លោក ហ៊ុន សែន ប្រកាសប្រើ Facebook វិញ បន្ទាប់ពីក្រុមហ៊ុននេះបានផ្ដល់យុត្តិធម៌ឲ្យលោក បើទោះបីជាកាលពីខែសីហា ឆ្នាំ២០២៣ កន្លងទៅ លោកប្រកាសថាឈប់ប្រើ Facebook ដោយងាកមកប្រើ TikTok របស់ចិន និង Telegram របស់រុស្ស៊ី ម្ដងវិញនោះ។
អតីតនាយករដ្ឋមន្ត្រីកម្ពុជា លោក ហ៊ុន សែន បានសរសេរលើហ្វេសប៊ុកកាលពីថ្ងៃទី៣ ខែកញ្ញា ឆ្នាំ២០២៣ ថា ការសម្រេចងាកមកប្រើ Facebook វិញ បន្ទាប់ពីក្រុមហ៊ុន Facebook បានផ្ដល់យុត្តិធម៌ឲ្យលោក ដោយទាត់ចោលអនុសាសន៍របស់តំណាងនៃក្រុមហ៊ុន Meta ចំនួន ២២រូប ដែលលោកហៅថាជាក្រុមមនុស្សខូចចោទប្រកាន់លើរូបលោក។
លោក ហ៊ុន សែន អះអាងថា លោកក៏មិនអនុញ្ញាតទទួលយកតំណាងនៃក្រុមហ៊ុនមេតាទាំង ២២រូបនេះចូលមកកម្ពុជាវិញដែរ ដោយចាត់ទុកថាអ្នកទាំងនោះជាក្រុមមនុស្សខូច។ លោកថា ក្រុមហ៊ុនFacebook នេះ ទទួលបានប្រាក់ចំណេញលើស ២០០លានដុល្លារក្នុងមួយឆ្នាំនៅកម្ពុជា ខណៈរដ្ឋាភិបាលកម្ពុជាទទួលបានតែ ១០% ឬស្មើនឹងជាង ២០លានដុល្លារក្នុងមួយឆ្នាំ (តួលេខផ្នែកពន្ធដារ) តែប៉ុណ្ណោះ។
លោក ហ៊ុន សែន ព្រមានថា អ្នកដែលបានយកឈ្មោះលោកទៅបង្កើត Facebook ឬ TikTok ក្លែងក្លាយនោះ ត្រូវលុបចោលជាបន្ទាន់ ដើម្បីជៀសវាងការភាន់ច្រឡំ ខណៈការសម្រេចប្រើ ឬមិនប្រើ Facebook គឺជាសិទ្ធិផ្ដាច់មុខរបស់លោកប៉ុណ្ណោះ។
ក្រៅពីប្រើប្រាស់ Facebook នោះ លោកក៏ប្រើ TikTok ,YouTube, Telegram, Instagram និង Twitter ដែរ។
លោក ហ៊ុន សែន ប្រធានគណបក្សប្រជាជនកម្ពុជា និងជាប្រធានក្រុមឧត្ដមប្រឹក្សាផ្ទាល់ព្រះមហាក្សត្រ អះអាងថា លោកបន្តប្រើប្រាស់បណ្ដាញ TikTok ដោយមើលឃើញ TikTok របស់លោកផ្លូវការមានអ្នក Follower កើនឡើងរហូតដល់ជាង ៥០០ពាន់ (500K) ខណៈវីដេអូចៅស្រីៗដែលផ្សាយលើបណ្ដាញនេះ លោកថាមានអ្នកមើលជាង ៧,៤លាន (7,4M) ឯណោះ។
ជុំវិញរឿងនេះដែរ ក្រុមអ្នកឃ្លាំមើលធ្លាប់អះអាងថា លោក ហ៊ុន សែន ជាមេដឹកនាំញៀននឹងការលេងហ្វេសប៊ុក ដោយមិនអាចអត់លេងហ្វេសប៊ុកបានឡើយ។ ជាក់ស្ដែង ទោះបីជាលោកប្រកាសក្ដែងៗថាឈប់ប្រើប្រាស់ហ្វេសប៊ុកហើយក្ដី ប៉ុន្តែលោក ហ៊ុន សែន ក៏នៅតែលួចលេងហ្វេសប៊ុកដដែល។
កាលពីថ្ងៃទី២២ ខែសីហា ឆ្នាំ២០២៣ លោក ហ៊ុន សែន ក៏បានប្រកាសជាថ្មីថា លោកឈប់ប្រើ Facebook ហើយ ដោយចោទថាក្រុមហ៊ុនហ្វេសប៊ុកដែលបានបិទគណនី (អាខោន) ធ្វើឡើងក្នុងចេតនាបំផ្លាញលោកមុនការបោះឆ្នោតជ្រើសតាំងតំណាងរាស្ត្រនាថ្ងៃទី២៣ ខែកក្កដា ឆ្នាំ២០២៣។
ក្រុមហ៊ុន Meta បានបញ្ជាក់ថា ការដែលក្រុមហ៊ុននេះសម្រេចផ្អាកមិនឲ្យដំណើរការទំព័រហ្វេសប៊ុករបស់លោក ហ៊ុន សែន រយៈពេល ៦ខែ គឺបន្ទាប់ពីមានវីដេអូមួយដែលបានបង្ហោះតាមទំព័រហ្វេសប៊ុករបស់លោក ហ៊ុន សែន ដែលបានរំលោភលើវិធានរបស់ក្រុមហ៊ុន Meta ស្ដីពីការគំរាមកំហែង និងហិង្សា៕