ក្រសួងការបរទេសកម្ពុជា កំណត់យកថ្ងៃទី១៥ ដល់ទី១៧ ខែកុម្ភៈ ខាងមុខនេះ ដើម្បីបើកកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅក្នុងទីក្រុងភ្នំពេញ ដែលមានការចូលរួមដោយផ្ទាល់ និងតាមប្រព័ន្ធវីដេអូនៃតំណាងប្រទេសសមាគមអាស៊ាន បន្ទាប់ពីកម្ពុជាប្រកាសផ្អាកកាលពីអំឡុងខែមករា ឆ្នាំ២០២២ កន្លងទៅនោះ។
ក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីប្រកាសព័ត៌មានកាលពីថ្ងៃទី១០ ខែកុម្ភៈ ឆ្នាំ២០២២ ថា ការបើកកិច្ចប្រជុំចង្អៀតរដ្ឋមន្ត្រីការបរទេសអាស៊ាននេះ គឺដើម្បីពិនិត្យមើលឡើងវិញនូវការសម្រេចនានារបស់ថ្នាក់ដឹកនាំនៅក្នុងកិច្ចប្រជុំកំពូលអាស៊ាន និងលើកកម្ពស់សាមគ្គីភាពរបស់អាស៊ានផងដែរ។
ប្រភពដដែលអះអាងថា កិច្ចប្រជុំនេះនឹងពិភាក្សាគ្នាអំពីរបៀប និងវិធីសាស្ត្រដើម្បីកៀរគរកិច្ចខិតខំប្រឹងប្រែងរួមគ្នា ក្នុងការកសាងសហគមន៍អាស៊ានឲ្យកាន់តែធន់រឹងមាំឡើងប្រកបដោយថាមពល ពោរពេញដោយសន្តិភាព និងវិបុលភាព។
ទស្សនវិស័យនេះ នឹងត្រូវធ្វើឡើងក្រោមមូលបទអាស៊ាន រួមគ្នាធ្វើ ដោះស្រាយបញ្ហាប្រឈមទាំងអស់គ្នា ដើម្បីឆ្លើយតបទៅនឹងបញ្ហាប្រឈមជាយុទ្ធសាស្ត្រដែលកំពុងកើតឡើងនៅក្នុងតំបន់ ដែលនឹងត្រូវសម្រេចឱ្យបានក្នុងអំឡុងកម្ពុជាធ្វើជាប្រធានអាស៊ាន។
ប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១១ កុម្ភៈ នេះថា កិច្ចប្រជុំនេះនឹងមិនមានផ្លែផ្កាអ្វីជាដុំកំភួននោះទេ គឺគ្រាន់តែដើម្បីផ្សះផ្សានយោបាយការទូតក្នុងសហគមន៍អាស៊ាន បន្ទាប់ពីមេដឹកនាំកម្ពុជា លោក ហ៊ុន សែន ធ្វើឱ្យមានទំនាស់ផ្លូវចិត្តរវាងគ្នានិងគ្នា នៅពេលដែលគាត់ចាប់ផ្តើមទទួលស្គាល់មេដឹកនាំរបបសឹកខុសច្បាប់ភូមា ថាជានាយករដ្ឋមន្ត្រីនៃសហភាពភូមា កាលពីពេលកន្លងទៅនោះ។
លោក ម៉ែន ណាត លើកឡើងថា ការទម្លាក់ភាពរឹងត្អឹងរបស់លោក ហ៊ុន សែន ព្រមទទួលយកការចង្អុលបង្ហាញពីបណ្តាមេដឹកនាំប្រទេសសមាគមអាស៊ាននេះហើយ ទើបមេដឹកនាំទាំងនោះយល់ព្រមចូលរួមកិច្ចប្រជុំនេះ ហើយការដែលអាចរៀបចំឱ្យមានកិច្ចប្រជុំនេះបាន ក៏ជាឱកាសរបស់លោក ហ៊ុន សែន ដើម្បីរកវិធីចូលរួមកិច្ចប្រជុំកំពូលអាស៊ាន-អាមេរិកជាមួយប្រធានាធិបតីអាមេរិក លោក ចូ បៃដិន ដែរ។
កិច្ចប្រជុំចង្អៀតរដ្ឋមន្ត្រីការបរទេសអាស៊ាននេះធ្លាប់បានគ្រោងរៀបចំធ្វើនៅថ្ងៃទី១៨-១៩ ខែមករា ឆ្នាំ២០២២ នៅក្នុងខេត្តសៀមរាប ម្តងរួចមកហើយ ប៉ុន្តែត្រូវបានក្រសួងការបរទេសកម្ពុជា ប្រកាសលើកពេលកាលពីអំឡុងខែមករា ឆ្នាំ២០២២ កន្លងទៅ ហើយបញ្ហានេះត្រូវគេមើលឃើញថា ដោយសាររដ្ឋមន្ត្រីការបរទេសអាស៊ានទាំងនោះមិនយល់ព្រមទៅនឹងវត្តមានរបស់តំណាងរបបសឹកភូមា ដែលនឹងត្រូវចូលរួមក្នុងកិច្ចប្រជុំនេះ។
ជុំវិញបញ្ហានេះ កាលពីថ្ងៃទី២៤ ខែមេសា ឆ្នាំ២០២១ ប្រធានាធិបតីឥណ្ឌូនេស៊ី លោក ចូកូ វីដូដូ ធ្លាប់បានព្រមានថា បើរបបសឹកភូមាមិនអនុវត្តឱ្យបាននូវចំណុចទាំង៥ ក្នុងកិច្ចប្រជុំកំពូលអាស៊ានទេ ពួកយោធាភូមាទាំងនោះនឹងមិនត្រូវអនុញ្ញាតឲ្យចូលរួមប្រជុំជាមួយមេដឹកនាំអាស៊ានជាដាច់ខាត៕