សហភាពសហជីពកម្ពុជា ស្នើទៅរដ្ឋាភិបាលឲ្យស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យមុនពេលបោះឆ្នោតជាតិឆ្នាំ២០២៣ ដើម្បីរក្សាប្រព័ន្ធអនុគ្រោះពន្ធ GSP និង EBA ដែលអាមេរិក និងអឺរ៉ុបផ្ដល់ឲ្យកម្ពុជា។
សេចក្ដីថ្លែងការណ៍របស់សហភាពសហជីពកម្ពុជា ចុះថ្ងៃទី២៦ ខែធ្នូ ឆ្នាំ២០២២ បានឲ្យដឹងថា កន្លងមកប្រធានាធិបតីអាមេរិក និងអគ្គលេខាធិការអង្គការសហប្រជាជាតិ ព្រមទាំងសហភាពអឺរ៉ុប ដែលស្នើឲ្យលោក ហ៊ុន សែន បើកលំហសិទ្ធិនយោបាយ សេរីភាព ដោយដោះលែងអ្នកជាប់ឃុំមនសិការមុនបោះឆ្នោតឆ្នាំ២០២៣ អំឡុងពេលមកប្រជុំអាស៊ានថ្មីៗនេះ វាជាការក្រើនរំលឹកដល់កម្ពុជាដើម្បីឲ្យស្ដារស្ថានភាពសិទ្ធិមនុស្ស សេរីភាព និងលទ្ធិប្រជាធិបតេយ្យឡើងវិញ។
ការលើកឡើងរបស់សហរដ្ឋអាមេរិក សហភាពអឺរ៉ុប និងអង្គការសហប្រជាជាតិមកកាន់រដ្ឋាភិបាលកម្ពុជា ធ្វើឡើងក្នុងបំណងល្អសម្រាប់កម្ពុជា ប៉ុន្តែបើកម្ពុជាមិនធ្វើការកែលំអទេ នោះប្រព័ន្ធអនុគ្រោះពន្ធ GSP និង EBA អាចបាត់បង់ទាំងស្រុងនៅក្នុងឆ្នាំ២០២៣ ខាងមុខ។
បើតាមសហភាពសហជីព លើកឡើងថា បើកម្ពុជាបាត់បង់ប្រព័ន្ធអនុគ្រោះពន្ធ GSP និង EBA នោះ នឹងធ្វើឲ្យកម្មកររាប់សែននាក់នឹងបាត់បង់ការងារធ្វើ ខណៈកន្លងមកគ្រាន់តែសហភាពអឺរ៉ុបកាត់ប្រព័ន្ធអនុគ្រោះពន្ធ EBA ២០% បានធ្វើឲ្យកម្មកររាប់ម៉ឺននាក់អត់ការងារធ្វើ។ មិនត្រឹមធ្វើឲ្យកម្មករបាត់បង់ការងារទេ ការបាត់បង់ប្រព័ន្ធអនុគ្រោះពន្ធ GSP និង EBA នេះ កម្ពុជាក៏នឹងបាត់បង់ប្រាក់ចំណូលយ៉ាងខ្លាំង និងធ្វើឲ្យសេដ្ឋកិច្ចធ្លាក់ចុះផងដែរ បើរដ្ឋាភិបាលនៅតែធ្វើមិនដឹងមិនឮនោះ។
សហភាពសហជីពជំរុញឲ្យរដ្ឋាភិបាលត្រូវយកចិត្តទុកដាក់លើផលប្រយោជន៍កម្មករកម្មការិនីធំជាងហេតុផលនយោបាយ។
ក្នុងជំនួបដាច់ដោយឡែកមួយនៅទីក្រុងប្រ៊ុចសែល ប្រទេសបែលហ្ស៊ិក កាលពីថ្ងៃទី១៥ ខែធ្នូ ឆ្នាំ២០២២ អឺរ៉ុបបានដាក់លក្ខខណ្ឌឲ្យកម្ពុជាបើកលំហនយោបាយមុនការបោះឆ្នោតជាតិឆ្នាំ២០២៣ ជាថ្នូរនឹងប្រគល់ឲ្យប្រព័ន្ធអនុគ្រោះពន្ធ EBA ២០% ឡើងវិញ ក្រោយពីអឺរ៉ុបបានដកកាលពីខែសីហា ឆ្នាំ២០២០ ខណៈប្រព័ន្ធអនុគ្រោះពន្ធ GSP បានផុតកំណត់ចាប់ពីឆ្នាំ២០២០ ប៉ុន្តែរហូតមកដល់បច្ចុប្បន្ន សហរដ្ឋអាមេរិកនៅមិនទាន់ប្រកាសថា ខ្លួននឹងបន្តប្រព័ន្ធអនុគ្រោះពន្ធនេះឲ្យកម្ពុជាទៀតនៅឡើយ៕