26 C
Phnom Penh

អ្នក​នាំពាក្យ CPP៖ បក្ស​ប្រជាជន​កម្ពុជា​ជឿជាក់​ខ្ពស់​យក​ឈ្នះ​ការ​បោះឆ្នោត​ជាតិ​ឆ្នាំ​២០២៣ ខាងមុខ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​បក្ស​កាន់​អំណាច ទម្លាយ​ថា គណបក្ស​ប្រជាជន​កម្ពុជា​ជឿជាក់​ថា ខ្លួន​នៅតែ​អាច​យក​ឈ្នះ​ក្នុង​ការ​បោះឆ្នោត​ជាតិ​អាណត្តិ​ទី​៧ ឆ្នាំ​២០២៣ ខាងមុខ​នេះ​បន្ត​ទៀត ត្បិត​គណបក្ស​នេះ​បាន​កសាង​សមិទ្ធផល និង​កម្មវិធី​នយោបាយ​ស្រប​តាម​តម្រូវការ​ជាតិ និង​តម្រូវការ​របស់​ប្រជាជន​ទូទាំង​ប្រទេស។

អ្នក​នាំពាក្យ​គណបក្ស​ប្រជាជន​កម្ពុជា លោក សុខ ឥសាន លើកឡើង​ក្នុង​សន្និសីទ​សារព័ត៌មាន​ក្រោយ​សន្និបាត​វិសាមញ្ញ​របស់​គណបក្ស​កាន់​អំណាច​កាលពី​ថ្ងៃទី​២៩ ខែ​មករា ថា បក្ស​ប្រជាជន​កម្ពុជា​ជា​គណបក្ស​ដែល​មាន​វ័យ​ចំណាស់​ជាងគេ​មួយ ដែល​បាន​ដឹកនាំ​រាជរដ្ឋាភិបាល​រយៈពេល ៦​អាណត្តិ​មក​ហើយ។ ជាង​នេះ​ទៀត បក្ស​កាន់​អំណាច​ក៏​មាន​គុណសម្បត្តិ​ដ៏​ធំធេង​ក្នុង​ការ​អភិវឌ្ឍ​ជាតិ និង​ការ​ធានា​នូវ​ភាព​សុខសាន្ត​សម្រាប់​ពលរដ្ឋ​ខ្មែរ​ទូទាំង​ប្រទេស​ផង​ដែរ។

លោក សុខ ឥសាន លើកឡើង​ថា គណបក្ស​ប្រជាជន​កម្ពុជា​មាន​ស្នាដៃ​ជាច្រើន ដូចជា​ការ​កសាង​ហេដ្ឋារចនាសម្ព័ន្ធ​នានា និង​ការ​ធានា​បាន​នូវ​ភាព​រស់រាន​មាន​ជីវិត​របស់​ពលរដ្ឋ​ខ្មែរ ដោយ​ការ​កម្ចាត់​ចោល​នូវ​របប​ប្រល័យ​ពូជសាសន៍ ប៉ុល ពត កុំ​ឲ្យ​កើតមាន​នៅ​លើ​ទឹកដី​កម្ពុជា​ឡើងវិញ ជាដើម ដែល​ស្រប​ទៅ​តាម​ការ​ចង់​បាន​របស់​ប្រជាជន​គ្រប់ៗ​គ្នា ដូច្នេះ​ហើយ​ទើប​គណបក្ស​នេះ​អាច​ឈរ​ជើង​ដឹកនាំ​ប្រទេស​រាប់​សិប​ឆ្នាំ​រហូត​ដល់​សព្វថ្ងៃ​នេះ។

មន្ត្រី​ជាន់ខ្ពស់​បក្ស​កាន់​អំណាច​រូប​នេះ​បញ្ជាក់​ថា ទោះបី​កម្ពុជា​បាន​រៀបចំ​ការ​បោះឆ្នោត​អាណត្តិ​ទី​១ ឆ្នាំ​១៩៩៣ ដោយ​បង្កើត​បាន​នូវ​រដ្ឋាភិបាល​មួយ​ក៏ដោយ ប៉ុន្តែ​កម្ពុជា​នៅ​មិន​ទាន់​ទទួល​បាន​សុខ​សន្តិភាព​ពេញលេញ​នោះ​ទេ។ លោក​បន្ត​ថា កម្ពុជា​បាន​ទទួល​សុខ​សន្តិភាព​ពិតប្រាកដ​នៅ​ក្រោយ​ការ​ដាក់​ចេញ​នយោបាយ​ឈ្នះ​ឈ្នះ​របស់​លោក ហ៊ុន សែន ដែល​ជា​គុណសម្បត្តិ​ដ៏​ធំធេង​របស់​បក្ស​កាន់​អំណាច​មិន​អាច​កាត់​ថ្លៃ​បាន។

អតីត​អ្នកទោស​នយោបាយ លោក មាជ សុវណ្ណារ៉ា ប្រាប់​សារព័ត៌មាន the Cambodia Daily នៅ​ថ្ងៃទី​៣០ មករា នេះ​ថា ការ​សង្ឃឹម​ឈ្នះ​ឆ្នោត​ខ្ពស់​របស់​បក្ស​កាន់​អំណាច គឺ​មាន​ហេតុផល​អវិជ្ជមាន​ក្នុង​ដំណើរការ​នៃ​ការ​បោះឆ្នោត​ខាងមុខ​នេះ ដោយសារ​មាន​ការ​បិទ​សិទ្ធិ​ចូលរួម​របស់​គណបក្ស​សង្គ្រោះ​ជាតិ ការ​បិទ​ខ្ទប់​សិទ្ធិ​នយោបាយ​របស់​លោក កឹម សុខា ការ​រឹតត្បិត​សេរីភាព​មេដឹកនាំ​នយោបាយ​ផ្សេងៗ និង​ការ​រៀបចំ​សមាសភាព គ.ជ.ប ដែល​សុទ្ធសឹងតែ​មកពី​គណបក្ស​ប្រជាជន​កម្ពុជា ជាដើម។

លោក មាជ សុវណ្ណារ៉ា លើកឡើង​ថា បើ​គណបក្ស​កាន់​អំណាច​ចិត្ត​សឿង​ក្នុង​ការ​ប្រកួតប្រជែង​ការ​បោះឆ្នោត​ខាងមុខ​នេះ​មែន ពួកគេ​គួរតែ​បើក​សិទ្ធិ​នយោបាយ​ឲ្យ​លោក កឹម សុខា អាច​វិល​ចូល​ឆាក​នយោបាយ​ឡើងវិញ ដើម្បី​ឲ្យ​ពលរដ្ឋ​មើល​ឃើញ​ថា ទីលាន​នយោបាយ​នៅ​អាណត្តិ​ទី​៧ នេះ ពិត​ជា​មាន​លំហ​សេរីភាព​ពេញលេញ​ប្រាកដ​មែន ហើយ​នៅ​ពេល​ដែល​បក្ស​កាន់​អំណាច​ឈ្នះ​ឆ្នោត​ទៀត​នោះ ក៏​ជា​ការ​ឈ្នះ​ដោយ​កិត្តិយស​ដែរ ដែល​មិនមែន​ជា​ការ​ឈ្នះ​ដោយ​ការ​ចង​ដៃ​អ្នក​ដទៃ​មិន​ឲ្យ​ប្រកួត​ជាមួយ​ខ្លួន​នោះ​ទេ។

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​រូប​នេះ​បញ្ជាក់​ថា កិត្តិយស និង​សេចក្តី​ថ្លៃថ្នូរ​របស់​បក្ស​កាន់​អំណាច មិនមែន​នៅ​ត្រឹម​តែ​ការ​ឈ្នះ​ឆ្នោត​នោះ​ទេ ប៉ុន្តែ​ត្រូវ​ឲ្យ​មជ្ឈដ្ឋាន​ទូទៅ​ទាំង​សហគមន៍​ជាតិ និង​អន្តរជាតិ​ទទួលស្គាល់​ផង​ដែរ ហើយ​ជា​ជ័យជម្នះ​មួយ​ដែល​មិន​បង្ក​ការ​ឈឺចាប់ ឬ​បន្សល់​នូវ​ភាព​អាម៉ាស់​ដល់​អ្នក​បន្ត​វេន​របស់​ខ្លួន ដែល​នឹង​ត្រូវ​ឡើង​កាន់​តំណែង​ស្នង​មរតក​អំណាច​ពី​ខ្លួន​ទៅ​ថ្ងៃ​ក្រោយ។

ក្រុម​អ្នក​សង្កេតការណ៍​រិះគន់​ថា ចាប់តាំងពី​ការ​បោះឆ្នោត​ជាតិ​ឆ្នាំ​១៩៩៨ រហូត​ដល់​ការ​បោះឆ្នោត​ឆ្នាំ​២០១៨ គណបក្ស​ប្រជាជន​កម្ពុជា​របស់​លោក ហ៊ុន សែន តែងតែ​លួច​សន្លឹកឆ្នោត​ពី​បក្ស​ប្រឆាំង​រហូត​មក ប៉ុន្តែ​ចាប់តាំងពី​ការ​បោះឆ្នោត​ឃុំ-សង្កាត់​ឆ្នាំ​២០២២ រហូត​ដល់​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ គឺ​បក្ស​កាន់​អំណាច​អាច​នឹង​ចេញ​មុខ​ប្លន់​លទ្ធផល​នៃ​ការ​បោះឆ្នោត​ជា​ចំហ​តែម្តង។

ចាប់តាំងពី​ឆ្នាំ​១៩៩៣ មក កម្ពុជា​បាន​បោះឆ្នោត​ជ្រើសរើស​តំណាងរាស្ត្រ​ចំនួន ៦​លើក​រួច​មក​ហើយ ខណៈ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​បាន ៥​លើក​ផង​ដែរ ប៉ុន្តែ​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ ឆ្នាំ​២០២២ កន្លងទៅ ត្រូវ​បាន​សហគមន៍​អន្តរជាតិ​បដិសេធ​ចោល​ទាំងស្រុង ដោយ​ចាត់ទុក​ថា​ជា​ការ​បោះឆ្នោត​ដែល​គ្មាន​តម្លាភាព សេរី ត្រឹមត្រូវ និង​យុត្តិធម៌ ខណៈ​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ គេ​នៅ​មិន​ទាន់​ឃើញ​ប្រទេស​លោក​សេរី​ដាក់​អ្នក​សង្កេតការណ៍​នៅឡើយ​ទេ ហើយ​ក៏​ទំនង​ជា​ប្រទេស​ទាំងនោះ​មិន​ទទួលស្គាល់​ការ​បោះឆ្នោត​ខាងមុខ​នេះ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស