 ជំនួសបណ្ឌិត យ៉ង សាំងកុមារ ដែលទើបនឹងទៅចូលរួមជាមួយគណបក្សប្រជាជនកម្ពុជា ខណៈលោក សែម ហាក់ ត្រូវបានជ្រើសតាំងជាអគ្គលេខាធិការគណបក្សដែលជាតំណែងរបស់លោក សាម អ៊ីន ពីមុន។){kind=link}
បណ្ឌិត សាម អ៊ីន ត្រូវបានជ្រើសតាំងជាប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន (GDP) ជំនួសបណ្ឌិត យ៉ង សាំងកុមារ ដែលទើបនឹងទៅចូលរួមជាមួយគណបក្សប្រជាជនកម្ពុជា ខណៈលោក សែម ហាក់ ត្រូវបានជ្រើសតាំងជាអគ្គលេខាធិការគណបក្សដែលជាតំណែងរបស់លោក សាម អ៊ីន ពីមុន។ នេះបើតាមសេចក្តីប្រកាសព័ត៌មានពីគណបក្សនៅថ្ងៃទី២ ខែធ្នូ ឆ្នាំ២០២២។
បណ្ឌិត យ៉ង សាំងកុមារ ជាស្ថាបនិកម្នាក់ដែលបានចូលរួមបង្កើតគណបក្សប្រជាធិបតេយ្យមូលដ្ឋាន ក្នុងឆ្នាំ២០១៥។ គណបក្សនេះត្រូវបានគេមើលឃើញថាជាគណបក្សមួយដែលប្រមូលផ្ដុំដោយក្រុមបញ្ញវន្ត។ តែទោះយ៉ាងណាក្តី ក្នុងការបោះឆ្នោតជាតិឆ្នាំ២០១៨ គណបក្សនេះពុំទទួលបានអាសនៈឡើយ ហើយក្នុងការបោះឆ្នោតឃុំ-សង្កាត់ឆ្នាំ២០២២ ទទួលបានត្រឹមតែ ៦អាសនៈ។
កាលពីថ្ងៃទី២៧ ខែវិច្ឆិកា ឆ្នាំ២០២២ ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីជួយអភិវឌ្ឍវិស័យកសិកម្មដល់រដ្ឋាភិបាល។ ក្រោយជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃទី២៩ ខែវិច្ឆិកា ឆ្នាំ២០២២ បណ្ឌិត យ៉ង សាំងកុមារ ក៏ត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទភ្លាមៗតែម្តង។
មុនពេលចុះចូលជាមួយបក្សកាន់អំណាច បណ្ឌិត យ៉ង សាំងកុមារ បានអះអាងកាលពីថ្ងៃទី២៨ ខែវិច្ឆិកា ថា បើរដ្ឋាភិបាលអាចអនុវត្តនូវលក្ខខណ្ឌទាំង ១២ខ របស់លោកឱ្យបានត្រឹមត្រូវ គឺអាចជួយកសិករបានជាង ១លានគ្រួសារឱ្យមានជីវភាពល្អប្រសើរក្នុងដំណាក់កាលដំបូង ហើយផែនការកសាងសង្វាក់ផលិតកម្មនេះ គឺត្រូវប្រើពេលរៀបចំយ៉ាងតិច ៥ឆ្នាំដើម្បីធានានូវការអនុវត្តឱ្យបានទូទាំងប្រទេស៕