ប្រធានាធិបតីនៃប្រទេសស្រីលង្កា ដែលប្រជាជនរបស់ប្រទេសនេះធ្វើបាតុកម្មដោយហិង្សាដេញទម្លាក់ពីអំណាច គឺលោក Gotabaya Rajapaksa ត្រូវបានរាយការណ៍ថា លោកនឹងមកដល់ប្រទេសថៃ នៅថ្ងៃព្រហស្បតិ៍ក្នុងសប្ដាហ៍នេះ ដែលជាប្រទេសមួយមានព្រំដែនជាប់នឹងកម្ពុជា។
ទីភ្នាក់ងារសារព័ត៌មាន Reuters បានចុះផ្សាយថា លោក Gotabaya ដែលនឹងមកដល់ប្រទេសថៃ នៅថ្ងៃព្រហស្បតិ៍នេះ លោកនឹងស្វែងរកប្រទេសទី៣ នៅក្នុងប្រទេសណាមួយក្នុងតំបន់អាស៊ីអាគ្នេយ៍ ដើម្បីសុំសិទ្ធិជ្រកកោនជាផ្លូវការ។
រាជាណាចក្រថៃ មានព្រំដែនជាប់ប្រទេសចំនួន៣ គឺកម្ពុជា ឡាវ និងភូមា។ គេពុំដឹងថា រដ្ឋាភិបាលរបស់លោក ប្រាយុទ្ធ ចាន់អូចា ព្រមផ្ដល់សិទ្ធិជ្រកកោនឲ្យអតីតមេដឹកនាំស្រីលង្កា ដែលប្រជាជនទាញទម្លាក់ពីអំណាច គឺយល់ព្រមឲ្យលោក Gotabaya ជ្រកកោនក្នុងឋានៈជាជនភៀសខ្លួននយោបាយដែរឬក៏អត់នោះទេ។
ចំពោះលោក ប្រាយុទ្ធ ខ្លួនលោកផ្ទាល់ ក៏មិនអាចតោងអំណាចបានយូរដែរ។ កាលពីពេលថ្មីៗនេះ លទ្ធផលនៃការស្ទង់មតិមួយបានបង្ហាញថា ប្រជាជនថៃ ជិត ២ភាគ៣ នៅក្នុងប្រទេសនេះ ចង់ឱ្យលោក ប្រាយុទ្ធ ចាន់អូចា លាលែងពីតំណែងនាយករដ្ឋមន្ត្រីថៃ នៅក្នុងខែសីហា នេះ ព្រោះតែបុរសនេះបានក្លាយជាប្រធានបទនៃការយកមកបើកធ្វើវេទិកាសាធារណៈ ថាតើមេដឹកនាំរដ្ឋប្រហារយោធាឆ្នាំ២០១៤ រូបនេះគួរកាន់អំណាចដល់ពេលណាទៀត។
ការស្ទង់មតិថ្មីមួយដោយសាកលវិទ្យាល័យថៃ NIDA ដែលមានការចូលរួមពីពលរដ្ឋ ១៣១២នាក់ ធ្វើឡើងពីថ្ងៃទី២ ដល់ថ្ងៃទី៤ ខែសីហា រកឃើញថា សំឡេង ៦៤% ចង់ឱ្យលោក ប្រាយុទ្ធ ចុះចេញពីតំណែងនៅថ្ងៃទី២៣ ខែសីហា គឺគម្រប់ ៨ឆ្នាំគត់បន្ទាប់ពីបុរសម្នាក់នេះបានឡើងជានាយករដ្ឋមន្ត្រីក្នុងរដ្ឋាភិបាលយោធាតាមរយៈរដ្ឋប្រហារឆ្នាំ២០១៤។
ចំពោះសំណុំរឿងរបស់លោក ប្រាយុទ្ធ នេះ ក្រុមប្រឆាំងនៅប្រទេសថៃ ក៏មានផែនការដាក់ញត្តិទៅតុលាការធម្មនុញ្ញ ដើម្បីឱ្យមានការសម្រេចថា តើពេលវេលាជានាយករដ្ឋមន្ត្រីរបស់លោក ប្រាយុទ្ធ កាលពីអំឡុងរដ្ឋាភិបាលយោធា គួរឬមិនគួររាប់បញ្ចូលក្នុងរយៈពេលនៃអាណត្តិកាន់អំណាចនៅក្នុងរដ្ឋាភិបាលជាប់ឆ្នោត។
នៅក្រោមរដ្ឋធម្មនុញ្ញថៃ ដែលកំណត់ថា អ្នកនយោបាយម្នាក់អាចកាន់តំណែងនាយករដ្ឋមន្ត្រីបានរយៈពេលសរុប ៨ឆ្នាំប៉ុណ្ណោះ។
ចំពោះការមកដល់របស់អតីតប្រធានាធិបតីស្រីលង្កា លោក Gotabaya នៅប្រទេសថៃ ដើម្បីស្វែងរកសិទ្ធិជ្រកកោននយោបាយ ទំនងរដ្ឋាភិបាលលោក ប្រាយុទ្ធ ពិបាកនឹងធ្វើការផ្ដល់សិទ្ធិ ព្រោះលោក ប្រាយុទ្ធ កំពុងផ្ទុករឿងអាស្រូវនយោបាយធ្ងន់ធ្ងរផងដែរ។ ការពិត លោក ប្រាយុទ្ធ ក៏ត្រូវបានបាតុករថៃ រាប់ម៉ឺននាក់បានធ្វើបាតុកម្មបង្ខំឲ្យលោកចុះចេញពីតំណែងផងដែរ។ បើដូចនេះ គេអាចគិតទៅរកប្រទេសចំនួនបីដែលជាប់នឹងថៃ គឺប្រសិនបើលោក Gotabaya ត្រូវរដ្ឋាភិបាលថៃ មិនផ្ដល់សិទ្ធិជ្រកកោននយោបាយ។
ប្រទេសដែលអាចឱ្យលោក Gotabaya ទទួលបានសិទ្ធិជ្រកកោននយោបាយ ហើយអាទិភាពជាងគេ គឺប្រទេសភូមា ព្រោះប្រទេសនេះកំពុងដឹកនាំដោយរបបរដ្ឋប្រហារដែលបានប្លន់អំណាចរដ្ឋាភិបាលប្រជាធិបតេយ្យកាលពីថ្ងៃទី១ ខែកុម្ភៈ ឆ្នាំ២០២១។ ប្រទេសអាទិភាពទី២ គឺរាជាណាចក្រកម្ពុជា។ មេដឹកនាំប្រទេសនេះពុំសូវខ្វល់ច្រើនទេអំពីការបាក់មុខមាត់នៅលើឆាកអន្តរជាតិ គឺធ្វើម្ដេចឲ្យតែបានបន្តក្រាញអំណាច ទោះជាចោទថាជាប្រទេសពោរពេញដោយការរំលោភសិទ្ធិមនុស្ស ពុករលួយ និងហិង្សានយោបាយក៏ដោយ។
កម្ពុជាត្រូវបានអាមេរិកចោទថាជាប្រភពនៃការជួញដូរមនុស្ស និងលាងលុយកង្វក់។ ចំពោះប្រទេសឡាវ វិញ ក៏អាចផ្ដល់សិទ្ធិជ្រកកោនឲ្យមេដឹកនាំបែបលោក Gotabaya ដែរ តែភាគតិច ព្រោះប្រទេសនេះប្រកាន់នូវរបបកុម្មុយនីស្ត។ និយាយទៅ ប្រទេសបីនេះ គឺភូមា កម្ពុជា និងឡាវ អាចឱ្យលោក Gotabaya ជ្រកកោន ប្រសិនបើចិនអន្តរាគមន៍ ព្រោះប្រទេសទាំងបីនេះត្រូវគេគិតថាស្ថិតនៅក្រោមឥទ្ធិពលចិនយ៉ាងខ្លាំង។ ប្រទេសបីនេះ គឺជាកូនបំណុលចិន ពាន់លានដុល្លារដូចគ្នា។
លោក Gotabaya បានរត់ចេញពីប្រទេសស្រីលង្កា ភ្លាមៗអំឡុងបាតុកររាប់ម៉ឺននាក់ឡោមព័ទ្ធភូមិគ្រឹះរបស់លោក និងវិមានប្រធានាធិបតីជាទីស្នាក់ការដែលលោកធ្វើការ។ លោកបានរត់មកដល់ប្រទេសសិង្ហបុរី កាលពីថ្ងៃទី១៤ ខែកក្កដា ក្រោយពីលោកមិនទទួលបានសិទ្ធិជ្រកកោននៅដែនកោះម៉ាល់ឌីវ។
នៅថ្ងៃទី១១ សីហា រដ្ឋាភិបាលសិង្ហបុរី ត្រូវបញ្ចប់ទិដ្ឋាការរបស់លោកជាផ្លូវការ គឺមានន័យថា ប្រទេសនេះលែងឱ្យលោក Gotabaya បន្តស្នាក់នៅទៀតហើយ។ រឿងអាស្រូវរបស់លោក Gotabaya គឺជាសំណុំរឿងនៃត្រកូល Rajapaksa ដែលទាំងបងប្រុសរបស់លោក គឺលោក មាហិនដា ក៏ត្រូវបានប្រជាជនស្រីលង្កា ដេញចេញពីអំណាចដែរ។ លោក មាហិនដា ត្រូវបានគេដឹងថាកំពុងលាក់ខ្លួនក្នុងបន្ទាយកងទ័ពនៅក្នុងប្រទេសស្រីលង្កា។
Rajapaksa ជាគ្រួសារមួយកាន់អំណាចនៅស្រីលង្កា ជិត ២០ឆ្នាំ។ គ្រួសារនេះត្រូវបានបក្សប្រឆាំងចោទថាជាអ្នកបង្ករឿងអយុត្តិធម៌សង្គម ជាអ្នកធ្វើឱ្យមានអំពើពុករលួយក្នុងសង្គម និងបក្សពួកនិយម។ Rajapaksa ជាគ្រួសារដែលជាអ្នកខ្ចីបុលចិនរាប់ពាន់លានដុល្លារ ជាគ្រួសារមានភាពជិតស្និទ្ធជាខ្លាំងនឹងមេដឹកនាំចិន។
អំឡុងនៃការកាន់អំណាចរបស់គ្រួសារនេះជិត ២០ឆ្នាំ បំណុលចិនគរដូចភ្នំ គឺមាន ៣ម៉ឺន ៥ពាន់លានដុល្លារអាមេរិក ខណៈប្រទេសនេះធ្លាក់ក្នុងបំណុលបរទេសសរុប ៥ម៉ឺន ១ពាន់លានដុល្លារ។
ឥឡូវនេះ គ្រួសារ Rajapaksa ត្រូវបានតុលាការកំពូលហាមឃាត់ការចាកចេញពីប្រទេស ហើយចំណែកលោក Gotabaya ដែលបានរត់ចេញពីប្រទេសកាលពីថ្ងៃទី១២ កក្កដា ត្រូវបានតុលាការកំពូលចេញដីកាកោះហៅឱ្យចូលខ្លួនមកបំភ្លឺករណីការប្ដឹងរបស់ក្រុមបក្សប្រឆាំងពីបទគេចវេះការទទួលខុសត្រូវ នៅពេលដែលសេដ្ឋកិច្ចរបស់ប្រទេសស្រីលង្កា ក្រឡាប់ក្រោមបំណុលគរដូចភ្នំ។
បច្ចុប្បន្ន ប្រទេសស្រីលង្កា ដែលជាប្រទេសដ៏ក្រីក្រមួយនៅអាស៊ីអាគ្នេយ៍ កំពុងដឹកនាំដោយអ្នកនយោបាយមកពីបក្សប្រឆាំងកណ្ដាលនិយម គឺលោក Ranil Wickremesinghe ដែលត្រូវបានសភាបោះឆ្នោតឱ្យកាន់តំណែងប្រធានាធិបតីជំនួសលោក Gotabaya កាលពីថ្ងៃទី២០ កក្កដា។ ប្រទេសនេះនឹងឆ្លងកាត់ការបោះឆ្នោតប្រធានាធិបតីចេញពីសន្លឹកឆ្នោតរបស់ប្រជាជននៅឆ្នាំ២០២៤។ គេពុំដឹងថា ត្រកូល Rajapaksa មានឱកាសស្វែងរកអំណាចជាថ្មីម្ដងទៀត ឬក៏ត្រូវប្រឈមមុខនឹងការកាត់ទោសពីបទប្រព្រឹត្តអំពើពុករលួយ និងឧក្រិដ្ឋកម្មសង្គមឬដូចម្ដេច៕