នៅថ្ងៃចុងក្រោយនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលបានប្រព្រឹត្តទៅអស់រយៈពេល ១៤ថ្ងៃ ត្រូវបានបិទបញ្ចប់ហើយនៅថ្ងៃទី៣ ខែមិថុនា ឆ្នាំ២០២២ នេះ ដោយមានគណបក្សនយោបាយចំនួន៣ បានធ្វើការឃោសនាធំនៅរាជធានីភ្នំពេញ ខណៈបក្សមួយចំនួនទៀតធ្វើតាមខេត្ត។
ការធ្វើយុទ្ធនាការឃោសនាធំរបស់គណបក្សនយោបាយនៅថ្ងៃទី៣ ខែមិថុនា ឆ្នាំ២០២២ ខណៈថ្ងៃទី៤ មិថុនា គេហៅថាថ្ងៃ «ស» ដោយគណបក្សនយោបាយទាំងអស់មិនអាចធ្វើការឃោសនាឡើយ។
គណបក្សនយោបាយដែលធ្វើយុទ្ធនាការឃោសនានៅរាជធានីភ្នំពេញ ក្នុងនោះមានគណបក្សប្រជាជនកម្ពុជា គណបក្សភ្លើងទៀន និងគណបក្សខ្មែររួបរួមជាតិ ខណៈគណបក្សប្រជាធិបតេយ្យមូលដ្ឋាន និងគណបក្សមួយចំនួនទៀតធ្វើនៅតាមខេត្ត ហើយបក្សខ្លះទៀតគ្មានប្រាក់សម្រាប់ធ្វើយុទ្ធនាការធំនៅថ្ងៃបិទបញ្ចប់។
នៅថ្ងៃចុងក្រោយនៃយុទ្ធនាការឃោសនាបោះឆ្នោតឃុំ-សង្កាត់ គណបក្សប្រជាជនកម្ពុជាមានអ្នកចូលរួមហែក្បួនចន្លោះពី ៥ម៉ឺនទៅ ៦ម៉ឺននាក់ ដោយការហែក្បួនឃោសនានេះជួបជុំគ្នានៅផ្លូវ៦០ម៉ែត្រ រួចហែឆ្លងកាត់សង្កាត់ចំនួន៥ នៃរាជធានីភ្នំពេញ។
ចំណែកគណបក្សភ្លើងទៀន បានចាប់ផ្ដើមដំណើរការហែក្បួនយុទ្ធនាការឃោសនារបស់គណបក្សនេះជួបជុំគ្នានៅវេលាម៉ោង ៧ព្រឹក ដោយចាប់ផ្តើមចេញដំណើរពីចំណុចមួយនៅជិតមន្ទីរពេទ្យជោរៃភ្នំពេញ ផ្លូវជាតិលេខ១ ក្នុងខណ្ឌច្បារអំពៅ ដោយទៅឈប់សម្រាកនៅសួនច្បារត្រើយម្ខាងក្បែរសណ្ឋាគារសុខា ហើយក្បួននឹងចាប់ផ្តើមហែមកវិញនៅម៉ោង ២រសៀលដោយបញ្ចប់នៅម៉ោង ៨យប់។
អនុប្រធានគណបក្សភ្លើងទៀន លោក សុន ឆ័យ បានប្រាប់អ្នកសារព័ត៌មាននៅថ្ងៃយុទ្ធនាការចុងក្រោយនេះថា គណបក្សភ្លើងទៀននឹងការពារលទ្ធផលបោះឆ្នោតដោយមិនឱ្យគណបក្សកាន់អំណាច និងស្ថាប័នណាមួយទៅរំលាយដូចគណបក្សសង្គ្រោះជាតិឡើយ ទោះបីបច្ចុប្បន្នគណៈកម្មាធិការជាតិរៀបចំការបោះឆ្នោតមកពីគណបក្សប្រជាជនកម្ពុជាក៏ដោយ។
ដោយឡែកគណបក្សខ្មែររួបរួមជាតិដែលដឹកនាំដោយលោក ញឹក ប៊ុនឆៃ បានក៏បានធ្វើយុទ្ធនាការហែក្បួនចេញពីរង្វង់មូលនាងមច្ឆានៅត្រើយខាងកើតនៅខណ្ឌជ្រោយចង្វារ ទៅកាន់រាជធានីភ្នំពេញ។
ជុំវិញបញ្ហានេះ ក្រុមអ្នកសង្កេតការណ៍រិះគន់ថា ដើម្បីឈ្នះឆ្នោតរាល់អាណត្តិកន្លងមក គណបក្សកាន់អំណាចរបស់លោក ហ៊ុន សែន តែងតែប្រើមន្ត្រីរាជការក្នុងក្របខ័ណ្ឌរដ្ឋឱ្យជួយឃោសនារកសំឡេងឆ្នោតឱ្យខ្លួន ជាថ្នូរនឹងការដំឡើងតំណែងបុណ្យស័ក្តិ និងលាភសក្ការៈផ្សេងៗ។ ដូច្នេះហើយ បានជាមន្ត្រីរាជការទាំងនោះប្រឹងប្រែងនាំគ្នាធ្វើការឱ្យបក្សកាន់អំណាច ជាជាងការបំពេញកិច្ចការរបស់រដ្ឋដែលជាតួនាទី។
ទាក់ទិននឹងបញ្ហានេះ វេទិកាពលរដ្ឋធ្លាប់បានចេញសេចក្ដីថ្លែងការណ៍កាលពីថ្ងៃទី២២ ខែឧសភា ឆ្នាំ២០២២ ថា ការបោះឆ្នោតនៅថ្ងៃទី៥ ខែមិថុនា ឆ្នាំ២០២២ នេះ គឺជាឧក្រិដ្ឋកម្មប្រជាធិបតេយ្យនៅកម្ពុជា ព្រោះថាគណបក្សប្រជាជនកម្ពុជា និងលោក ហ៊ុន សែន ត្រូវការតែរូបភាពឃោសនា និងវត្តមានពលរដ្ឋចូលរួមបោះឆ្នោត ដើម្បីបំភ្លៃប្រាប់សហគមន៍អន្តរជាតិអំពីរបស់ដែលគេហៅថាសេរីភាព ប្រជាធិបតេយ្យប៉ុណ្ណោះ។
ប្រភពដដែលអះអាងថា ការបោះឆ្នោតនេះ គឺជាព្រឹត្តិការណ៍មួយដែលគណបក្សកាន់អំណាចបានរៀបចំ និងចាត់ចែងទាំងស្រុងដើម្បីប្លន់យកអំណាចនៅមូលដ្ឋាន ដោយទាញគណបក្សផ្សេងៗទៀតឱ្យចូលរួមកំដរ និងបង្កើតជាទស្សនីយភាពបោះឆ្នោតគគ្រឹកគគ្រេងមួយក្រោមរូបភាពប្រជាធិបតេយ្យ ប៉ុន្តែខ្លឹមសារពិត គឺជាការប្លន់ប្រព័ន្ធបោះឆ្នោតទាំងស្រុង។
កាលពីថ្ងៃទី២០ ខែឧសភា ឆ្នាំ២០២២ កន្លងទៅ សហភាពអឺរ៉ុបបានអះអាងថា ខ្លួនមិនបានស្នើសុំឱ្យមានបេសកកម្មសង្កេតការណ៍បោះឆ្នោតសម្រាប់ដំណើរការបោះឆ្នោតនាពេលខាងមុខនេះទេ ប៉ុន្តែសហគមន៍អឺរ៉ុបទាមទារឱ្យរដ្ឋាភិបាលកម្ពុជាដោះលែងមេដឹកនាំបក្សប្រឆាំង លោក កឹម សុខា និងបើកឱ្យមានបក្សប្រឆាំងដែលគួរឱ្យទុកចិត្តបាន ដើម្បីចូលរួមការបោះឆ្នោតដែលអាចធានានូវការបោះឆ្នោតមួយដែលមានសេរី ត្រឹមត្រូវ និងយុត្តិធម៌ពិតប្រាកដ។
កម្ពុជាបានអនុវត្តការបោះឆ្នោតអសកល ឬបោះឆ្នោតក្រុមប្រឹក្សាឃុំ-សង្កាត់មានចំនួន ៤អាណត្តិរួចមកហើយ ចាប់តាំងពីឆ្នាំ២០០២ ប៉ុន្តែរាល់អាណត្តិក្រោយការបោះឆ្នោត ត្រូវគេរកឃើញថា គណបក្សកាន់អំណាចបានលួចបន្លំសន្លឹកឆ្នោត ទិញទឹកចិត្តអង្គបោះឆ្នោត និងមានការគំរាមកំហែងពលរដ្ឋឲ្យបោះឆ្នោតគាំទ្រខ្លួនរហូតមក។
គណៈកម្មាធិការជាតិរៀបចំការបោះឆ្នោត បានចេញសេចក្ដីប្រកាសព័ត៌មានកាលពីថ្ងៃទី៣០ ខែឧសភា ឆ្នាំ២០២២ ថា យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ នេះ បានប្រព្រឹត្តទៅក្នុងបរិយាកាសមានសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងគ្មានការគំរាមកំហែងអ្វីឡើយ៕