សហភាពសហជីពកម្ពុជា អំពាវនាវឲ្យសមាជិក និងពលរដ្ឋឲ្យទៅពិនិត្យបញ្ជីឈ្មោះ និងចុះឈ្មោះបោះឆ្នោត ដើម្បីចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ខាងមុខនេះ បន្ទាប់ពី គ.ជ.ប នឹងរៀបចំដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមសាលាឃុំ-សង្កាត់ទូទាំងប្រទេសចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២២។
ការអំពាវនាវរបស់សហភាពសហជីពកម្ពុជា ធ្វើឡើងតាមសេចក្ដីប្រកាសចុះថ្ងៃទី១១ ខែតុលា ឆ្នាំ២០២២ ដោយឲ្យថ្នាក់ដឹកនាំសហព័ន្ធ សមាគម សហជីពមូលដ្ឋាន គ្រូបង្រៀន កម្មករ និងពលរដ្ឋ ទៅពិនិត្យបញ្ជីឈ្មោះឡើងវិញ និងអ្នកមិនទាន់បានចុះឈ្មោះបោះឆ្នោត ត្រូវទៅចុះឈ្មោះបោះឆ្នោតតាមកន្លែង និងកាលបរិច្ឆេទដែលកំណត់ដោយគណៈកម្មាធិការជាតិរៀបចំការបោះឆ្នោត (គ.ជ.ប)។
សហភាពសហជីពកម្ពុជា បញ្ជាក់ថា ដើម្បីចុះឈ្មោះបោះឆ្នោតបាន លុះត្រាតែពលរដ្ឋទាំងពីរភេទដែលពុំធ្លាប់បានចុះឈ្មោះពីមុនមក និងអ្នកដែលមានអាយុ ១៨ឆ្នាំឡើងទៅ ដោយត្រូវមានអត្តសញ្ញាណប័ណ្ណសញ្ជាតិខ្មែរមានសុពលភាព ឬឯកសារបញ្ជាក់អត្តសញ្ញាណបម្រើឲ្យការចុះឈ្មោះបោះឆ្នោតផងដែរ។
ប្រភពដដែលឱ្យដឹងថា ចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២២ គ.ជ.ប នឹងរៀបចំដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមសាលាឃុំ-សង្កាត់ និងតាមភូមិក្នុងឃុំ-សង្កាត់មួយចំនួនទូទាំងប្រទេស។
រដ្ឋាភិបាលបានដាក់ចេញគោលការណ៍រួចហើយថា ការបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧ នេះ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣៕