31 C
Phnom Penh

ស្ថាបនិក​បក្ស​បេះដូង​ជាតិ​ថា​នឹង​ចូល​បំភ្លឺ​នៅ​តុលាការ​បន្ទាប់ពី​ទទួល​បាន​ឯកសារ​ពាក់ព័ន្ធ

ដោយ ឌឹ ខេមបូឌា ដេលី

បទវិភាគ

ស្ថាបនិក​គណបក្ស​បេះដូង​ជាតិ លោក សៀម ភ្លុក អះអាង​ថា​នឹង​ចូល​ខ្លួន​ទៅ​បំភ្លឺ​នៅ​ចំពោះ​មុខ​ចៅក្រម​ស៊ើបសួរ បន្ទាប់ពី​លោក​ពឹងពាក់​មេធាវី និង​ទទួល​បាន​ឯកសារ​ពាក់ព័ន្ធ​លើ​សំណុំរឿង​របស់​លោក​ពី​តុលាការ​រួចរាល់។

ស្ថាបនិក​គណបក្ស​បេះដូង​ជាតិ លោក សៀម ភ្លុក បាន​ចេញ​សេចក្តី​ប្រកាស​ព័ត៌មាន​នៅ​ថ្ងៃ​ទី​២០ ខែ​មេសា ឆ្នាំ​២០២២ ថា​មិន​ដែល​មាន​បំណង​គេចវេស​ពី​ការ​កោះហៅ​របស់​តុលាការ​ម្តង​ណា​ឡើយ ប៉ុន្តែ​ដោយសារតែ​កន្លងមក​លោក​មិន​ដែល​បាន​ទទួល​ដីកា​កោះហៅ​ជា​ផ្លូវការ​ពី​តុលាការ​ទាល់តែសោះ។

លោក​បដិសេធ​រាល់​ពាក្យ​ចចាមអារ៉ាម និង​សារព័ត៌មាន​មួយ​ចំនួន​ដែល​បាន​ចុះផ្សាយ​លើ​បណ្ដាញ​សង្គម​ហ្វេសប៊ុក​នា​ពេល​កន្លងមក ដែល​ថា​លោក​មាន​ចេតនា​គេច​ពី​ការ​កោះហៅ​របស់​តុលាការ ថា​ជា​រឿង​មិន​ពិត​នោះ​ឡើយ ព្រោះ​លោក​មិន​ដែល​មាន​ចេតនា​គេចវេស​ពី​ការ​ទទួល​ខុសត្រូវ​ចំពោះ​មុខ​ច្បាប់​នោះ​ទេ។

កាលពី​ថ្ងៃ​ទី​១៩ ខែ​មេសា ឆ្នាំ​២០២២ សារព័ត៌មាន​ដែល​ស្និទ្ធ​នឹង​រដ្ឋាភិបាល​កម្ពុជា ដើម​អម្ពិល បាន​ដកស្រង់​សម្ដី​អ្នក​នាំពាក្យ​គណបក្ស​កាន់​អំណាច លោក សុខ ឥសាន ថា​ការ​គេច​ខ្លួន​របស់​លោក សៀម ភ្លុក ដែល​ជា​ស្ថាបនិក​គណបក្ស​បេះដូង​ជាតិ គឺជា​អំពើ​ទុច្ចរិត​ដែល​អាច​បញ្ជាក់​ថា លោក​ពិត​ជា​បាន​ប្រព្រឹត្ត​ខុស​នឹង​ផ្លូវច្បាប់​ប្រាកដ​មែន។

លោក សុខ ឥសាន បញ្ជាក់​ថា បើ​ពិតជា​មាស​សុទ្ធ លោក សៀម ភ្លុក កុំ​មិន​ចាំបាច់​គេច​ខ្លួន​នោះ​ទេ ព្រោះ​ថា​ការ​គេច​ខ្លួន​នេះ គឺជា​ការ​បញ្ជាក់​យ៉ាង​ច្បាស់​នូវ​អំពើ​ទុច្ចរិត​របស់​គាត់​តែប៉ុណ្ណោះ។ អ្នក​នាំពាក្យ​រូប​នេះ​បន្ត​ថា បើ​ខ្លួន​អះអាង​ថា​មិន​បាន​បន្លំ​ស្នាម​មេដៃ ហេតុ​អ្វី​ចាំបាច់​រត់​គេច​ខ្លួន។

លោក សៀម ភ្លុក ត្រូវ​បាន​សាលាដំបូង​រាជធានី​ភ្នំពេញ​ចេញ​ដីកា​កោះហៅ​ឱ្យ​ចូល​ខ្លួន​ម្ដង​រួច​មក​ហើយ​កាលពី​ថ្ងៃ​ទី​២២ ខែ​មីនា ឆ្នាំ​២០២២ ពាក់ព័ន្ធ​នឹង​រឿង​ក្លែង​បន្លំ​ស្នាម​មេដៃ​សមាជិក​ដើម្បី​បង្កើត​គណបក្ស​នយោបាយ ប៉ុន្តែ​លោក​មិន​បាន​ចូល​ទៅ​បំភ្លឺ​តាម​ដីកា​កោះ​របស់​តុលាការ​នោះ​ទេ ដោយសារតែ​លោក​មិន​បាន​ទទួល​ដីកា​នោះ។

នៅ​ថ្ងៃ​ទី​៤ ខែ​មេសា ឆ្នាំ​២០២២ ចៅក្រម​សាលាដំបូង​រាជធានី​ភ្នំពេញ លោក លិ សុខា បាន​បង្គាប់​ឱ្យ​កម្លាំង​សមត្ថកិច្ច​នាំ​ខ្លួន​តំណាង​ស្ថាបនិក​គណបក្ស​បេះដូង​ជាតិ​រូប​នេះ​ឱ្យ​ចូល​ខ្លួន​ទៅ​ឆ្លើយ​បំភ្លឺ​ឱ្យ​បាន​មុន​ថ្ងៃ​ទី​២៥ ខែ​មេសា ឆ្នាំ​២០២២ ពាក់ព័ន្ធ​នឹង​បទ​ចោទ «ក្លែង​បន្លំ និង​ប្រើប្រាស់​លិខិត​ក្លែង» ក្នុង​ការ​បង្កើត​គណបក្ស​បេះដូង​ជាតិ។

អ្នក​នាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា បាន​ប្រាប់​សារព័ត៌មាន​ក្នុង​ស្រុក​ថា អាជ្ញាធរ​កំពុង​ស្វែងរក​ការ​នាំ​ខ្លួន​លោក សៀម ភ្លុក ខណៈ​មាន​ព័ត៌មាន​ថា​លោក សៀម ភ្លុក កំពុង​គេច​ខ្លួន។ លោក​ថា​រហូត​មក​ដល់​ពេលនេះ លោក​អត់​ទាន់​បាន​រក​ឃើញ​លោក សៀម ភ្លុក នៅឡើយ​ទេ។

ចំណែកឯ​នាយិកា​ប្រតិបត្តិ​នៃ​មជ្ឈមណ្ឌល​សិទ្ធិមនុស្ស​កម្ពុជា (CCHR) អ្នកស្រី ចក់ សុភាព យល់​ឃើញ​ថា អាជ្ញាធរ​គួរតែ​ធ្វើការ​ដោយ​យុត្តិធម៌ ហើយ​មិន​គួរ​រើសអើង​និន្នាការ​នយោបាយ​ខុស​គ្នា​នោះ​ទេ។

កាលពី​ថ្ងៃ​ទី​៨ ខែ​វិច្ឆិកា ឆ្នាំ​២០២១ រដ្ឋមន្ត្រី​ក្រសួង​មហាផ្ទៃ លោក ស ខេង អះអាង​ថា​ស្នាម​មេដៃ​របស់​សមាជិក​គណបក្ស​បេះដូង​ជាតិ​ចំនួន​ជាង ៤៧០០​នាក់​ជា​ស្នាម​មេដៃ​មាន​ភាព​មិន​ប្រក្រតី៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស