ប្រធានាធិបតីប្រទេសស្រីលង្កា ដែលត្រូវពលរដ្ឋទាញទម្លាក់ពីអំណាច គឺលោក Gotabaya Rajapaksa បានរត់ទៅដល់ដែនកោះម៉ាល់ឌីវ ហើយកាលពីរសៀលថ្ងៃទី១២ ខែកក្កដា តាមជើងយន្តហោះរបស់កងទ័ពស្រីលង្កា។
កាលពីយប់ថ្ងៃច័ន្ទ ទី១២ កក្កដា លោក Gotabaya Rajapaksa និងសហការី គ្រួសាររបស់គាត់ជាង ១០នាក់ បានរត់ភៀសខ្លួនតាមជើងយន្តហោះទៅកាន់ប្រទេសអារ៉ាប៊ីសាអូឌីត តែត្រូវបានបុគ្គលិកយន្តហោះ និងប៉ូលិសអន្តោប្រវេសន៍ឃារឃាំងលោកមិនឲ្យឡើងយន្តហោះនោះឡើយ ហើយក្រោយមក លោកបានភៀសខ្លួនចេញពីព្រលានយន្តហោះនោះតាមរថយន្តយោធា។
មន្ត្រីអាកាសយានដ្ឋានមួយរូបបានឲ្យដឹងថា លោក Gotabaya Rajapaksa បានសំដៅទៅកាន់មូលដ្ឋានទ័ពជើងទឹកមួយកន្លែងនៅជាយក្រុងកូឡុំបូ ហើយក្រោយមក លោកនិងគ្រួសារ រួមទាំងអង្គរក្សពីរនាក់បានឡើងជិះយន្តហោះយោធាមួយគ្រឿងទៅកាន់កោះម៉ាល់ឌីវនៃមហាសមុទ្រឥណ្ឌា បន្ទាប់ពីឥណ្ឌា មិនឲ្យយន្តហោះនោះចុះចត។
តែយ៉ាងនេះក្ដី មន្ត្រីកោះម៉ាល់ឌីវម្នាក់បានប្រាប់សារព័ត៌មាន BBC ថា លោក Gotabaya និងគ្រួសារមិនទាន់ឃើញទៅដល់ដែនកោះនេះនៅឡើយទេ។
តាមសារព័ត៌មានដដែលនេះឲ្យដឹងថា លោក Gotabaya និងគ្រួសាររបស់លោកត្រូវចាកចេញទៅប្រទេសអារ៉ាប៊ីសាអូឌីត ឬក៏ប្រទេសអារ៉ាប់អ៊ីមេរ៉េត ប៉ុន្តែគាត់ពុំអាចឡើងជិះយន្តហោះបាននោះទេ គឺគាត់បានខកជើងយន្តហោះរហូតដល់ ៤ដង ដោយសារតែសន្តិសុខ និងបុគ្គលិកយន្តហោះមិនអនុញ្ញាតឲ្យគាត់ឡើងជិះ។
បើតាមដំណឹងមកថា លោក Gotabaya បានព្យាយាមសុំទិដ្ឋាការពីស្ថានទូតសហរដ្ឋអាមេរិកដែរ ពីព្រោះបុរសរូបនេះ និងគ្រួសាររបស់គាត់ធ្លាប់រស់នៅលើទឹកដីសហរដ្ឋអាមេរិក ប៉ុន្តែស្ថានទូតមហាអំណាចមួយនេះបានបដិសេធក្រោយពីក្រសួងការបរទេសអាមេរិក មិនបើកផ្លូវឲ្យគ្រួសារនេះជ្រកកោននោះឡើយ។
លោក Gotabaya ធ្លាប់រស់នៅសហរដ្ឋអាមេរិកជាច្រើនឆ្នាំជាមួយនឹងគ្រួសាររបស់គាត់ ប៉ុន្តែគាត់បានបោះបង់សញ្ជាតិអាមេរិកនៅពេលដែលគាត់ឡើងកាន់តំណែងជារដ្ឋមន្ត្រីការពារជាតិ និងឈរឈ្មោះជាបេក្ខជនប្រធានាធិបតីស្រីលង្កា កាលពីឆ្នាំ២០១៩។
មន្ត្រីទូតអាមេរិកបានឲ្យអ្នកសារព័ត៌មានដឹងថា ដោយសារតែបុរសរូបនេះបោះបង់សញ្ជាតិអាមេរិក ទើបពុំអាចទទួលបានទិដ្ឋាការចូលទឹកដីអាមេរិក ហើយមួយទៀត រដ្ឋាភិបាលអាមេរិកមិនស្វាគមន៍ជនទាំងឡាយណាដែលត្រូវចោទថារំលោភសិទ្ធិមនុស្សធ្ងន់ធ្ងរនោះទេ។
ដោយឡែកបងប្រុសរបស់គាត់ឈ្មោះ Mahinda Rajapaksa បើតាមដំណឹង គឺបុរសរូបនេះដែលជាអ្នកកសាងសន្តតិវង្សផ្ដាច់ការនៅលើទឹកដីស្រីលង្កា កំពុងលាក់ខ្លួននៅក្នុងបន្ទាយកងទ័ព។
លោក Mahinda ត្រូវបានប្រជាជនដេញឲ្យធ្លាក់ពីអំណាចជានាយករដ្ឋមន្ត្រីកាលពីខែឧសភា។ បុរសរូបនេះបាននាំគ្រួសារប្រពន្ធកូន និងអង្គរក្សរត់ទៅរស់នៅក្នុងបន្ទាយកងទ័ពជាយក្រុងកូឡុំបូ។ ការពិត លោក Mahinda Rajapaksa ក៏បានព្យាយាមទៅរស់នៅក្រៅប្រទេសផងដែរ តែមកដល់ពេលនេះ ពុំដឹងថាគាត់កំពុងស្ថិតនៅក្នុងបន្ទាយកងទ័ព ឬក៏នៅទីណានោះទេ។
លោក Mahinda បានប្រកាសចុះចេញពីអំណាចជានាយករដ្ឋមន្ត្រីកាលពីថ្ងៃទី៩ ឧសភា នៅពេលដែលបាតុករឡោមព័ទ្ធភូមិគ្រឹះរបស់គាត់ ប៉ុន្តែនៅពេលនោះ លោក Mahinda rajapaksa បាននាំប្រពន្ធកូនរត់ចូលក្នុងបន្ទាយបាត់ទៅហើយ។
បើនិយាយអំពីអំណាចសន្តតិវង្សនោះវិញ គឺលោក Mahinda Rajapaksa ជាអ្នកកសាងអំណាចផ្ដាច់ការនៅស្រីលង្កា។ លោក Mahinda បានកាន់អំណាចទាំងនាយករដ្ឋមន្ត្រី និងទាំងប្រធានាធិបតីមានរយៈពេលជាង ២០ឆ្នាំ។ នៅចុងក្រោយបំផុត គឺនៅពេលដែលប្អូនប្រុសរបស់លោកបានក្លាយជាប្រធានាធិបតី ពេលនោះលោក Mahinda បានតោងអំណាចជានាយករដ្ឋមន្ត្រីថែមទៀត។ បងប្អូនរបស់លោកទាំងអស់សុទ្ធតែកាន់អំណាចធំៗនៃស្ថាប័នរដ្ឋ ហើយអ្នកខ្លះមានតំណែងជារដ្ឋមន្ត្រីទៀតផង។
ទោះបីជាត្រកូលនេះមានគុណសម្បត្តិក្នុងការបញ្ចប់សង្គ្រាមស៊ីវិលក្ដីកាលពីឆ្នាំ២០០៩ តែត្រកូលមួយនេះ និងបក្សពួករបស់គាត់កើបថវិការដ្ឋរាប់រយលានដុល្លារយកមកធ្វើមានធ្វើបាននៅក្នុងបក្សពួករបស់ខ្លួន។ នៅក្នុងរជ្ជកាលរបស់លោកជាង ២០ឆ្នាំមកនេះ គឺគ្រួសារនេះមានភាពជិតស្និទ្ធស្នាលបំផុតជាមួយនឹងប្រទេសចិន។
ដោយសារតែមានភាពស្និទ្ធស្នាលនេះហើយ ទើបចិនទម្លាក់លុយកម្ចីរាប់ពាន់លានដុល្លារមកឲ្យប្រទេសស្រីលង្កា។ ប្រាក់កម្ចីរបស់ចិន គិតមកដល់ពេលនេះជាង ៣៥ពាន់លានដុល្លារ ដែលនាំឲ្យស្រីលង្កា ធ្លាក់ក្នុងបំណុលបរទេសសរុប ៥១ពាន់លានដុល្លារ។
ប្រាក់កម្ចីរបស់ចិន គឺគ្មានលក្ខខណ្ឌអ្វីនោះទេក្នុងការទប់ស្កាត់មិនឲ្យប្រព្រឹត្តអំពើពុករលួយ។ ទីបំផុត គ្រួសាររបស់លោក Rajapaksa និងមន្ត្រីជិតស្និទ្ធបានកិបកេងប្រាក់កម្ចីរាប់រយលានដុល្លារធ្វើមានធ្វើបាន គឺទ្រព្យសម្បត្តិមហាសាល នៅខណៈដែលប្រជាជននៅតែក្រីក្រ។
ចលនារបស់ប្រជាជនរយៈពេល ៥ខែចុងក្រោយនេះ គឺមានផែនការបញ្ចប់អំណាចសន្តតិវង្សរបស់ Rajapaksa ហើយរៀបចំប្រព័ន្ធដឹកនាំរដ្ឋថ្មីឡើងវិញ។
ឥឡូវនេះ ត្រកូល Rajapaksa អស់អំណាចរលីងហើយនៅលើទឹកដីស្រីលង្កា។ សភារបស់ប្រទេសនេះនឹងរៀបចំរដ្ឋាភិបាលឯកភាពជាតិដែលមានអាយុកាលត្រឹមតែ ៦ ទៅ ៨ខែប៉ុណ្ណោះ នឹងត្រូវបោះឆ្នោតប្រធានាធិបតី និងសភាឡើងវិញ។
ប៉ុន្តែសំណួរសួរថា តើប្រាក់កម្ចីពាន់លានដុល្លាររបស់ប្រទេសចិន ដែលត្រូវគេចោទថាគ្រួសារនៃត្រកូល Rajapaksa និងបក្សពួកកិបកេងរាប់រយលានដុល្លារនោះ តើរដ្ឋាភិបាលថ្មីដែលគ្មានត្រកូល Rajapaksa នឹងរៀបចំទូទាត់បង្វិលសងដូចម្ដេច បើអ្នកខ្ចីប្រាក់រត់ចោលប្រទេសបាត់ទៅហើយនោះ៕