ប្រធានរដ្ឋសភានៃសាធារណរដ្ឋសង្គមនិយមវៀតណាម លោក វឿង ឌីញ ហ្វេ (VUONG DINH HUE) ស្នើកម្ពុជាជាថ្មីម្តងទៀតឲ្យជួយសម្រួលផ្តល់ឯកសារស្របច្បាប់ដល់ពលរដ្ឋវៀតណាម ដែលកំពុងតាំងទីលំនៅលើទឹកដីកម្ពុជា។
ការស្នើជាថ្មីនេះ ធ្វើឡើងក្នុងជំនួបទ្វេភាគីជាមួយប្រធានរដ្ឋសភាកម្ពុជា លោក ហេង សំរិន កាលពីថ្ងៃទី១៩ ខែវិច្ឆិកា នេះ មុនពេលកិច្ចប្រជុំអន្តរសភាអាស៊ានដែលរៀបចំនៅរាជធានីភ្នំពេញ។
បើតាមទីភ្នាក់ងារសារព័ត៌មានវៀតណាម Vietnam News Agency ចុះផ្សាយនៅថ្ងៃទី២០ ខែវិច្ឆិកា ឆ្នាំ២០២២ ថា ប្រធានរដ្ឋសភានៃសាធារណរដ្ឋសង្គមនិយមវៀតណាម លោក វឿង ឌីញ ហ្វេ (VUONG DINH HUE) ស្នើឲ្យកម្ពុជាបន្តផ្តល់ឯកសារស្របច្បាប់សម្រាប់ពលរដ្ឋវៀតណាម ដែលរស់នៅក្នុងប្រទេសកម្ពុជាបន្ថែមទៀត។
ក្រៅពីស្នើ មេដឹកនាំវៀតណាមក៏បានអំណរគុណចំពោះកម្ពុជាដែលបានជួយសហការយ៉ាងជិតស្និទ្ធជាមួយវៀតណាម ក្នុងការជួយសង្គ្រោះពលរដ្ឋវៀតណាម ដែលត្រូវបានចាញ់បោក និងបង្ខំឲ្យធ្វើការខុសច្បាប់នៅក្នុងគ្រឹះស្ថានអាជីវកម្មរបស់ជនបរទេសមួយចំនួននៅលើទឹកដីកម្ពុជាផងដែរ។
ជាការឆ្លើយតបនឹងសំណើប្រធានរដ្ឋសភាវៀតណាម លោក វឿង ឌីញ ហ្វេ (VUONG DINH HUE) នោះ ប្រធានរដ្ឋសភាកម្ពុជា លោក ហេង សំរិន បានសន្យាជួយការពារសិទ្ធិ និងធានាការមិនរើសអើងប្រឆាំងនឹងសហគ្រាសបរទេស និងអ្នកវិនិយោគវៀតណាមដែលកំពុងរកស៊ីនៅកម្ពុជា។
លោក ហេង សំរិន អះអាងថា កម្ពុជាអរគុណរដ្ឋាភិបាល និងប្រជាជនវៀតណាម ដែលបានផ្តល់ការគាំទ្រដល់ប្រជាជនកម្ពុជាក្នុងការតស៊ូដណ្តើមឯករាជ្យជាតិ ការកសាង និងអភិវឌ្ឍជាតិនាពេលបច្ចុប្បន្ន ជាពិសេសជួយពួកគេឲ្យរួចផុតពីរបបប្រល័យពូជសាសន៍ខ្មែរក្រហម។
ក្រៅពីស្នើទៅលោក ហេង សំរិន នោះ កាលពីថ្ងៃទី៨ ខែវិច្ឆិកា ឆ្នាំ២០២២ នាយករដ្ឋមន្ត្រីវៀតណាម លោក ផាម មីញជីញ (Pham Minh Chinh) ក៏បានស្នើលោក ហ៊ុន សែន ឲ្យបង្កើតលក្ខខណ្ឌអំណោយផលបន្ថែមទៀតដល់សហគ្រាសវៀតណាម ដែលចូលមកវិនិយោគ និងធ្វើអាជីវកម្មនៅកម្ពុជាប្រកបដោយស្ថិរភាព និងយូរអង្វែង ដោយឈរលើមូលដ្ឋាននៃការផ្ដល់ផលប្រយោជន៍គ្នាទៅវិញទៅមក។
ការស្នើរបស់មេដឹកនាំវៀតណាមម្ដងហើយម្ដងទៀតស្របពេលដែល រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២៧ ខែតុលា ឆ្នាំ២០២២ ព្រមានចាត់វិធានការផាកពិន័យធ្ងន់ធ្ងរចំពោះជនបរទេសទាំងឡាយណាមិនគោរពច្បាប់កម្ពុជា រួមទាំងអ្នកគប់គិតដែលជាផ្នែកមួយដើម្បីបង្កើនប្រាក់ចំណូលជាតិ។
ការព្រមានរបស់លោក ស ខេង នេះ ក្រោយរកឃើញថាជនបរទេសដែលធ្វើការនៅកម្ពុជាជិត ៩០% កំពុងបំពានច្បាប់កម្ពុជា។
ជាក់ស្ដែង លោកថានៅថ្ងៃទី២៥ ខែតុលា រូបលោកបានបញ្ជាទៅសមត្ថកិច្ចឲ្យឆែកទីតាំងមួយកន្លែងនៅបាវិត ដែលត្រូវបានគេហៅថាម៉ុកបាយនោះ បានឃើញជនជាតិវៀតណាម ជិត ៣០០នាក់គ្មានទិដ្ឋាការ គ្មានលិខិតឆ្លងដែនចូលកម្ពុជាឡើយ។ ករណីនេះ លោកបញ្ជាឲ្យបណ្តេញជនជាតិវៀតណាមទាំងនោះចេញពីកម្ពុជា ព្រមទាំងដាក់ក្នុងបញ្ជីខ្មៅដោយកំណត់ឆ្នាំដើម្បីហាមឃាត់ចូលស្រុកខ្មែរផងដែរ។
ជារឿយៗ មេដឹកនាំវៀតណាម តែងស្នើឲ្យរដ្ឋាភិបាលកម្ពុជា ជួយផ្ដល់ភាពស្របច្បាប់ដល់ពលរដ្ឋវៀតណាម ដែលកំពុងរស់នៅកម្ពុជាកន្លងមក និងបច្ចុប្បន្ន។
ប៉ុន្តែការស្នើផ្ដល់ភាពស្របច្បាប់ដល់ជនជាតិវៀតណាមនេះ ត្រូវបានអ្នកឃ្លាំមើលបង្ហាញការព្រួយបារម្ភ ដោយថាវានឹងបង្កហានិភ័យដល់ប្រទេសជាតិ ដោយសារវៀតណាមជាប្រទេសមានព្រំដែនជាប់កម្ពុជា។ មួយវិញទៀត តាំងពីសម័យប្រវត្តិសាស្ត្ររហូតដល់បច្ចុប្បន្ន វៀតណាមនៅតែមានមហិច្ឆតា និងចិញ្ចឹមចិត្តចង់បានកម្ពុជាធ្វើជារបស់ខ្លួន ទើបបច្ចុប្បន្នខិតខំស្នើសុំរដ្ឋាភិបាលកម្ពុជាផ្ដល់ភាពស្របច្បាប់ពលរដ្ឋវៀតណាមដែលកំពុងរស់នៅកម្ពុជាដោយខុសច្បាប់។
កាលពីថ្ងៃទី៦ ខែមេសា ឆ្នាំ២០២២ នេះ រដ្ឋមន្ត្រីក្រសួងមហាផ្ទៃ លោក ស ខេង បានក្រើនរំលឹកទៅកម្លាំងនគរបាលអន្តោប្រវេសន៍ពិសេសនៅតាមព្រំដែន ត្រូវពង្រឹងដោយគ្រប់គ្រងការចេញចូលរបស់ជនបរទេស។ លោកក៏បានបញ្ជាទៅសមត្ថកិច្ចទាំងអស់ ត្រូវអនុវត្តច្បាប់ឲ្យបានតឹងរ៉ឹងដោយចាប់ និងបណ្ដេញជនអន្តោប្រវេសន៍ខុសច្បាប់ចេញពីកម្ពុជាវិញ ដោយមិនត្រូវខ្វល់ថាជាជនបរទេសណាមួយឡើយ។
ពាក់ព័ន្ធរឿងនេះដែរ កាលពីថ្ងៃទី២៣ ខែកុម្ភៈ ឆ្នាំ២០២២ អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ លោក ប៉ោ ភក្តិ បានជំរុញឲ្យធ្វើវិសោធនកម្មច្បាប់អន្តោប្រវេសន៍ឆ្នាំ១៩៩៤ ជាបន្ទាន់ ដើម្បីធានាប្រសិទ្ធភាពគ្រប់គ្រងជនអន្តោប្រវេសន៍។
ការជំរុញនោះ ក្រោយពីរកឃើញថា ផ្នែកមួយនៃបញ្ហានេះ គឺអាជ្ញាធរវៀតណាម មិនព្រមទទួលយកពលរដ្ឋខ្លួនដែលរស់នៅខុសច្បាប់នៅកម្ពុជា ទោះបីពួកគេចង់ទៅវិញក៏ដោយ៕