ចៅក្រមសាលាដំបូងរាជធានីភ្នំពេញ បានកាត់ទោសកូនប្រុសអតីតសកម្មជនបក្សប្រឆាំងម្នាក់ឱ្យជាប់ពន្ធនាគាររយៈពេល ៨ខែ ប៉ុន្តែអនុវត្តទោសក្នុងពន្ធនាគារ ៤ខែ ១៥ថ្ងៃ ដោយទោសនៅសល់ជិត ៤ខែ នឹងត្រូវព្យួរ។
កុមារ កាក់ សុវណ្ណច្ឆ័យ ត្រូវបានសមត្ថកិច្ចចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១ ក្រោយមកចៅក្រមសាលាដំបូងរាជធានីភ្នំពេញបានចោទប្រកាន់ និងបញ្ជូនទៅឃុំខ្លួននៅពន្ធនាគារព្រៃស ក្រោមបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ» បន្ទាប់ពីកុមាររូបនេះបានបង្ហោះសាររិះគន់រដ្ឋាភិបាលលើបណ្ដាញសង្គម Facebook និង Telegram។
ចៅក្រមជំនុំជម្រះសាលាដំបូងរាជធានីភ្នំពេញ លោក អ៊ួង វុទ្ធា នៅថ្ងៃចន្ទ ទី១ វិច្ឆិកា នេះ បានសម្រេចផ្ដន្ទាទោសកុមារ កាក់ សុវណ្ណច្ឆ័យ ឱ្យជាប់ពន្ធនាគារ ៨ខែ ប៉ុន្តែអនុវត្តទោសតែ ៤ខែ ១៥ថ្ងៃ ខណៈទោសជិត ៤ខែទៀតត្រូវព្យួរ។ នេះបើតាមសេចក្ដីប្រកាសរបស់អង្គការលីកាដូ ចេញផ្សាយនៅថ្ងៃទី១ ខែវិច្ឆិកា ឆ្នាំ២០២១។
បើគិតចាប់តាំងពីថ្ងៃចាប់ និងឃុំខ្លួន កុមារ កាក់ សុវណ្ណច្ឆ័យ នឹងត្រូវតុលាការដោះលែងនៅសប្ដាហ៍ក្រោយនេះ។ ថ្វីត្បិតតែកុមាររូបនេះនឹងត្រូវដោះលែងចេញពីពន្ធនាគារនៅក្នុងខែនេះក្ដី ប៉ុន្តែតុលាការក៏បានភ្ជាប់លក្ខខណ្ឌ ដោយដាក់កុមារ កាក់ សុវណ្ណច្ឆ័យ ឱ្យស្ថិតក្រោមការព្យួរទោសសាកល្បងរយៈពេល ២ឆ្នាំ ដោយតម្រូវឱ្យរូបគេទៅបង្ហាញខ្លួននៅចំពោះមុខតុលាការគ្រប់ពេលដែលត្រូវបានកោះហៅ ឬជូនដំណឹងទៅតុលាការ។
កុមារ កាក់ សុវណ្ណច្ឆ័យ ជាកូនរបស់អតីតសកម្មជនបក្សប្រឆាំង គឺលោក កាក់ កុម្ភារ ដែលបច្ចុប្បន្នលោកក៏កំពុងជាប់ពន្ធនាគារព្រៃស ក្រោមបទចោទ «រួមគំនិតក្បត់» និងបទ «ញុះញង់» ខណៈអ្នកស្រី ព្រំ ចន្ថា ដែលជាម្ដាយ តែងតែសកម្មក្នុងការចេញតវ៉ាដោយអហិង្សាជាមួយស្ត្រីមួយក្រុម ដែលត្រូវបានហៅឈ្មោះថា “ស្ត្រីថ្ងៃសុក្រ” ដើម្បីទាមទារឱ្យមានការដោះលែងកូន និងប្ដីរបស់អ្នកស្រី ក៏ដូចជាអតីតសមាជិកគណបក្សសង្គ្រោះជាតិដទៃទៀតដែលកំពុងជាប់ឃុំ។
ក្រោយពីចាប់ឃុំខ្លួនកុមារ កាក់ សុវណ្ណច្ឆ័យ នៅពន្ធនាគារនោះ កាលពីថ្ងៃទី២ ខែកញ្ញា ឆ្នាំ២០២១ ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិ បានចេញសេចក្ដីថ្លែងការណ៍រួមមួយ ដោយចាត់ទុកការចាប់ឃុំខ្លួន និងចោទប្រកាន់ទៅកុមាររូបនេះ ថាជាការធ្វើឡើងដោយរំលោភអនុសញ្ញាអង្គការកំពូលមួយនេះស្ដីពីសិទ្ធិកុមារ ដែលកម្ពុជាបានផ្ដល់សច្ចាប័ននៅឆ្នាំ១៩៩២។
ក្រុមអ្នកជំនាញសិទ្ធិមនុស្សអន្តរជាតិទាំងនោះបានអំពាវនាវដល់រដ្ឋាភិបាលកម្ពុជា ទម្លាក់ចោលការចោទប្រកាន់ និងដោះលែងកុមាររូបនេះឱ្យនៅក្រៅឃុំ និងត្រូវធានាថា សិទ្ធិរបស់គាត់ត្រូវបានការពារស្របតាមគោលការណ៍ឧត្ដមផលប្រយោជន៍របស់កុមារ ហើយត្រូវអនុលោមតាមអនុសញ្ញាស្ដីពីសិទ្ធិកុមារ អនុសញ្ញាស្ដីពីសិទ្ធិជនពិការ និងច្បាប់កម្ពុជា ដើម្បីការពារសិទ្ធិកុមារក្នុងការបញ្ចេញមតិ និងការចូលរួមផងដែរ។
កុមារ កាក់ សុវណ្ណច្ឆ័យ អាយុ ១៦ឆ្នាំ ដែលម្ដាយអះអាងថាកំពុងមានជំងឺអូទីហ្ស៊ឹម ត្រូវបានសមត្ថកិច្ចចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១។ កុមារ កាក់ សុវណ្ណច្ឆ័យ ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្តងរួចមកហើយកាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមារារូបនោះត្រូវបានសមត្ថកិច្ចដោះលែងវិញក្រោយសាកសួរអស់រយៈពេល ៤៨ម៉ោង៕