អង្គការមិនមែនរដ្ឋាភិបាលជាង ១០០ស្ថាប័ន សម្ដែងការព្រួយបារម្ភចំពោះការធ្វើវិសោធនកម្មរដ្ឋធម្មនុញ្ញលើកទី១០ ដែលបានស្នើដោយលោក ហ៊ុន សែន ថាអាចប៉ះពាល់ដល់ស្ថិរភាពអំណាចរដ្ឋ អំណាចនីតិប្រតិបត្តិ និងការគោរពសិទ្ធិសេរីភាពរបស់ពលរដ្ឋខ្មែរ។
សេចក្ដីថ្លែងការណ៍ដែលចេញផ្សាយនាថ្ងៃទី២៧ ខែកក្កដា ឆ្នាំ២០២២ ដោយអង្គការមិនមែនរដ្ឋាភិបាល សហជីព សមាគម និងសហគមន៍ចំនួន ១០៤ស្ថាប័ន ក្នុងនោះសមាគមការពារសិទ្ធិមនុស្សអាដហុក មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ខុមហ្វ្រែល គណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និចហ្វិក) អង្គការសម្ព័ន្ធភាពការពារសិទ្ធិមនុស្សកម្ពុជា និងអង្គការតម្លាភាពកម្ពុជា ជាដើម។
បើតាមសេចក្ដីថ្លែងការណ៍ឱ្យដឹងថា ពួកគេចង់ឃើញកម្ពុជាមានរដ្ឋធម្មនុញ្ញរឹងមាំ ឆ្លុះបញ្ចាំងឆន្ទៈពលរដ្ឋខ្មែរដូចមានចែងក្នុងរដ្ឋធម្មនុញ្ញ និងចង់ឃើញការឯកភាពជាតិខាងនយោបាយរវាងគណបក្សនយោបាយ និងអ្នកនយោបាយទាំងអស់តែប៉ុណ្ណោះ។ ដូច្នេះ ការធ្វើវិសោធនកម្មនៅក្នុងកាលៈទេសៈនេះមិនបានឆ្លុះបញ្ចាំងពីឆន្ទៈរបស់ពលរដ្ឋខ្មែរ ដោយសារមិនមានការផ្សព្វផ្សាយ និងកំណត់នៅក្នុងគោលនយោបាយរបស់គណបក្សនយោបាយពេលឃោសនាបោះឆ្នោតកន្លងមក ដែលនាំឲ្យពលរដ្ឋខ្មែរមិនទាន់បានយល់ដឹងអំពីគំនិតផ្ដួចផ្ដើមនៃវិសោធនកម្មនេះដោយទូលំទូលាយនៅឡើយ។
ក្រុមនេះនិយាយថា ការកែរដ្ឋធម្មនុញ្ញលើកនេះក៏បានប៉ះពាល់ដល់ស្មារតីឯកភាព និងសាមគ្គីភាពជាតិ ដោយសារតែកាលៈទេសៈនេះមានការប្រេះឆាខាងផ្នែកនយោបាយនៅឡើយ។ ជាក់ស្ដែងមាត្រា៩២ បានហាមរដ្ឋសភាមិនឲ្យអនុម័តច្បាប់ដែលប៉ះពាល់ដល់ឯកភាពនយោបាយរបស់ប្រទេសជាតិនោះឡើយ។
ការចេញសេចក្ដីថ្លែងការណ៍របស់ក្រុមអង្គការសង្គមស៊ីវិលនេះ បន្ទាប់ពីរដ្ឋសភានឹងបើកសម័យប្រជុំពេញអង្គពិភាក្សាលើសេចក្ដីព្រាងវិសោធនកម្មមាត្រាមួយចំនួននៃរដ្ឋធម្មនុញ្ញ និងមាត្រាចំនួន២ នៃច្បាប់ធម្មនុញ្ញបន្ថែម នៅថ្ងៃព្រហស្បតិ៍ នេះ ដើម្បីបើកផ្លូវឱ្យលោក ហ៊ុន សែន កែរដ្ឋធម្មនុញ្ញតាមការស្នើសុំ។
ការធ្វើវិសោធនកម្មរដ្ឋធម្មនុញ្ញនេះ រដ្ឋមន្ត្រីក្រសួងយុត្តិធម៌ និងសមាជិកជាន់ខ្ពស់គណបក្សប្រជាជនកម្ពុជា លោក កើត រិទ្ធ បកស្រាយថា ការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនេះក្នុងគោលបំណងបំពេញសេចក្តីខ្វះចន្លោះនៃរដ្ឋធម្មនុញ្ញដើម ដើម្បីឱ្យស្ថាប័នកំពូលរបស់ជាតិដំណើរការទៅដោយរលូន ធានាស្ថិរភាពនយោបាយ និងការពារប្រយោជន៍ជាតិ៕