ម៉ាឡេស៊ី ជារាជាណាចក្រមួយនៅក្នុងតំបន់អាស៊ីអាគ្នេយ៍។ ប្រទេសនេះប្រកាន់របបសភានិយម។ ព្រះមហាក្សត្រ គឺជាប្រមុខរដ្ឋកំពូលរបស់ប្រទេស។ ព្រះអង្គមានតួនាទីជួយពន្លត់វិបត្តិនយោបាយ និងធានានិរន្តរភាពនៃរបបរាជានិយមអាស្រ័យធម្មនុញ្ញ។
រាជាណាចក្រនេះមានស្ថាប័នអំណាចសាធារណៈ ៣ធំៗ គឺអង្គនីតិប្រតិបត្តិ អង្គនីតិបញ្ញត្តិ និងតុលាការ។ អំណាចទាំង៣ នេះ ពុំអាចស្ថិតនៅក្រោមអំណាចរបស់ស្ថាប័នណាមួយឡើយ។ មានន័យថា មានតុល្យភាពនៃអំណាចរៀងៗខ្លួន គឺពុំមានអ្នកនយោបាយណា ឬក្រុមបក្សនយោបាយណាហ៊ានប្រើសិទ្ធិអំណាចលើស្ថាប័នរដ្ឋទាំងនេះឡើយ។
អ្នកនយោបាយកំពូលណាក៏ដោយក៏មានទោសដែរ ឲ្យតែរកឃើញកំហុស។ អ្នកនយោបាយពុំអាចយកស្ថាប័នរបស់ខ្លួនជាឈ្នាន់ដើម្បីក្រាញអំណាចឡើយ។ មានន័យថា គ្មានអ្នកនយោបាយណាមួយឡើងកាន់តំណែងបានដោយមិនឆ្លងកាត់ការបោះឆ្នោតមួយដែលប្រកបដោយភាពសេរី ត្រឹមត្រូវ និងយុត្តិធម៌ឡើយ។
លោក ណាជីប រ៉ាហ្សាក់ ជាអ្នកនយោបាយដែលបានកាន់តំណែងជានាយករដ្ឋមន្ត្រីបានរយៈពេល ១០ឆ្នាំ ពីឆ្នាំ២០០៩ ដល់ឆ្នាំ២០១៨។ នៅឆ្នាំ២០១៨ គឺជាឆ្នាំដែលបក្សរបស់លោក គឺបក្សជាតិបារីសាន់ ហៅកាត់ថា UMNO បានចាញ់ឆ្នោត។ បក្សប្រឆាំងជាអ្នកដឹកនាំរដ្ឋាភិបាលម្ដង។
នៅក្នុងឆ្នាំ២០១៦ និងឆ្នាំ២០១៧ មុនការបោះឆ្នោតសភានីតិកាលទី១៤ ចូលមកដល់ លោក ណាជីប ដែលសង្ឃឹមថាបក្សលោកនឹងឈ្នះឆ្នោត ហើយអាចការពារអំណាចរបស់លោក គឺពេលនោះលោកដែលអាងអំណាចជានាយករដ្ឋមន្ត្រី បានសម្រេចប្រជែងជាមួយនឹងអំណាចតុលាការ និងសភាយ៉ាងខ្លាំង។
អំឡុងពេលនោះ លោកត្រូវបានក្រុមប្រឆាំង និងអង្គភាពប្រឆាំងអំពើពុករលួយ រួមទាំងរដ្ឋអាជ្ញាផ្ដើមប្រមូលភស្តុតាងប្រឆាំងនឹងលោក និងគ្រួសារលោក ករណីសង្ស័យថាលោកបានបង្កើតមូលនិធិឯកជនមួយ ដើម្បីរៃអង្គាសប្រាក់ដើម្បីសប្បុរសធម៌ ដែលគេថាលោក ណាជីប ចាប់ផ្ដើមប្រើរូបមន្តនេះដូចប្រទេសមួយនៅក្នុងសមាគមអាស៊ាន ដើម្បីធ្វើនយោបាយប្រជាភិថុតិ។
ប្រទេសមួយក្នុងសមាគមអាស៊ាន គឺមេដឹកនាំប្រទេសនោះមានឥទ្ធិពលយ៉ាងខ្លាំងទៅលើស្ថាប័នរដ្ឋធំ២ គឺប្រព័ន្ធតុលាការ និងស្ថាប័នរដ្ឋសភា ហើយថែមទាំងលើស្ថាប័នប្រមុខរដ្ឋទៀតផង។
ដោយមើលឃើញថាមេដឹកនាំប្រទេសនោះអាចធ្វើបានដោយពុំមានការហៅទៅចោទប្រកាន់នៅចំពោះមុខសភា និងតុលាការ គឺលោក ណាជីប ក៏ចេះតែហ៊ានប្រើឥទ្ធិពលរបស់ខ្លួនលើស្ថាប័នរដ្ឋសភា និងតុលាការ ព្រោះខ្លួនជានាយករដ្ឋមន្ត្រី។
អំឡុងលោកមានរឿងអាស្រូវចោទថាបានកិបកេងទ្រព្យសម្បត្តិរដ្ឋ ដោយលួចផ្ទេរប្រាក់ចេញពីធនាគាររបស់រដ្ឋមកធនាគាររបស់អង្គការមួយដែលលោកបង្កើតឡើង នូវសាច់ប្រាក់សុទ្ធរាប់រយលានដុល្លារ គឺពេលនោះសភាមិនហ៊ានដកអំណាចលោកនោះទេ ព្រោះសមាជិកសភាបក្សរបស់លោកដែលមានសំឡេងភាគច្រើននៅក្នុងសភា គឺពួកគេខ្លាចលោកជាខ្លាំង។
ទីបំផុត លោក ណាជីប គេចវេះមិនទៅឆ្លើយក្នុងសភាទោះជាក្រុមសភាបក្សប្រឆាំងបានទាមទារយ៉ាងណាក៏ដោយ។ បន្ថែមលើសនេះ ក្រុមរដ្ឋអាជ្ញាក៏ទុកពេលឲ្យលោកដែរ។ ប៉ុន្តែនៅពេលបក្សរបស់លោកចាញ់ឆ្នោតនៅក្នុងការបោះឆ្នោតសភាឆ្នាំ២០១៨ គឺពេលនោះហើយលោក ណាជីប បានបាត់បង់អំណាចជានាយករដ្ឋមន្ត្រី ដែលនាំឲ្យរដ្ឋាភិបាលមកពីបក្សប្រឆាំងប្ដឹងលោកភ្លាមៗទៅតុលាការ ដោយចោទថាលោក ណាជីប និងគ្រួសាររបស់លោក លួចលុយរដ្ឋជាច្រើនរយលានដុល្លារទៅលាក់នៅក្នុងធនាគារឯកជនមួយរបស់ខ្លួន។
ការផ្ទុះរឿងអាស្រូវរបស់លោក ណាជីប ដោយសារតែផ្ដើមចេញពីការចុះផ្សាយរបស់កាសែតអាមេរិក The Wall Street Journal ដែលកាសែតនេះបានទទួលរបាយការណ៍មួយពីស្ថាប័នប៉ូលិសអាមេរិក FBI។
រឿងអាស្រូវនេះហើយដែលនាំឲ្យបក្ស UMNO របស់លោក ណាជីប ចាញ់ឆ្នោតនៅក្នុងការបោះឆ្នោតសភាឆ្នាំ២០១៨។ ក្រោយពីទទួលបានបណ្ដឹងពីរដ្ឋាភិបាលថ្មីរបស់អតីតនាយករដ្ឋមន្ត្រី មហាធា មហាមាដ ក្រុមរដ្ឋអាជ្ញា និងអង្គភាពប្រឆាំងអំពើពុករលួយក៏បានបញ្ជូនភស្តុតាងទៅតុលាការ ដោយផ្ដើមកោះហៅលោក ណាជីប ឡើងតុលាការ។ ភស្តុតាង គឺគេរកឃើញគ្រួសាររបស់លោកចាយប្រាក់ដុល្លារដូចប្រាក់ធ្លាក់ពីលើមេឃ គឺចូលផ្សារម្ដងៗ គឺចាយអស់ប្រាក់ពីមួយម៉ឺនដុលា្លរទៅ ២ម៉ឺនដុល្លារ ហើយសម្ភារៈនោះ គ្រួសាររបស់លោកយកមកធ្វើជាអំណោយចែកជូនគ្រួសារក្រីក្រ។
បន្ថែមលើសពីនេះ គ្រួសារលោកមានដីរាប់ហិកតារគ្រប់ខេត្ត មានផ្ទះវីឡាដ៏ល្អប្រណិតជាច្រើន ទាំងនៅក្រុងកូឡាឡាំពួរ និងតាមខេត្ត មានរថយន្តប្រណិតៗជាច្រើនគ្រឿងសុទ្ធតែតម្លៃរាប់សែនដុល្លារ មានគ្រឿងអលង្ការមាសពេជ្ររាប់ម៉ឺនដុល្លារពាក់សម្ញែងយ៉ាងសម្បើម។
តែយ៉ាងណា លោក ណាជីប ព្យាយាមប្រាប់រដ្ឋអាជ្ញា និងស្ថាប័នប្រឆាំងអំពើពុករលួយថា ប្រាក់ដុល្លារទាំងអស់ដែលលោកមាន គឺជាអំណោយរបស់មិត្តភក្ដិលោកនៅបណ្ដាប្រទេសអារ៉ាប់។
តែបែបនេះក្ដី រដ្ឋអាជ្ញាចាប់បានឯកសារជាច្រើនដែលលោក ណាជីប បង្គាប់ទៅរដ្ឋមន្ត្រីកាន់ប្រាក់នៅធនាគារឱ្យដកសាច់ប្រាក់សុទ្ធម្ដងៗច្រើនលានដុល្លារមកផ្ទេរចូលធនាគារឯកជនមួយរបស់លោក។
ឯកសារមួយពាក់ព័ន្ធនឹងការដកសាច់ប្រាក់សុទ្ធដែលលោកបង្គាប់ឱ្យផ្ទេរចេញពីធនាគារអភិវឌ្ឍន៍ម៉ាឡេស៊ី គឺធនាគារ 1 Malaysia Development Berhad ឬ 1MDB នូវសាច់ប្រាក់ ១០លានដុល្លារ។ តាមរដ្ឋអាជ្ញា គឺធនាគារមួយរបស់គ្រួសារលោក ណាជីប នៅក្រុងកូឡាឡាំពួរ គឺមានសាច់ប្រាក់ជាងមួយពាន់លានដុល្លារ។
ក្រុមរដ្ឋអាជ្ញា និងក្រុមស៊ើបអង្កេតរបស់អង្គភាពប្រឆាំងអំពើពុករលួយបានបញ្ជាក់នៅក្នុងសវនាការថា នៅពេលរឿងអាស្រូវនេះផ្ទុះខ្លាំង ជាពិសេសនៅពេលបក្សរបស់លោកចាញ់ឆ្នោត គឺប្រាក់ដុល្លារច្រើនពាន់លានដុល្លារត្រូវបានដកចេញ និងផ្ទេរចេញទៅកាន់ធនាគារដទៃទៀត ហើយសូម្បីភូមិគ្រឹះមួយចំនួនក៏ផ្ទេរកម្មសិទ្ធិដែរ។
ទាំងក្រុមរដ្ឋអាជ្ញា និងក្រុមស៊ើបអង្កេតនៃអង្គភាពប្រឆាំងអំពើពុករលួយ រួមទាំងអាជ្ញាធរសហរដ្ឋអាមេរិកដែលមានសមត្ថកិច្ច រកឃើញទ្រព្យសម្បត្តិរបស់គ្រួសារលោក ណាជីប ដែលទីភ្នាក់ងារសារព័ត៌មាន Reuters បានចុះផ្សាយថា លោក ណាជីប និងគ្រួសាររបស់លោកបានលួចលុយរបស់រដ្ឋ គឺមានជាង ៤៥០០លានដុល្លារអាមេរិក។
ខណៈនេះ លោក ណាជីប ដែលមានអាយុ ៦៩ឆ្នាំ កំពុងដេកក្នុងគុកមួយនៅជាយក្រុងកូឡាឡាំពួរ។ លោកត្រូវបានតុលាការសហព័ន្ធផ្ដន្ទាទោសមានទោស ១២ឆ្នាំ ក្នុងករណីមួយសំណុំរឿង គឺអំពើពុករលួយ។
លោក ណាជីប នៅប្រឈមមុខនឹងសំណុំរឿងលាងលុយ សំណុំរឿងបំពានអំណាច និងរំលោភសេចក្ដីទុកចិត្តដែលជាបទល្មើសកម្រិតព្រហ្មទណ្ឌដ៏ធ្ងន់ធ្ងរ។ ឥឡូវនេះ លោក ណាជីប កំពុងប្ដឹងឧទ្ធរណ៍ទៅតុលាការកំពូល ហើយស្វែងរកការសុំលើកលែងទោសពីព្រះមហាក្សត្រ។
តែយ៉ាងណាក៏ដោយ គ្រួសាររបស់លោកទាំងអស់ រួមទាំងប្រពន្ធរបស់លោកដែលពាក់មាសពេជ្រស្រោចខ្លួន ត្រូវបានតុលាការចេញដីកាហាមចាកចេញពីប្រទេស ដោយត្រូវកោះហៅមកជំនុំជម្រះក្ដីនៅថ្ងៃទី១ ខែកញ្ញា ខាងមុខនេះ៕