រដ្ឋាភិបាលកម្ពុជាបានកំណត់សម្រេចឱ្យធ្វើពិធីបុណ្យ «រំឭកគុណអង្គរ» ជារៀងរាល់ឆ្នាំដែលមានរយៈពេល ៣ថ្ងៃ នៅថ្ងៃទី១៤ ដល់ថ្ងៃទី១៦ ខែធ្នូ ដោយគិតចាប់ពីឆ្នាំ២០២២ នេះតទៅ ដើម្បីតបស្នង និងរំឭកដឹងគុណដល់បុព្វបុរសខ្មែរដែលបន្សល់មរតកដ៏អស្ចារ្យសម្រាប់មនុស្សជាតិ និងចូលរួមថែរក្សាការពារ និងលើកតម្លៃបេតិកភណ្ឌជាតិ។
ក្រសួងវប្បធម៌ និងវិចិត្រសិល្បៈ នៅថ្ងៃទី២៤ ខែវិច្ឆិកា ឆ្នាំ២០២២ បានចេញសារាចរណែនាំមួយស្ដីពី «ការរៀបចំពិធីបុណ្យរំឭកគុណអង្គរ» ដោយក្នុងនោះ ក្រសួងបានណែនាំដល់អាជ្ញាធរជាតិអប្សរាឱ្យរៀបចំកម្មវិធីតាមថ្ងៃនីមួយៗ មានទីតាំងប្រារព្ធពិធី សមាសភាពចូលរួម លិខិតអញ្ជើញ ខ្លឹមសារបដា សុន្ទរកថាថ្នាក់ដឹកនាំ និងលទ្ធភាពថវិកា ជាដើម។
កម្មវិធីនេះក៏តម្រូវឱ្យអាជ្ញាធរជាតិអប្សរាដាក់តាំងបង្ហាញនូវសមិទ្ធផលសម្រេចបាននានារបស់ខ្លួន ជាពិសេសសមិទ្ធផលសម្រេចបានជាមួយដៃគូជាតិ និងអន្តរជាតិនៅតាមទីតាំងសំខាន់ៗ ដើម្បីបង្ហាញឱ្យឃើញពីការចូលរួមចំណែកដ៏មានតម្លៃក្នុងកិច្ចថែរក្សា ការពារ និងអភិរក្សឱ្យបានគង់វង្សនៃបេតិកភណ្ឌជាតិ។
ក្រសួងក៏បានណែនាំដល់អាជ្ញាធរជាតិអប្សរា ឱ្យរៀបចំសេចក្តីជូនដំណឹង និងការសម្ភាសឥស្សរជន អ្នកជំនាញការជាតិ និងអន្តរជាតិ ថ្នាក់ដឹកនាំពាក់ព័ន្ធ វិស័យឯកជន និងសាធារណជន ដើម្បីបង្ហាញសារសំខាន់ និងគុណប្រយោជន៍នៃការរៀបចំពិធីបុណ្យសម្រាប់ផ្សព្វផ្សាយតាមគ្រប់មធ្យោបាយដល់សាធារណជនបានដឹង ជាពិសេសយុវជនឱ្យកាន់តែមានស្មារតីក្នុងការចូលរួមថែរក្សា និងលើកតម្លៃបេតិកភណ្ឌជាតិ។
រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា បានប្រាប់សារព័ត៌មានក្នុងស្រុកថា ពិធីបុណ្យ «រំឭកគុណអង្គរ» ធ្វើឡើងដើម្បីបង្ហាញដល់ប្រជាពលរដ្ឋខ្មែរ និងពិភពលោកបន្ថែមទៀតពីការដឹងគុណ និងប្រពៃណីទំនៀមទម្លាប់ដែលខ្មែរមានតាំងពីបុរាណមក។
អ្នកស្រី ភឿង សកុណា បន្ថែមទៀតថា ពិធីបុណ្យនេះក៏ជាការបំផុសស្មារតីប្រជាពលរដ្ឋ ជាពិសេសយុវជនឲ្យយល់ដឹងពីអត្ថន័យពាក្យថា «អង្គរ»។ ពិធីបុណ្យដែលទើបតែធ្វើឡើងពេលនេះមែន តែមិនមែនមានន័យថា ប្រជាពលរដ្ឋខ្មែរមិនធ្លាប់ដឹងគុណនោះទេ។
រដ្ឋមន្ត្រីក្រសួងវប្បធម៌រូបនោះលើកឡើងថា ការជ្រើសរើសយកថ្ងៃទី១៤ ធ្នូ ជាថ្ងៃចាប់ផ្តើម ដោយសារតែជាថ្ងៃដែលតំបន់អង្គរបានចុះក្នុងបញ្ជីបេតិកភណ្ឌពិភពលោកនៃអង្គការយូណេស្កូឆ្នាំ១៩៩២។
រដ្ឋមន្ត្រីក្រសួងវប្បធម៌ បញ្ជាក់ទៀតថា ការរៀបចំពិធីបុណ្យនេះនឹងធ្វើឡើងដោយមានទាំងការផ្សារភ្ជាប់ផ្នែកសាសនា និងវប្បធម៌ខ្មែរ ដោយមានការរៀបចំពិធីបុណ្យតាមបែបពុទ្ធសាសនាផង និងមានទាំងការសម្ដែងល្ខោន របាំប្រពៃណី និងការដាក់តាំងបង្ហាញផ្ទាំងគំនូរអប្សរាផង។
ពាក់ព័ន្ធនឹងការប្រារព្ធពិធីរំឭកគុណអង្គរនេះ លោក ឡុង កុសល អគ្គនាយករង និងជាអ្នកនាំពាក្យនៃអាជ្ញាធរជាតិអប្សរា បានឲ្យដឹងថា គោលបំណងនៃការរៀបចំពិធីរំឭកគុណអង្គរនេះ គឺដើម្បីរឭកដល់គុណូបការៈមិនអាចកាត់ថ្លៃបានរបស់ដូនតាខ្មែរ ទាំងអង្គរាជវង្សានុវង្ស មន្ត្រីរាជការ អ្នកមុខអ្នកការ អ្នកប្រាជ្ញ បណ្ឌិតកវី ពលរដ្ឋសាមញ្ញទូទៅ។
លោកថា ពួកគាត់បានខិតខំកសាង ថែរក្សា មើលខុសត្រូវ និងជួសជុលប្រាសាទដើម្បីបន្សល់ទុកជាមរតកមានតម្លៃដល់កូនខ្មែរជំនាន់ក្រោយ និងតទៅអនាគត និងជាការដាស់ស្មារតីដល់ពលរដ្ឋឱ្យចូលរួមថែរក្សា និងលើកតម្កើងតម្លៃនៃបេតិកភណ្ឌជាតិ។
តំបន់រមណីយដ្ឋានអង្គរ ត្រូវបានដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ នៅថ្ងៃទី១៤ ខែធ្នូ ឆ្នាំ១៩៩២ នាទីក្រុងសាន់តាហ្វេ សហរដ្ឋអាមេរិក ក្រោមព្រះរាជតម្រិះដ៏ថ្លៃថ្លា និងឈ្លាសវៃបំផុតនៃព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ដែលព្រះអង្គបានអំពាវនាវទៅកាន់អង្គការយូណេស្កូ សុំឱ្យជួយស្រោចស្រង់ និងការពារក្រុមប្រាសាទអង្គរដែលបច្ចុប្បន្នជាតំបន់រមណីយដ្ឋានអង្គរ ស្ថិតក្រោមការគ្រប់គ្រងរបស់អាជ្ញាធរជាតិអប្សរា៕