 កំពុងធ្វើការងារនៅក្រោមក្របខ័ណ្ឌជំនួយអភិវឌ្ឍន៍របស់អង្គការសហប្រជាជាតិសម្រាប់កម្ពុជា ផ្ដោតជាសំខាន់ទៅលើការអប់រំវិទ្យាសាស្ត្រ ដើម្បីជាមធ្យោបាយឆ្ពោះទៅសម្រេចបាននូវរបៀបវារៈនៃការអភិវឌ្ឍដ៏ត្រឹមត្រូវមួយប្រកបដោយចីរភាពនៅឆ្នាំ២០៣០ ខាងមុខ។){kind=link}
រដ្ឋាភិបាលកម្ពុជា លោក ហ៊ុន សែន អះអាងថា អង្គការយូណេស្កូ (UNESCO) កំពុងធ្វើការងារនៅក្រោមក្របខ័ណ្ឌជំនួយអភិវឌ្ឍន៍របស់អង្គការសហប្រជាជាតិសម្រាប់កម្ពុជា ផ្ដោតជាសំខាន់ទៅលើការអប់រំវិទ្យាសាស្ត្រ ដើម្បីជាមធ្យោបាយឆ្ពោះទៅសម្រេចបាននូវរបៀបវារៈនៃការអភិវឌ្ឍដ៏ត្រឹមត្រូវមួយប្រកបដោយចីរភាពនៅឆ្នាំ២០៣០ ខាងមុខ។
លោកនាយករដ្ឋមន្ត្រី ហ៊ុន សែន បានលើកឡើងលើទំព័រហ្វេសប៊ុករបស់លោកកាលពីថ្ងៃទី៣ ខែកក្កដា ឆ្នាំ២០២២ នេះ ដោយអបអរសាទរខួបលើកទី៧១ឆ្នាំដែលកម្ពុជាចូលជាសមាជិករបស់អង្គការយូណេស្កូ (UNESCO) កាលពីពេលកន្លងទៅថា វាគឺជាឧបករណ៍មួយដែលអាចឱ្យកម្ពុជាដាក់បញ្ចូលនូវទ្រព្យសម្បត្តិជាតិរបស់ខ្លួនមួយចំនួនទៅក្នុងបញ្ជីបេតិកភណ្ឌពិភពលោក ដែលអាចបញ្ចៀសនូវការរំលោភបំពានពីប្រទេសជិតខាងទៅថ្ងៃអនាគត ដូចជាប្រាសាទព្រះវិហារ ជាដើម។
លោក ហ៊ុន សែន អះអាងថា អង្គការយូណេស្កូគឺជាផ្នែកមួយរបស់អង្គការសហប្រជាជាតិ ធ្វើការផ្ដោតសំខាន់ទៅលើការអប់រំវិទ្យាសាស្ត្រក្នុងការរក្សានូវសន្តិភាព និងសន្តិសុខនៅក្នុងពិភពលោក ដោយលើកកម្ពស់កិច្ចសហប្រតិបត្តិការក្នុងចំណោមប្រជាជាតិនានាតាមរយៈនៃការអប់រំ វិទ្យាសាស្ត្រ វប្បធម៌ និងទំនាក់ទំនង ជាដើម។
ការអះអាងនេះ ធ្វើឡើងដើម្បីអបអរសាទរដែលកម្ពុជាបានចូលជាសមាជិករបស់អង្គការយូណេស្កូ អស់រយៈពេល ៧១ឆ្នាំ និងដាក់បញ្ចូលទ្រព្យសម្បត្តិជាតិកម្ពុជាជាបន្តបន្ទាប់នាពេលកន្លងមកនេះ។
កម្ពុជាបានចូលជាសមាជិកអង្គការយូណេស្កូ (UNESCO) កាលថ្ងៃទី០៣ ខែកក្កដា ឆ្នាំ១៩៥១ និងចូលជាសមាជិកគណៈកម្មាធិការបេតិកភណ្ឌពិភពលោកនៅឆ្នាំ២០០៩ ផងដែរ ក្នុងនោះទ្រព្យសម្បត្តិកម្ពុជាមួយចំនួនក៏ត្រូវបានចុះបញ្ជីចូលទៅក្នុងបេតិកភណ្ឌពិភពលោកជាបន្តបន្ទាប់ ដូចជាប្រាសាទអង្គរ ត្រូវបានដាក់ជាសម្បត្តិបេតិកភណ្ឌពិភពលោកនៅឆ្នាំ១៩៩២ ប្រាសាទព្រះវិហារនៅឆ្នាំ២០០៨ និងតំបន់ប្រាសាទសំបូរព្រៃគុក នៅឆ្នាំ២០១៧ ជាដើម។
ដោយឡែកសម្បត្តិវប្បធម៌អរូបិយរបស់កម្ពុជាចំនួន ៥ ទៀត ក៏ត្រូវបានដាក់បញ្ចូលក្នុងបញ្ជីបេតិកភណ្ឌយូណេស្កូផងដែរ រួមមានល្ខោនខោលដាក់បញ្ចូលទៅក្នុងបញ្ជីបេតិកភណ្ឌពិភពលោកនៅឆ្នាំ២០១៨ ចាប៉ីដងវែងនៅឆ្នាំ២០១៦ ល្បែងទាញព្រ័ត្រនៅឆ្នាំ២០១៥ របាំព្រះរាជទ្រព្យនៅឆ្នាំ២០០៨ និងល្ខោនស្រមោលស្បែកធំនៅឆ្នាំ២០០៨ ប៉ុន្តែក្បាច់គុនល្បុក្កតោ អង្គការយូណេស្កូកំពុងពិចារណាដើម្បីដាក់បញ្ចូលក្នុងបញ្ជីបេតិកភណ្ឌពិភពលោកអរូបិយផងដែរ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានអះអាងកាលពីថ្ងៃទី២ ខែកក្កដា ឆ្នាំ២០២២ ថា រយៈពេលពីរសប្តាហ៍ដើមខែកក្កដា មានថ្ងៃខួបព្រឹត្តិការណ៍សំខាន់ៗមួយចំនួននៅកម្ពុជាដែលគួរឲ្យចាប់អារម្មណ៍នោះ គឺនៅថ្ងៃទី៣ ខែកក្កដា ឆ្នាំ១៩៥១ កម្ពុជាបានចូលជាសមាជិកអង្គការយូណេស្កូ។ ចំណែកថ្ងៃទី៥ និងទី៦ ខែកក្កដា ឆ្នាំ១៩៩៧ គឺជាថ្ងៃរដ្ឋប្រហារបង្ហូរឈាមដែលបង្កឡើងដោយបក្សកាន់អំណាចបច្ចុប្បន្នក្រោមការដឹកនាំរបស់លោក ហ៊ុន សែន ដែលបានបង្ក្រាបលើកងទ័ពរាជានិយមដែលធ្វើឱ្យមានមនុស្សស្លាប់យ៉ាងអយុត្តិធម៌។
ដោយឡែកនៅថ្ងៃទី១០ ខែកក្កដា ឆ្នាំ២០១៦ គឺជាថ្ងៃដែលអ្នកស្រាវជ្រាវការអភិវឌ្ឍសង្គម បណ្ឌិត កែម ឡី ត្រូវបានគេបាញ់សម្លាប់ទាំងកណ្តាលថ្ងៃនៅទីក្រុងភ្នំពេញ ដែលគេចាត់ទុកថាជាឃាតកម្មក្រៅប្រព័ន្ធច្បាប់ ហើយក៏ជាឃាតកម្មដូចអ្នកដែលត្រូវគេបាញ់សម្លាប់មុនៗដែរ ដូចជាលោក ឈុត វុទ្ធី លោក ជា វិជ្ជា ព្រះភិក្ខុ សំ ប៊ុនធឿន និងនាដការីរបាំព្រះរាជទ្រព្យ អ្នកនាង ពិសិដ្ឋ ពីលិកា ជាដើម ដែលរដ្ឋាភិបាលកម្ពុជាមិនអាចរកមុខឃាតកពិតយកមកផ្ដន្ទាទោសរហូតដល់សព្វថ្ងៃនេះ។
ទាក់ទិននឹងបញ្ហានេះ កាលពីចុងខែតុលា ឆ្នាំ២០០៩ លោក ហ៊ុន សែន ធ្លាប់បានអះអាងថា ការដែលកម្ពុជាបានចូលជាសមាជិកគណៈកម្មាធិការបេតិកភណ្ឌពិភពលោក គឺជាមោទកភាពយ៉ាងធំធេងរបស់ខ្លួន ហើយក៏នឹងធ្វើឲ្យកេរ្តិ៍ឈ្មោះ និងកិត្យានុភាពរបស់កម្ពុជាកាន់តែលេចធ្លោខ្ពស់ត្រដែតលើឆាកអន្តរជាតិផងដែរ៕