អ្នកឃ្លាំមើលសង្គម បានលើកឡើងថា នយោបាយរបស់កម្ពុជាបច្ចុប្បន្ននេះ គឺជាសញ្ញាគ្រោះថ្នាក់បំផុតសម្រាប់ពលរដ្ឋ និងទឹកដីខ្មែរ ដែលរដ្ឋាភិបាលកម្ពុជាព្យាយាមយកចិត្តវៀតណាម និងចិន ដោយបើកដៃឱ្យពួកគេមករស់នៅរកស៊ីមានបានកើតកូនកើតចៅ និងប្រើប្រាស់ភោគទ្រព្យជាតិរបស់ខ្មែរដូចសព្វថ្ងៃនេះ។
អ្នកវិភាគនយោបាយនិងសង្គម បណ្ឌិត ឡៅ ម៉ុងហៃ បានសរសេរលើគណនី Facebook របស់លោកកាលពីថ្ងៃទី១៣ ខែកញ្ញា ឆ្នាំ២០២១ ថា កម្ពុជាមិនអាចធានាអធិបតេយ្យភាពរបស់ខ្លួនបានទេ បើរដ្ឋាភិបាលខ្មែរនៅតែបន្តយកចិត្តយកថ្លើមបរទេសដូចជាវៀតណាម ឬចិន ដែលខ្លួនកំពុងអនុវត្តក្នុងពេលបច្ចុប្បន្ននេះ។
លោករិះគន់ថា ការយកកម្ពុជាទៅពឹងលើប្រទេសចិន ឬវៀតណាម ដើម្បីរស់ ដោយការដោះដូរឱ្យជនបរទេសទាំងនោះប្រមូលធនធានធម្មជាតិខ្មែរ មិនមែនជាវិធីកសាងជាតិ និងរក្សាអធិបតេយ្យភាពជាតិពិតប្រាកដនោះទេ។ លោកបន្តថា ប្រទេសជាតិមួយដែលមានឯករាជ្យពិតប្រាកដ គឺជាប្រទេសដែលមានធនធានមនុស្ស និងភោគទ្រព្យជាតិជារបស់ខ្លួនឯង មិនពឹងផ្អែកលើបរទេសទាំងស្រុងដូចរដ្ឋាភិបាលកំពុងធ្វើសព្វថ្ងៃនេះទេ នោះទើបនាំឱ្យកម្ពុជាមានឯករាជភាពពិតប្រាកដលើឆាកអន្តរជាតិ។
ការលើកឡើងរបស់បណ្ឌិត ឡៅ ម៉ុងហៃ ធ្វើឡើងស្របពេលដែលរដ្ឋាភិបាលកម្ពុជាហាក់ពុំមានគោលនយោបាយបង្កើន និងពង្រឹងសេដ្ឋកិច្ចកម្ពុជាដោយខ្លួនឯងនៅឡើយទេ តែផ្ទុយទៅវិញ មេដឹកនាំខ្មែរតែងលើកពីការអភិវឌ្ឍក្រោមជំនួយរបស់មិត្តដែកថែបចិនស្ទើរតែគ្រប់ពេលទាំងអស់។
លោក ហ៊ុន សែន បានអះអាងកាលពីថ្ងៃទី១២ ខែកញ្ញា ឆ្នាំ២០២១ ក្នុងពិធីប្រគល់ និងទទួលពហុកីឡដ្ឋានដែលជាជំនួយរបស់ចិន ថាមានចិន ទើបកម្ពុជាមានការអភិវឌ្ឍគ្រប់បែបយ៉ាងដូចសព្វថ្ងៃនេះ។ បន្ថែមពីនេះ លោកថាបើមិនមានមិត្តចិនជួយកម្ពុជាទេ ពលរដ្ឋខ្មែរនៅពេលនេះប្រហែលជាអាចចាក់ថ្នាំបង្ការជំងឺ Covid-19 បានត្រឹមតែ ២លាននាក់ប៉ុណ្ណោះ ប៉ុន្តែដោយសារមានមិត្តចិន ទើបធ្វើឲ្យកម្ពុជាអាចចាក់វ៉ាក់សាំងជូនពលរដ្ឋរបស់ខ្លួនតាំងពីដូសទី១ រហូតដល់ដូសទី៣ នៅពេលនេះ។
លោក ហ៊ុន សែន អះអាងថា តើមានប្រទេសណាអាចដើរតួនាទីជំនួសចិន ក្នុងការកសាងហេដ្ឋារចនាសម្ព័ន្ធនៅកម្ពុជា ក្នុងនោះរួមមានផ្លូវគមនាគមន៍ ប្រព័ន្ធធារាសាស្ត្រ អគ្គិសនី និងការកសាងដទៃជាច្រើនទៀត។ ជុំវិញបញ្ហានេះ ប្រមុខរដ្ឋាភិបាលកម្ពុជាចោទសួរថា តើលោកមានកំហុសទេនៅពេលដែលលោកទាក់ទងនឹងមិត្តចិន ហើយបាននាំមកនូវសមិទ្ធផលបែបនេះ?
យ៉ាងណាក៏ដោយ កាលពីចុងឆ្នាំ២០១៩ ក្រសួងសេដ្ឋកិច្ច និងហិរញ្ញវត្ថុ កម្ពុជាបានបញ្ចេញរបាយការណ៍របស់ខ្លួនថា កម្ពុជាបានជំពាក់បំណុលប្រទេសមួយចំនួនប្រមាណជាង ១៦ពាន់លានដុល្លារអាមេរិក ក្នុងនោះជំពាក់ចិនប្រមាណជា ៥ពាន់លានដុល្លារអាមេរិកផងដែរ ដែលបានជាប់ចំណាត់ថ្នាក់លេខ១ ក្នុងចំណោមប្រទេសចំនួន៣០ ដែលជំពាក់បំណុលចិន។
ក្រុមអ្នកឃ្លាំមើលសង្គមរិះគន់ថា ការឱនក្បាលពឹងជំនួយចិន នឹងនាំឲ្យកម្ពុជាខាតបង់ធំណាស់ ដូចជាហិនហោចព្រៃឈើ ធនធានរ៉ែ ជាដើម។ ជាងនេះទៀត កម្ពុជានឹងក្លាយជាទីផ្សារលាងលុយកខ្វក់របស់អ្នកជំនួញទុច្ចរិតចិនថែមទៀត។ បញ្ហានេះ មិនត្រឹមតែខាតផលប្រយោជន៍សេដ្ឋកិច្ចកម្ពុជាដ៏ធ្ងន់ធ្ងរប៉ុណ្ណោះទេ ប៉ុន្តែថែមទាំងបង្កើតវិបត្តិសង្គមធ្ងន់ធ្ងរដល់កម្ពុជាផងដែរ។
ប្រភពដដែលអះអាងថា នៅពេលនេះ កម្ពុជាត្រូវគេមើលឃើញថាគ្រាន់តែជាទីផ្សារសម្រាប់ស្តុកទំនិញឱ្យចិនសម្រាប់នាំចេញទៅបរទេស និងជាកន្លែងសាងសេដ្ឋកិច្ចឱ្យប្រជាជនចិនប៉ុណ្ណោះ។ ជាក់ស្តែងដូចជាខេត្តព្រះសីហនុ ជាដើម ដែលមានជនជាតិចិនរស់នៅ និងប្រកបអាជីវកម្មច្រើនជាងពលរដ្ឋខ្មែរទៅហើយនាពេលបច្ចុប្បន្ននេះ ខណៈពលរដ្ឋម្ចាស់ស្រុកត្រូវរងផលប៉ះពាល់យ៉ាងធ្ងន់ធ្ងរទាំងផ្នែកអសន្តិសុខសង្គម និងមុខរបរអាជីវកម្ម ព្រោះថាជនជាតិចិនដែលកំពុងរស់នៅកម្ពុជា បាននាំគ្នាបង្កើតអាជីវកម្មដោយខ្លួនឯង ដើម្បីបម្រើភ្ញៀវទេសចរជនជាតិរបស់គេដែលធ្វើដំណើរកម្សាន្តនៅខេត្តនោះ៕