30 C
Phnom Penh

លោក កឹម សុខា៖ មិន​ធ្វើ​នយោបាយ​ទូងស្គរ​ពី​ចម្ងាយ​បង្កើត​ព្រឹត្តិការណ៍​ឲ្យ​ពលរដ្ឋ​រងគ្រោះ​ជំនួស​ឡើយ

ដោយ ឌឹ ខេមបូឌា ដេលី

បទវិភាគ

ប្រធាន​គណបក្ស​សង្គ្រោះ​ជាតិ លោក កឹម សុខា អះអាង​ថា​ការ​ឈរ​ជើង​ក្នុង​មាតុភូមិ​កម្ពុជា​ដែល​ជា​ទីលាន​នយោបាយ​ជាក់ស្តែង ដោយ​មិន​រត់ចោល​អ្នកគាំទ្រ​របស់​ខ្លួន គឺជា​ជម្រើស​នៃ​ការ​ដឹកនាំ​នយោបាយ​ដ៏​ល្អ​បំផុត​សម្រាប់​ពលរដ្ឋ​ខ្មែរ ហើយ​លោក​ក៏​មិន​ធ្វើ​នយោបាយ​គ្មាន​គោលដៅ​ច្បាស់លាស់ ទូងស្គរ​ពី​ចម្ងាយ​បង្កើត​ព្រឹត្តិការណ៍​រុញច្រាន​ឲ្យ​ពលរដ្ឋ​រងគ្រោះ​ជំនួស​ខ្លួន​នោះ​ដែរ។

លោក កឹម សុខា បាន​សរសេរ​លើ​ទំព័រ Facebook របស់​លោក​កាលពី​ថ្ងៃ​ទី​២០ ខែ​កុម្ភៈ ឆ្នាំ​២០២២ ថា លោក​បាន​ឮ​ដោយ​ផ្ទាល់មាត់​ពី​ពលរដ្ឋ​នៅ​តាម​មូលដ្ឋាន​ថា ពួកគេ​នៅតែ​គាំទ្រ​គោលជំហរ​អហិង្សា​របស់​លោក​ដោយ​ឥត​ងាករេ។ ចំណែក​ឯ​ប្រទេស​ជា​មិត្ត​របស់​កម្ពុជា ក៏​នៅតែ​ផ្តល់​តម្លៃ​ដល់​រូបលោក​ដដែល ដោយសារតែ​ការ​លះបង់ ការ​ព្យាយាម​អត់ធ្មត់​ដោយ​អហិង្សា ការ​រក្សា​នូវ​គោលជំហរ​ច្បាស់លាស់​ដោយ​ការ​តម្កល់​ផល​ប្រយោជន៍ជាតិ និង​ពលរដ្ឋ​ជា​ធំ។

លោក កឹម សុខា អះអាង​ថា ដោយ​ស្មារតី​ស្រឡាញ់​ចង់​ជួយ​ប្រទេស​ជាតិ និង​ពលរដ្ឋ​ខ្មែរ​ឲ្យ​ទទួល​បាន​សេចក្ដីសុខ​ពិតប្រាកដ ជាពិសេស​ក្នុង​នាម​ជា​អ្នក​ដឹកនាំ​នយោបាយ ទោះបីជា​លោក​មិនទាន់​មាន​សិទ្ធិ​សេរីភាព​ពេញលេញ​ក៏ដោយ ក៏​លោក​នៅតែ​យល់​ថា​ការ​មិន​រត់ចោល​មាតុភូមិ​របស់​ខ្លួន និង​ការ​ផ្សារភ្ជាប់​ភាព​ជិតស្និទ្ធ​ជាមួយ​ពលរដ្ឋ គឺជា​ជម្រើស​ដ៏​ល្អ​បំផុត​ក្នុង​នាម​ជា​អ្នក​ដឹកនាំ​នយោបាយ​ស្មោះស្ម័គ្រ​ចំពោះ​ជាតិ និង​ប្រជាជន។

មេដឹកនាំ​បក្ស​ប្រឆាំង​រូប​នេះ​បញ្ជាក់​ថា ទោះបីជា​សវនាការ​របស់​លោក​ត្រូវ​បាន​ពន្យារពេល លោក​នៅតែ​ទទួល​ជួប​អ្នក​ការទូត​តំណាង​ប្រទេស​ជា​មិត្ត​របស់​កម្ពុជា និង​បាន​ទៅ​ជួប​សួរ​សុខទុក្ខ​ពលរដ្ឋ​នៅ​តាម​មូលដ្ឋាន​ជា​ញឹកញាប់។ លើស​ពី​នេះ លោក​ក៏​បាន​ចូលរួម​ធ្វើ​បុណ្យ​ទាន និង​កិច្ចការ​សង្គម​ជាច្រើន​ទៀត​តាម​លទ្ធភាព​ជា​ប្រចាំ​ផង​ដែរ។

ក្រោយ​គណបក្ស​សង្គ្រោះ​ជាតិ ត្រូវ​បាន​តុលាការ​កំពូល​ក្រុង​ភ្នំពេញ​ប្រកាស​រំលាយ​កាលពី​ខែ​វិច្ឆិកា ឆ្នាំ​២០១៧ និង​ចាប់​មេដឹកនាំ​បក្ស​ប្រឆាំង លោក កឹម សុខា ដាក់​ពន្ធនាគារ មន្ត្រី​បក្ស​ប្រឆាំង​ភាគី​លោក សម រង្ស៊ី ជាច្រើន​រូប ដូចជា​លោក អេង ឆៃអ៊ាង និង​អ្នកស្រី មូរ សុខហួរ ជាដើម រួម​ទាំង​លោក សម រង្ស៊ី ផង បាន​នាំគ្នា​ចាកចេញ​ទៅ​រស់នៅ​ក្រៅ​ប្រទេស​ជាបន្តបន្ទាប់។ ភាគី​លោក សម រង្ស៊ី បាន​ប្រកាស​ធ្វើ​មាតុភូមិ​និវត្តន៍​កាលពី​ថ្ងៃ​ទី​៩ ខែ​វិច្ឆិកា ឆ្នាំ​២០១៩ ដើម្បី​ចូល​ចាប់​ខ្លួន​លោក ហ៊ុន សែន ទាំង​រស់ ហើយ​ប្រកាស​ឲ្យ​កងកម្លាំង​ប្រដាប់​អាវុធ​ងើបឡើង​ផ្ដួល​រំលំ​រដ្ឋាភិបាល​លោក ហ៊ុន សែន ថែម​ទៀត ប៉ុន្តែ​ផែនការ​នេះ​ត្រូវ​បរាជ័យ​ទាំងស្រុង។

ជុំវិញ​ផែនការ «មាតុភូមិ​និវត្តន៍ ៩ វិច្ឆិកា» នេះ សកម្មជន និង​មន្ត្រី​បក្ស​ប្រឆាំង​ជាច្រើន​នាក់​ដែល​បាន​ប្រកាស​ចូលរួម​ជាមួយ​លោក សម រង្ស៊ី ត្រូវ​បាន​តុលាការ​ក្រុង​ភ្នំពេញ​ចោទប្រកាន់ និង​ចាប់​ឃុំ​ខ្លួន​ជាបន្តបន្ទាប់។ បើ​ទោះបីជា​មាន​ការ​ចោទប្រកាន់ និង​ចាប់​ខ្លួន​សមាជិក​ទាំងនោះ​យ៉ាងណាក៏ដោយ ក៏​លោក សម រង្ស៊ី មិន​បាន​បញ្ឈប់​សកម្មភាព​របស់​គាត់​នោះ​ដែរ។ ជាក់ស្តែង​កាលពី​ថ្ងៃ​ទី​១៧ ខែ​កក្កដា ឆ្នាំ​២០២១ លោក​បាន​អំពាវនាវ​ឲ្យ​ពលរដ្ឋ​ចូលរួម​បង្កើត​រដ្ឋាភិបាល​រួបរួម​ជាតិ​នៅ​កម្ពុជា ដោយ​យក​តាម​គំរូ​ប្រទេស​ភូមា ដើម្បី​ទាមទារ​ឲ្យ​លោក ហ៊ុន សែន ប្រគល់​អំណាច​ជូន​ពលរដ្ឋ​វិញ ប៉ុន្តែ​ការ​អំពាវនាវ​នេះ​ត្រូវ​បរាជ័យ​ម្តង​ទៀត។

ក្រោយ​ផែនការ​ក្រៅ​ស្រុក​បរាជ័យ​ជាបន្តបន្ទាប់ លោក សម រង្ស៊ី នៅ​ពេលនេះ​ត្រូវ​គេ​មើលឃើញ​ថា បាន​ព្យាយាម​រៀបចំ​សេណារីយ៉ូ​នយោបាយ​នៅ​ក្នុង​ស្រុក​វិញ​ម្តង តាមរយៈ​គណបក្ស​ភ្លើង​ទៀន ដែល​ជា​គណបក្ស​ចាស់​របស់​លោក។

ជាក់ស្តែង​កាលពី​ថ្ងៃ​ទី​១៩ ខែ​កុម្ភៈ ឆ្នាំ​២០២២ អតីត​មេដឹកនាំ​បក្ស​ប្រឆាំង លោក សម រង្ស៊ី បាន​រៀបចំ​សិក្ខាសាលា​ជួបជុំ​អ្នកគាំទ្រ​របស់​ខ្លួន​នៅ​ទីក្រុង Jacksonville រដ្ឋ Florida សហរដ្ឋ​អាមេរិក ដែល​ការ​ជួបជុំ​នោះ​បាន​បង្ហាញ​យ៉ាង​ច្បាស់​ថា គឺជា​ការ​ជួបជុំ​មន្ត្រី និង​អ្នកគាំទ្រ​គណបក្ស​ភ្លើង​ទៀន ប៉ុណ្ណោះ ព្រោះ​ក្នុង​កម្មវិធី​ជួបជុំ​នោះ មាន​ភស្តុតាង​ជាក់ស្តែង​ជាច្រើន ដូចជា​ការ​ដាក់​តាំង​ទង់​គណបក្ស​ភ្លើង​ទៀន ជាមួយ​ទង់ជាតិ​ខ្មែរ។

ជាង​នេះ​ទៀត លោក សម រង្ស៊ី ក៏​បាន​ប្រើ​ទៀន​មួយ​ដើម​អុជ​បំភ្លឺ​ធ្វើជា​និមិត្តសញ្ញា​តំណាង​ក្នុង​កម្មវិធី​នោះ​ផង​ដែរ ដែល​នរណា​ក៏​ដឹង​ដែរ​ថា លោក សម រង្ស៊ី មិន​ធ្លាប់​ធ្វើ​ដូច្នេះ​ទេ​ពី​មុន​មក ក្រោយ​ពេល​គណបក្ស សម រង្ស៊ី ឬ​គណបក្ស​ភ្លើង​ទៀន ច្របាច់​ចូល​គ្នា​ជាមួយ​គណបក្ស​សិទ្ធិមនុស្ស បង្កើត​ចេញ​ជា​គណបក្ស​សង្គ្រោះ​ជាតិ​កាលពី​ឆ្នាំ​២០១២ នោះ។ លើស​ពី​នេះ សកម្មជន​មួយ​ចំនួន​ក្នុង​ពិធី​នោះ បាន​ស្រែក​ជ័យឃោស​ថា «ជយោ​គណបក្ស​ភ្លើង​ទៀន!» ថែម​ទៀត​ផង ខណៈ​លិខិត​ជូនដំណឹង​បើក​សិក្ខាសាលា​កាលពី​ថ្ងៃ​ទី​៧ ខែ​កុម្ភៈ ឆ្នាំ​២០២២ កន្លងទៅ គឺជា​សេចក្តី​ជូនដំណឹង​ដើម្បី​ជួបជុំ​សមាជិក​គណបក្ស​សង្គ្រោះ​ជាតិ។

ទោះជាយ៉ាងណា​ក៏ដោយ គណបក្ស​សង្គ្រោះ​ជាតិ​ប្រចាំ​សហរដ្ឋ​អាមេរិក (CNRP-A) បាន​ចេញ​សេចក្តី​ជូនដំណឹង​កាលពី​ថ្ងៃ​ទី​១៧ ខែ​កុម្ភៈ ឆ្នាំ​២០២២ កន្លងទៅ​ថា មាន​គណបក្ស​នយោបាយ​ទាំង​ចាស់​ថ្មី​កំពុង​ប្រើ​ឧបាយកល​យក​ឈ្មោះ​គណបក្ស​សង្គ្រោះ​ជាតិ ទៅ​បោកប្រាស់​ពលរដ្ឋ​ដើម្បី​បុព្វហេតុ​នយោបាយ​របស់​ពួកគេ​រៀងៗ​ខ្លួន។

ប្រភព​ដដែល​អំពាវនាវ​ឲ្យ​សមាជិក និង​មន្ត្រី​គណបក្ស​សង្គ្រោះ​ជាតិ​ទាំងអស់ បន្ត​ជំហរ​រឹងមាំ​នៅ​ជាមួយ​គណបក្ស​សង្គ្រោះ​ជាតិ និង​មិន​ត្រូវ​ជ្រួលជ្រើម​តាម​ការ​អូសទាញ​របស់​អ្នក​ដទៃ​ឲ្យ​ទៅ​គាំទ្រ​បក្ស​ផ្សេង​ក្រៅពី​គណបក្ស​សង្គ្រោះ​ជាតិ​នោះ​ឡើយ។

អតីត​តំណាងរាស្ត្រ​គណបក្ស​សង្គ្រោះ​ជាតិ លោក សួន សុរីដា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២១ កុម្ភៈ នេះ​ថា សកម្មភាព​របស់​លោក សម រង្ស៊ី នៅ​ពេលនេះ គឺជា​ការ​ធ្វើ​នយោបាយ​ទុច្ចរិត​យ៉ាង​ពិតប្រាកដ ព្រោះ​ថា​គាត់​តែ​ម្នាក់ឯង​កំពុង​ប្រកាស​ពី​ការ​ដឹកនាំ​សង្គ្រោះ​ជាតិ​ផង និង​គណបក្ស​ភ្លើង​ទៀន​ផង ខណៈ​គណបក្ស​ភ្លើង​ទៀន​នៅ​ពេលនេះ បាន​សម្រេច​ចិត្ត​រួម​រស់នៅ​ក្រោម​ម្លប់​សន្តិភាព​របស់​គណបក្ស​កាន់​អំណាច​ទៅ​ហើយ​នោះ។

ដោយឡែក​អ្នកជំនាញ​ផ្នែក​ច្បាប់​អន្តរជាតិ កញ្ញា សេង ធារី ធ្លាប់​លើកឡើង​ក្នុង​កិច្ចពិភាក្សា​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ពេល​ថ្មីៗ​នេះ​ថា ដំណើរការ​របស់​គណបក្ស​ភ្លើង​ទៀន​នៅ​ពេលនេះ គឺជា​ទង្វើ​ទាល់ច្រក​តែប៉ុណ្ណោះ ដូច្នេះ​សកម្មភាព​គណបក្ស​នេះ​ដែល​មាន​លោក សម រង្ស៊ី នៅ​ពីក្រោយ មិន​អាច​មាន​លទ្ធផល​ជា​វិជ្ជមាន​ទេ ហើយ​ការ​ធ្វើ​បែប​នេះ​គ្រាន់តែ​ជា​ការ​បង្ហាញ​នូវ​ការ​ទទួលស្គាល់​រដ្ឋាភិបាល​ដែល​គាត់​ធ្លាប់​ចោទ​ថា ជា​រដ្ឋាភិបាល​ខុសច្បាប់​នោះ។

ចំណែក​អ្នកវិភាគ​នយោបាយ សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​ប្រជាធិបតេយ្យ (PMD) លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​២១ កុម្ភៈ នេះ​ដែរ​ថា លោក សម រង្ស៊ី គួរតែ​ប្រកាស​អំពី​ការ​មិន​ពាក់ព័ន្ធ​នឹង​គណបក្ស​ភ្លើង​ទៀន​ចំពោះ​សកម្មភាព​នយោបាយ​របស់​គាត់ ហើយ​ប្រសិនបើ​គាត់​មិន​បង្ហាញ​ជំហរ​ឲ្យ​បាន​ច្បាស់លាស់ និង​ឲ្យ​បាន​ឆាប់​ទេ គាត់​នឹង​ជាប់​អន្ទាក់​នយោបាយ​របស់​លោក ហ៊ុន សែន កាន់តែ​ជ្រៅ​ជាមិនខាន។

ទាក់ទិន​នឹង​បញ្ហា​នេះ ក្រុម​អ្នក​ឃ្លាំមើល​សង្គម លើកឡើង​ថា បើ​ក្រុម​អ្នក​ប្រជាធិបតេយ្យ​រិះគន់​លោក ហ៊ុន សែន ពី​ការ​ជាន់​ឈ្លី​លទ្ធិប្រជាធិបតេយ្យ និង​រំលោភ​សិទ្ធិមនុស្ស ពួកគេ​ក៏​ត្រូវតែ​ចេះ​រក​វិធី​រួបរួម​កម្លាំង​អ្នក​ប្រជាធិបតេយ្យ​ដើម្បី​កុំ​ឲ្យ​លោក ហ៊ុន សែន ជិះជាន់​បាន​ដែរ ប៉ុន្តែ​បើ​ពួកគេ​នៅតែ​បែកខ្ញែក​គ្នា​ដូច​សព្វថ្ងៃ​នេះ ពួកគេ​នឹង​មិន​អាច​ស្វែងរក​ការ​ផ្លាស់ប្ដូរ​ជា​វិជ្ជមាន​នៅ​កម្ពុជា​ក្នុង​បុព្វហេតុ​នាំ​សេចក្ដីសុខ សន្តិភាព សេរីភាព យុត្តិធម៌​សង្គម និង​លទ្ធិប្រជាធិបតេយ្យ​ពិតប្រាកដ​ជូន​ពលរដ្ឋ​នោះ​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស