នាយករដ្ឋមន្ត្រីបន្តវេនពីឪពុក គឺលោក ហ៊ុន ម៉ាណែត ដែលទើបឡើងកាន់តំណែងថ្មីៗ បានប្ដេជ្ញាអនុវត្តឲ្យបានសម្រេចជោគជ័យនូវ «កម្មវិធីនយោបាយរបស់រាជរដ្ឋាភិបាល» ទាំង ៥ចំណុចដែលជាការសន្យារបស់គណបក្សប្រជាជនកម្ពុជាជាមួយពលរដ្ឋនៅមុនការបោះឆ្នោត។
ការថ្លែងនេះ បន្ទាប់ពីរដ្ឋសភាអនុម័តគាំទ្រទាំងស្រុងលើសមាសភាពគណៈរដ្ឋមន្ត្រី ដោយលោក ហ៊ុន ម៉ាណែត ជានាយករដ្ឋមន្ត្រីថ្មីរបស់កម្ពុជា នាថ្ងៃទី២២ ខែសីហា ឆ្នាំ២០២៣។
ខ្លឹមសារទាំង ៥ចំណុចដែលរដ្ឋាភិបាលថ្មីដឹកនាំដោយលោក ហ៊ុន ម៉ាណែត ដាក់ទៅរដ្ឋសភា ក្នុងនោះមាន៖
- ការធានាការពារឲ្យបានដាច់ខាតនូវសន្តិភាព ស្ថិរភាព សន្តិសុខ និងសុវត្ថិភាព សម្រាប់ការរស់នៅដោយក្សេមក្សាន្តរបស់ប្រជាជននៅគ្រប់ទិសទីក្នុងផ្ទៃប្រទេស ព្រមទាំងការការពារឯករាជ្យ អធិបតេយ្យភាព និងបូរណភាពទឹកដីឲ្យបានគង់វង្ស មិនឲ្យកម្លាំងណាមួយមកបំពាន ឬបំផ្លាញបានឡើយ។
- ការធានាបន្តជំរុញការអភិវឌ្ឍសេដ្ឋកិច្ច និងសង្គមកម្ពុជាលើគ្រប់វិស័យ ដោយផ្ដោតជាអាទិភាព។
- ការធានាបន្តជំរុញលើកកម្ពស់ និងកែលំអជីវភាពរស់នៅរបស់ប្រជាជន។
- ការធានានូវសុវត្ថិភាពសង្គម និងលំនឹងក្នុងការរស់នៅរបស់ពលរដ្ឋទាំងក្នុងពេលបច្ចុប្បន្ន ក៏ដូចជាទៅអនាគត។
- ការធានាបង្កើនការយកចិត្តទុកដាក់ដល់ចីរភាពនៃការអភិវឌ្ឍសង្គម សេដ្ឋកិច្ច និងការកសាងភាពធន់ទៅនឹងការប្រែប្រួលអាកាសធាតុ។
ក្រៅពីខ្លឹមសារទាំង ៥ចំណុចខាងលើនេះ លោក ហ៊ុន ម៉ាណែត ក៏បានសន្យា និងប្ដេជ្ញាថា ខ្លួននឹងដឹកនាំស្ថាប័ននីតិប្រតិបត្តិរបស់ជាតិ ធានាអនុវត្តឲ្យបានសម្រេចជោគជ័យនូវ «កម្មវិធីនយោបាយរបស់រាជរដ្ឋាភិបាល» ហើយដែលជាការសន្យារបស់គណបក្សប្រជាជនកម្ពុជាជូនដល់ពលរដ្ឋនៅមុនការបោះឆ្នោត ដោយផ្ដោតលើការយកចិត្តទុកដាក់លើកម្មវិធីគោលនយោបាយជាអាទិភាពទាំង៦។
សម្រាប់ «កម្មវិធីនយោបាយរបស់រាជរដ្ឋាភិបាល» ដែលនាយករដ្ឋមន្ត្រីត្រូវបានឪពុកលើកបន្តុបរូបនេះ ថានឹងត្រូវដាក់ឲ្យអនុវត្តភ្លាមនៅក្នុងឆ្នាំ២០២៣ ក្នុងនោះរួមមាន៖
- ការពង្រីកសេវាថែទាំសុខភាពឆ្ពោះទៅរកការគ្របដណ្ដប់សុខភាពជាសកល។
- ការបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស។
- ការធ្វើស្ថាបនូបនីយកម្មកម្មវិធីជាតិជំនួយសង្គមសម្រាប់គ្រួសារក្រីក្រ ក្រុមជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យនៅក្នុងគ្រាមានវិបត្តិសេដ្ឋកិច្ច និងគ្រាមានគ្រោះអាសន្ន។
- ការដាក់ចេញ និងការជំរុញអនុវត្តយុទ្ធសាស្ត្រអភិវឌ្ឍសេដ្ឋកិច្ចក្រៅប្រព័ន្ធឲ្យមានលទ្ធភាពចូលរួមក្នុងសេដ្ឋកិច្ចក្នុងប្រព័ន្ធ និងអាចទទួលបានផលប្រយោជន៍ពីប្រព័ន្ធគាំពារសង្គមផ្លូវការ។
- ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទានសំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ។
- ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ដែលមានសកម្មភាពកសិកម្មនៅទូទាំងប្រទេស និងការរៀបចំឲ្យមានសមាគមកសិករនៅតាមទីជនបទ។
មិនត្រឹមតែឡើងប្ដេជ្ញាចិត្តនោះទេ លោក ហ៊ុន ម៉ាណែត ក៏បានឆ្លៀតវាយប្រហារទៅគណបក្សប្រឆាំងដូចឪពុករបស់លោកធ្លាប់លើកឡើងដែរ។
លោក ហ៊ុន ម៉ាណែត ថ្លែងនៅខាងមុខតំណាងរាស្ត្រមកពីគណបក្សប្រជាជនកម្ពុជា ១២០រូប និងគណបក្សហ៊្វុនស៊ិនប៉ិច ៥រូបថា ចំនួនពលរដ្ឋទៅបោះឆ្នោតជាង ៨២% កាលពីថ្ងៃទី២៣ ខែកក្កដា ជាការឆ្លុះបញ្ចាំងឲ្យឃើញពីការបដិសេធយ៉ាងដាច់អហង្ការពីសំណាក់ពលរដ្ឋចំពោះទង្វើអគតិរបស់ក្រុមជនជ្រុលនិយមមួយចំនួនដែលលោក ហ៊ុន ម៉ាណែត ចោទថាបានទាក់ទាញប្រជាជាតិកម្ពុជាឲ្យចាកចេញពីគន្លងនៃមាគ៌ាប្រជាធិបតេយ្យ និងនីតិរដ្ឋ ដោយញុះញង់ អុជអាល បំផុសពលរដ្ឋឲ្យលុះទៅនឹងមហិច្ឆតាផ្ទាល់ខ្លួនរបស់ពួកគេ ដែលប្រកបទៅដោយពិសពុល និងគ្រោះថ្នាក់បំផុតសម្រាប់ប្រទេសជាតិ។
ប៉ុន្តែការឡើងកាន់តំណែងនាយករដ្ឋមន្ត្រីបន្តពីឪពុករបស់លោក ហ៊ុន ម៉ាណែត នាពេលនេះ បានរងការរិះគន់ខ្លាំងពីសហគមន៍ជាតិ និងអន្តរជាតិ ដោយសារការបោះឆ្នោតនៅថ្ងៃទី២៣ ខែកក្កដា ប្រព្រឹត្តទៅគ្មានសេរីភាព ត្រឹមត្រូវ និងយុត្តិធម៌ ខណៈបណ្ដាប្រទេសលោកសេរីក៏មិនបានដាក់អ្នកសង្កេតការណ៍ដែរ បន្ទាប់ពីឪពុករបស់លោក ហ៊ុន ម៉ាណែត បិទបក្សប្រឆាំងមិនឲ្យចូលរួមប្រកួតប្រជែងនោះ។
ចំណែកវេទិកាពលរដ្ឋដែលមានមូលដ្ឋាននៅសហរដ្ឋអាមេរិក បានលើកឡើងថា លោក ហ៊ុន ម៉ាណែត ជានាយករដ្ឋមន្ត្រីខុសច្បាប់ និងមិនតំណាងផលប្រយោជន៍ប្រជាពលរដ្ឋខ្មែរឡើយ។
ក្នុងសេចក្តីថ្លែងការណ៍មួយចុះថ្ងៃទី២២ ខែសីហា ឆ្នាំ២០២៣ ឲ្យដឹងថា ការបោះឆ្នោតថ្ងៃទី២៣ កក្កដា កន្លងទៅ មិនអាចចាត់ទុកថាជាការបោះឆ្នោតជ្រើសតាំងតំណាងរាស្ត្រដើម្បីបង្កើតរដ្ឋសភារបស់ប្រទេសជាតិឡើយ ពីព្រោះការបោះឆ្នោតនោះគ្មានភាពសេរី មិនត្រឹមត្រូវ និងយុត្តិធម៌ ដោយពុំមានភាពស្មើភាព និងគំរាមកំហែងភាពសម្ងាត់លើក្រុមអ្នកនយោបាយ និងបក្សនយោបាយគូប្រជែងដែលមានសក្ដានុពលនានាចេញពីសង្វៀនប្រកួតទាំងអស់។
ប្រភពដដែលអះអាងថា រដ្ឋសភា និងរដ្ឋាភិបាលថ្មីនេះមិនមែនជាស្ថាប័នជាតិតំណាងផលប្រយោជន៍ពលរដ្ឋនោះទេ ខណៈពលរដ្ឋមិនអាចប្រើអំណាចរបស់ពួកគាត់ជាម្ចាស់ប្រទេសតាមរយៈរដ្ឋសភា និងរដ្ឋាភិបាល ដូចមានចែងក្នុងមាត្រា៥១ថ្មី នៃរដ្ឋធម្មនុញ្ញ ព្រមទាំងសិទ្ធិ និងករណីយកិច្ចរបស់ប្រជាពលរដ្ឋខ្មែរ ត្រង់ជំពូកទី៣ នៃរដ្ឋធម្មនុញ្ញនោះទេ។ ផ្ទុយទៅវិញ មានតែធ្វើឲ្យពលរដ្ឋបាត់បង់ប្រយោជន៍ទាំងស្រុង ព្រោះតែរដ្ឋសភា និងរដ្ឋាភិបាលខុសច្បាប់ដែលដឹកនាំដោយនាយករដ្ឋមន្ត្រីខុសច្បាប់។
ចាប់ពីឆ្នាំ២០១៧ ដល់ឆ្នាំ២០២៣ នេះ ប្រជាធិបតេយ្យនៅប្រទេសកម្ពុជាត្រូវបានសហគមន៍ជាតិ និងអន្តរជាតិមើលឃើញថា បានធ្លាក់ចុះកាន់តែខ្លាំង។ ការធ្លាក់ចុះនេះ ចាប់តាំងពីរដ្ឋាភិបាលដឹកនាំដោយលោក ហ៊ុន សែន បានបញ្ជាទៅតុលាការកំពូលឲ្យរំលាយគណបក្សសង្គ្រោះជាតិ មុនការបោះឆ្នោតថ្នាក់ជាតិនៅឆ្នាំ២០១៨ រឹតត្បិតសិទ្ធិសេរីភាពបញ្ចេញ និងធ្វើទុក្ខបុកម្នេញលើពលរដ្ឋគ្រប់រូបភាព ជាដើម៕