ក្នុងបរិបទដែលកម្ពុជាកំពុងប្រឈមនឹងការមកដល់រលកទី៣ ការឆ្លងរាលដាលទ្រង់ទ្រាយធំនៃជំងឺ Covid-19 បំប្លែងថ្មីប្រភេទ DELTA នេះ គណៈអភិបាលរាជធានី-ខេត្តទាំងអស់ ត្រូវដាក់ចេញនូវវិធានការរដ្ឋបាល និងវិធានការសុខាភិបាលក្នុងភូមិសាស្ត្ររបស់ខ្លួនឲ្យបានម៉ឺងម៉ាត់បំផុតក្នុងអំឡុងពេលអនុវត្តនូវយុទ្ធនាការនេះ។
លោកនាយករដ្ឋមន្ត្រីបានបញ្ជាឲ្យផ្អាកការធ្វើសកម្មភាពមុខរបរ និងអាជីវកម្មក្លឹបកម្សាន្តគ្រប់ប្រភេទដូចជា ខារ៉ាអូខេ រង្គសាល និងសួនកម្សាន្តជាដើម ជាងនេះទៀត ក៏ត្រូវដាក់បម្រាមគោចរសម្រាប់ភូមិសាស្ត្រខេត្តទាំងមូល ឬផ្នែកខ្លះចាប់ពីចន្លោះម៉ោង ២១យប់ដល់ម៉ោង ៣ភ្លឺផងដែរ ជាពិសេសនៅក្នុងរាជធានីភ្នំពេញ និងនៅតាមទីរួមខេត្ត ឬតាមទីប្រជុំជនដទៃទៀត។
ការដាក់ចេញនូវផែនការនេះ ធ្វើឡើងបន្ទាប់ពីក្រសួងសុខាភិបាលបានរកឃើញអ្នកឆ្លងវីរុស Covid-19 បំប្លែងថ្មីប្រភេទ DELTA ជាបន្តបន្ទាប់លើពលរដ្ឋខ្មែរដែលមកពីក្រៅប្រទេស។
ទាក់ទិននឹងការឆ្លងវីរុស Covid-19 នេះ ក្រសួងសុខាភិបាល កាលពីថ្ងៃទី២៧ ខែកក្កដា ឆ្នាំ២០២១ បានចេញសេចក្តីប្រកាសព័ត៌មានថា កាលពីថ្ងៃទី២២ និងថ្ងៃទី២៥ ខែកក្កដា ឆ្នាំ២០២១ ក្រសួងបានរកឃើញវីរុស Covid-19 បំប្លែងថ្មីប្រភេទ DELTA ចំនួន ៣៩ករណី ដែលកើតឡើងលើពលរដ្ឋខ្មែរដែលជាពលករមកពីប្រទេសថៃ។
ជុំវិញការឆ្លងរាលដាលនេះ លោក ហ៊ុន សែន កាលពីថ្ងៃទី២៨ ខែកក្កដា ឆ្នាំ២០២១ បានចេញសេចក្តីសម្រេចដាច់ដោយឡែកមួយទៀតផងដែរស្ដីពីការបិទខ្ទប់ខេត្តជាប់ព្រំដែនប្រទេសថៃ ចំនួន ៨ ដូចជាខេត្ត៖
- កោះកុង
- ពោធិ៍សាត់
- បាត់ដំបង
- ប៉ៃលិន
- បន្ទាយមានជ័យ
- ឧត្តរមានជ័យ
- ព្រះវិហារ
- និងខេត្តសៀមរាប។
ការបិទខ្ទប់នេះ ធ្វើឡើងចាប់ពីថ្ងៃទី២៩ ខែកក្កដា វេលាម៉ោង ២៣:៥៩នាទីយប់រហូតដល់ថ្ងៃទី១២ ខែសីហា ឆ្នាំ២០២១ ដើម្បីទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពីមេរោគ Covid-19 បំប្លែងថ្មីប្រភេទ DELTA ដោយការហាមឃាត់ រឹតត្បិតការធ្វើដំណើរឆ្លងកាត់ ឬចេញចូលក្នុងខេត្តដែលបានបិទខ្ទប់ទាំងនេះ។
ទាក់ទិននឹងការឆ្លងរាលដាលនៃវីរុស Covid-19 នេះ ក្រសួងសុខាភិបាលកម្ពុជាបានអះអាងនៅថ្ងៃទី២៩ ខែកក្កដា ឆ្នាំ២០២១ ថា ក្រសួងបានរកឃើញអ្នកឆ្លងវីរុស Covid-19 ថ្មីចំនួន ៧៦៥នាក់ និងអ្នកជាសះស្បើយថ្មីចំនួន ៦៩៤នាក់ ខណៈអ្នកស្លាប់ថ្មីមានចំនួន ១១នាក់ផងដែរ។ ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជាង ៧ម៉ឺន ៥ពាន់នាក់ហើយ និងអ្នកដែលជាសះស្បើយសរុបមានចំនួនជាង ៦ម៉ឺន ៨ពាន់នាក់ ដោយឡែកអ្នកស្លាប់សរុបបានកើនឡើងជាង ១៣០០នាក់ហើយមកទល់នឹងពេលនេះ៕