នៅទីបំផុត លោក Ranil Wickremesinghe បានឡើងកាន់តំណែងជាប្រធានាធិបតីដូចបំណងរបស់លោក បន្ទាប់ពីលោកទទួលបានការចាត់តាំងឲ្យកាន់តំណែងជាប្រធានាធិបតីស្ដីទី ដោយលោក Gotabaya Rajapaksa ដែលជាប្រធានាធិបតីរត់ចោលប្រទេសដោយសារបាតុករដេញចេញពីតំណែង ករណីចោទថាជាមេដឹកនាំអសមត្ថភាពមកពីគ្រួសារពុករលួយបំផ្លាញជាតិ Rajapaksa។
យោងតាមលទ្ធផលនៃការបោះឆ្នោតនាថ្ងៃពុធ ទី២០ ខែកក្កដា នេះ ដែលចេញផ្សាយដោយក្រុមសមាជិកសភានៃប្រទេសស្រីលង្កា ជ្រើសរើសប្រធានាធិបតីថ្មីបានបង្ហាញថា លោក Ranil Wickremesinghe គឺជាអ្នកទទួលបានជ័យជម្នះ។ នេះបើតាមការចេញផ្សាយដោយបណ្ដាញផ្សាយព័ត៌មាន ABC News ចុះផ្សាយនៅថ្ងៃទី២០ កក្កដា នេះ។
ក្រោយការរាប់សន្លឹកឆ្នោតបានបញ្ចប់ទៅ លទ្ធផលបានបង្ហាញថា លោក Ranil Wickremesinghe ទទួលបានការគាំទ្រចំនួន ១៣៤សំឡេង ខណៈគូប្រជែងរបស់លោក គឺលោក Dullas Alahapperuma ដែលជាសមាជិកសភានៃគណបក្ស SLPP ទទួលបានការគាំទ្រ ៨២សំឡេង។
លោក Dullas Alahapperuma ក៏ជាសមាជិកសភាមកពីបក្សកាន់អំណាចរបស់លោក Gotabaya Rajapaksa ដែរ តែបុរសរូបនេះមិនមានទំនាក់ទំនងជិតស្និទ្ធនឹងគ្រួសារលោក Rajapaksa នោះទេ។ ចំណែកលោក Anura Kumara ដែលជាប្រធានគណបក្សឆ្វេងនិយម NPP ទទួលបានត្រឹម ៣សំឡេងប៉ុណ្ណោះ។
បេក្ខជនដែលឈរឈ្មោះបោះឆ្នោតនេះ មានតែបីរូបនេះប៉ុណ្ណោះ ខណៈប្រធានគណបក្សប្រឆាំងដ៏ធំជាងគេ គឺលោក Sajith Premadasa បានសម្រេចដកបេក្ខភាពរបស់ខ្លួនចេញវិញ។
ជ័យជម្នះរបស់លោក Wickremesinghe ទំនងនឹងធ្វើឲ្យមានបាតុកម្មជាបន្តបន្ទាប់ទៀត ព្រោះប្រជាជនភាគច្រើនមិនគាំទ្រប្រធានាធិបតីថ្មីនេះទេ។
ក្រុមបាតុករស្រីលង្កា ចាត់ទុកលោក Wickremesinghe ជាសម្ពន្ធមិត្តរបស់អតីតប្រធានាធិបតី Gotabaya Rajapaksa ដែលពួកគេបន្ទោសថា គឺជាអ្នកទទួលខុសត្រូវចំពោះការដែលធ្វើឱ្យប្រទេសអាស៊ីខាងត្បូងមួយនេះធ្លាក់ក្នុងវិបត្តិសេដ្ឋកិច្ចដ៏ធ្ងន់ធ្ងរបំផុត។
កាលពីថ្ងៃទី៩ កក្កដា នៅពេលបាតុកររាប់ម៉ឺននាក់សម្រុកចូលរដ្ឋធានីកូឡុំបូ ហើយបាតុករខ្លះសម្រុកចូលវិមានប្រធានាធិបតី និងភូមិគ្រឹះរបស់លោក Gotabaya គឺភូមិគ្រឹះរបស់ Wickremesinghe ក៏បាតុករបានចូលដុតបំផ្លាញចោលដែរ។ ទាំងលោក Gotabaya និងលោក Wickremesinghe បានរត់ចូលក្នុងបន្ទាយកងទ័ព ហើយពេលនោះលោក Wickremesinghe ក៏បានបោះពាក្យសម្ដីថា លោកក៏នឹងលាលែងពីតំណែងនាយករដ្ឋមន្ត្រីផងដែរ ខណៈលោកទើបចូលកាន់តំណែងបានតែ ២ខែប៉ុណ្ណោះ។
លោកត្រូវសភាបោះឆ្នោតគាំទ្រឱ្យឡើងជំនួសលោក Mahinda Rajapaksa ដែលជាបងប្រុសបង្កើតរបស់លោក Gotabaya ជាប្រធានាធិបតីរត់ចោលប្រទេស។
តើលោក Ranil Wickremesinghe ជានរណា?
លោក Ranil Wickremesinghe ធ្លាប់កាន់តំណែងជានាយករដ្ឋមន្ត្រីដល់ទៅ ៦លើក និងបានក្លាយជាប្រធានាធិបតីស្តីទីរយៈពេលមួយសប្ដាហ៍ចុងក្រោយនេះ គឺក្រោយពីលោក Gotabaya រត់ភៀសខ្លួនចេញពីប្រទេសទៅកាន់ប្រទេសសិង្ហបុរី ហើយលាលែងពីតំណែងតាមការទាមទាររបស់ក្រុមបាតុករស្រីលង្ការាប់ម៉ឺននាក់ ដែលបានចេញតវ៉ាតាមដងផ្លូវប្រឆាំងការដឹកនាំរបស់លោក។
លោកកើតនៅឆ្នាំ១៩៤៩ និងមានដើមកំណើតចេញពីគ្រួសារអ្នកនយោបាយ និងអ្នកជំនួញដ៏មានឥទ្ធិពលមួយនៅក្នុងប្រទេសស្រីលង្កា។ លោក Wickremesinghe មានវិជ្ជាជីវៈជាមេធាវី។
លោកបានឈានជើងចូលឆាកនយោបាយជាលើកដំបូងតាមរយៈការជាប់ឆ្នោតជាតំណាងរាស្ត្រនៅឆ្នាំ១៩៧៧ នៅពេលលោកមានអាយុ ៤៥ឆ្នាំ។
កាលពីអាយុ ២៩ឆ្នាំ លោក Ranil Wickremesinghe បានហក់ចូលកាន់តំណែងមួយទៅហើយ គឺរដ្ឋមន្ត្រីនៃគណៈរដ្ឋមន្ត្រី ដែលនៅពេលនោះឪពុកមារបស់លោក គឺលោក Junius Jayewardene ជាប្រធានាធិបតី គឺនៅឆ្នាំ១៩៧៨។
លោកបានឡើងតំណែងធំៗនៅក្នុងគណបក្សរួបរួមជាតិ UNP ជាបន្តបន្ទាប់ នៅក្រោមការដឹកនាំរបស់លោក Ranasinghe Pramadasa ជាប្រធានគណបក្សរួបរួមជាតិស្រីលង្កា។
លោក Wickremesinghe បានឡើងកាន់តំណែងជានាយករដ្ឋមន្ត្រីលើកដំបូងពីឆ្នាំ១៩៩៣ ជាឆ្នាំដែលលោក Pramadasa ត្រូវបានគេធ្វើឃាត។ នៅឆ្នាំ១៩៩៤ ដដែល លោកបានក្លាយជាមេដឹកនាំគណបក្សរួបរួមជាតិ UNP គឺលោកឡើងជំនួសលោក Gamini Dissanayake ដែលត្រូវបានធ្វើឃាតដោយសមាជិកក្រុមឧទ្ទាមខ្លាតាមិល។
លោក Wickremesinghe គឺជាអ្នកនយោបាយមានជំនាញខាងសេដ្ឋកិច្ច។ លោកបានជួយប្រទេសស្រីលង្កា ឲ្យចេញផុតពីវិបត្តិសេដ្ឋកិច្ចកាលពីក្នុងឆ្នាំ២០០១។
តែយ៉ាងណា ការឡើងកាន់តំណែងប្រធានាធិបតីជាផ្លូវការរបស់លោក Wickremesinghe មានរហូតដល់ឆ្នាំ២០២៤ គឺឆ្នាំត្រូវបោះឆ្នោតប្រធានាធិបតីថ្មីមួយអាណត្តិទៀត គេពុំដឹងថាមេដឹកនាំស្រីលង្កា រូបនេះនឹងអាចស្ដារសេដ្ឋកិច្ចស្រីលង្កា ឲ្យរស់ឡើងវិញបានដែរឬទេ។
ណាមួយទៀត លោកជាមុខសញ្ញាដែលប្រជាជនស្រីលង្កា មកពីក្រុមបក្សប្រឆាំង និងគ្រួសារក្រីក្រនៅតែតវ៉ាទាមទារឱ្យលោកចុះចេញពីតំណែង គឺតាំងពីលោកជាប្រធានាធិបតីស្ដីទី។ មកដល់ពេលនេះ ប្រជាជនមិនទាន់បំបែកការតវ៉ានៅឡើយទេ៕