សមត្ថកិច្ចខេត្តព្រះសីហនុ ចាប់ខ្លួនជនបរទេសជិត ៥០០នាក់ដែលមាន ១០សញ្ជាតិពាក់ព័ន្ធនឹងបទល្មើសជួញដូរមនុស្ស និងសញ្ចរកម្មនៅកម្ពុជា រួមមានជនជាតិចិន ជនជាតិចិនតៃវ៉ាន់ ជនជាតិវៀតណាម ជនជាតិម៉ាឡេស៊ី ជនជាតិឥណ្ឌូនេស៊ី ជនជាតិឥណ្ឌា ជនជាតិថៃ ជនជាតិបង់ក្លាដេស ជនជាតិភូមា និងជនជាតិរុស្ស៊ី ផងដែរ ក្នុងនោះសមត្ថកិច្ចបានបញ្ជូនជនសង្ស័យចំនួន ៥នាក់ទៅតុលាការ ដើម្បីបន្តស៊ើបអង្កេតបទល្មើសសម្អាតប្រាក់ថែមទៀត។
រដ្ឋបាលខេត្តព្រះសីហនុ បានចេញសេចក្តីប្រកាសព័ត៌មានកាលពីថ្ងៃទី២៥ ខែកញ្ញា ឆ្នាំ២០២២ នេះថា កម្លាំងគណៈបញ្ជាការឯកភាពខេត្តព្រះសីហនុ បានបើកប្រតិបត្តិការបង្ក្រាបទៅលើទីតាំងបនល្បែងខុសច្បាប់មួយកន្លែងឈ្មោះ ជីងឆាយ តិចណូឡូជី ដែលបានបើកដំណើរការនូវល្បែងខុសច្បាប់ជាច្រើនប្រភេទ ដូចជាល្បែងអនឡាញខុសច្បាប់ បទល្មើសជួញដូរមនុស្ស និងបទល្មើសសញ្ចរកម្ម ជាដើម។
ប្រភពដដែលអះអាងថា ជនបរទេសដែលបានធ្វើអន្តោប្រវេសន៍ដោយខុសច្បាប់សរុបចំនួន ២៣៦នាក់ ក្នុងនោះមានជនជាតិចិនចំនួន ៩៩នាក់ និងជនជាតិវៀតណាមចំនួន ១២២នាក់ ក្រៅពីនោះមានជនជាតិចិនតៃវ៉ាន់ ជនជាតិម៉ាឡេស៊ី ជនជាតិថៃ ជនជាតិបង់ក្លាដេស និងជនជាតិភូមា សរុបរួមមានចំនួន ១៥នាក់ផងដែរ។
រដ្ឋបាលខេត្តព្រះសីហនុ បញ្ជាក់ថា ក្រសួងមហាផ្ទៃ និងរដ្ឋបាលខេត្តព្រះសីហនុ សម្រេចដាក់ចេញនូវវិធានការមួយចំនួនដោយធ្វើកិច្ចសន្យាអប់រំដល់ជនបរទេសដែលស្របច្បាប់ និងបិទអាជីវកម្មទាំងអស់ដែលស្ថិតក្នុងបរិវេណទីតាំងឈ្មោះ ជីងឆាយ តិចណូឡូជី និងបិទជាបណ្ដោះអាសន្ននូវអគារមួយចំនួន ព្រមទាំងប្រគល់ទ្រព្យសម្បត្តិដែលបានចាប់យកក្នុងពេលប្រតិបត្តិការប្រគល់ឱ្យរដ្ឋបាលខេត្តព្រះសីហនុ រក្សាទុកទាំងអស់។
ការចេញបង្ក្រាបបទល្មើសល្បែងអនឡាញខុសច្បាប់ បទល្មើសជួញដូរមនុស្ស និងបទល្មើសសញ្ចរកម្មនេះ ធ្វើឡើងបន្ទាប់ពីកម្ពុជាត្រូវបានដាក់ចូលទៅក្នុងបញ្ជីខ្មៅការជួញដូរមនុស្សក្នុងកម្រិតធ្ងន់ និងជាប់ឈ្មោះក្នុងបញ្ជីប្រផេះនៃការសម្អាតប្រាក់កាលពីពេលកន្លងទៅនេះ។
កាលពីថ្ងៃទី៨ ខែកញ្ញា ឆ្នាំ២០២២ រដ្ឋមន្ត្រីក្រសួងមហាផ្ទៃ លោក ស ខេង ត្អូញត្អែរថា កម្ពុជាកំពុងធ្លាក់ចូលទៅក្នុងបញ្ហាធំៗ២ គឺកម្ពុជាត្រូវបានគេដាក់ឱ្យស្ថិតក្នុងបញ្ជីប្រផេះនៃក្រុមប្រទេសដែលមានហានិភ័យខ្ពស់ខាងលាងលុយកខ្វក់ និងត្រូវគេដាក់ចំណាត់ថ្នាក់ទី៣ ក្នុងបញ្ជីខ្មៅនៃក្រុមប្រទេសជួញដូរមនុស្ស ដែលពិភពលោកបង្កើនការតាមដានសម្រាប់ឆ្នាំ២០២២ នេះផងដែរ ដែលធ្វើឱ្យប៉ះពាល់យ៉ាងខ្លាំងដល់មុខមាត់របស់កម្ពុជា។
ទាក់ទិននឹងបញ្ហានេះ ក្រសួងការបរទេសអាមេរិក កាលពីថ្ងៃទី១៩ ខែកក្កដា ក៏បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្សរបស់ខ្លួនផងដែរ ដែលទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីខ្មៅស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ (Tier 3 Watch List) ដែលធ្វើឲ្យកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរសព្វថ្ងៃនេះ។
ដោយឡែកកាលពីថ្ងៃទី៤ ខែមីនា ឆ្នាំ២០២២ ក្រុមការងារហិរញ្ញវត្ថុដែលមានមូលដ្ឋាននៅទីក្រុងប៉ារីស ប្រទេសបារាំង (Financial Action Taskforce) ហៅកាត់ថា FATF បានសម្រេចបន្តដាក់កម្ពុជាឱ្យស្ថិតក្នុង «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់អស់រយៈពេលជាង ៣ឆ្នាំជាប់ៗគ្នាតាំងពីឆ្នាំ២០១៩ មក ដែលពិភពលោកត្រូវបង្កើនការតាមដានកាន់តែខ្លាំងជាងមុនក្នុងឆ្នាំ២០២២ នេះ៕