មន្ត្រីសង្គមស៊ីវិលទទួលបន្ទុកសិទ្ធិការងារ អះអាងថា បញ្ហារបស់កម្មករនិយោជិតទាំងសេដ្ឋកិច្ចក្នុង និងក្រៅប្រព័ន្ធ កំពុងរងនូវវិបត្តិយ៉ាងធ្ងន់ធ្ងរដោយសារគោលនយោបាយរបស់រដ្ឋាភិបាលមិនទាន់ឆ្លើយតបទៅនឹងវិបត្តិទាំងនោះនៅឡើយ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា ប្រាប់សារព័ត៌មាន The Cambodia Daily នៅថ្ងៃទី១៦ មករា នេះថា សព្វថ្ងៃនេះប្រាក់ឈ្នួលគោលសម្រាប់ធានាជីវភាពរស់នៅរបស់កម្មករនិយោជិតនៅទូទាំងប្រទេស មិនទាន់ត្រូវបានអនុវត្តនៅឡើយទេ គឺមានតែខាងវិស័យកាត់ដេរ សម្លៀកបំពាក់ និងដេរស្បែកជើងប៉ុណ្ណោះ។
លោកបន្តថា ទោះបីជាវិស័យនេះមានប្រាក់ឈ្នួលគោលហើយក៏ដោយ ក៏នៅមិនទាន់អាចធានាការរស់នៅរបស់កម្មករនិយោជិតក្នុងជីវភាពសមរម្យបានដែរ ដូច្នេះពួកគេត្រូវតែបង្ខំចិត្តធ្វើការថែមម៉ោងបន្ថែមទៀត។
លោក មឿន តុលា លើកឡើងថា បញ្ហាដែលកើតមានលើកម្មករនិយោជិតមិនមែនត្រឹមតែប្រាក់ឈ្នួលដែលមានចំនួនតិចតួចមិនអាចឱ្យពួកគេរស់បានក្នុងជីវភាពសមរម្យប៉ុណ្ណោះទេ ប៉ុន្តែនៅមានបញ្ហាជាច្រើនទៀត ដូចជាលក្ខខណ្ឌការងារផ្សេងៗ ជាដើម ដែលអាជ្ញាធររដ្ឋ និងភាគីក្រុមហ៊ុនបានបង្កើតឡើងដើម្បីបង្កភាពស្មុគស្មាញដែលធ្វើឱ្យបាត់បង់អត្ថប្រយោជន៍របស់កម្មកររហូតមក។
មន្ត្រីសង្គមស៊ីវិលទទួលបន្ទុកសិទ្ធិការងាររូបនេះបញ្ជាក់ថា ប្រាក់ឈ្នួលគោល និងប្រាក់ខែគោលដែលកម្មករនិយោជិតទទួលបានជាង ១០០ដុល្លារអាមេរិកដូចសព្វថ្ងៃនេះ បើទោះបីជាមិនទាន់អាចធានាការរស់នៅរបស់ពួកគេក្នុងជីវភាពសមរម្យបានក៏ដោយ ប៉ុន្តែកម្មករនិយោជិតទាំងនោះបានធ្វើការតវ៉ាទាមទារច្រើនណាស់រហូតរងនូវការបង្ក្រាប ដែលធ្វើឱ្យពួកគេបាត់បង់ជីវិត ខណៈអ្នកខ្លះត្រូវចាប់ខ្លួន និងរងរបួសថែមទៀត។
ការអះអាងរបស់លោក មឿន តុលា ធ្វើឡើងក្រោយពីបេក្ខជនអនាគតនាយករដ្ឋមន្ត្រីរបស់បក្សកាន់អំណាច លោក ហ៊ុន ម៉ាណែត បានប្រកាសនៅក្នុងពិធីអាហារសាមគ្គីជាមួយមេដឹកនាំសហព័ន្ធសហជីព និងសមាគមដែលមាននិន្នាការគាំទ្របក្សកាន់អំណាច កាលពីថ្ងៃទី១៥ ខែមករា ឆ្នាំ២០២៣ ថា គណបក្សប្រជាជនកម្ពុជាបានផ្សារសាច់ផ្សារឈាមជាមួយកម្មករនិយោជិតតាំងពីដើមរៀងមក។
លោក ហ៊ុន ម៉ាណែត អះអាងថា បក្សកាន់អំណាចតែងយកចិត្តទុកដាក់ដោះស្រាយការលំបាកគ្រប់បែបយ៉ាង ដើម្បីផ្តល់នូវកិច្ចគាំពារ ការពារសិទ្ធិ និងអត្ថប្រយោជន៍ឱ្យកាន់តែច្រើនជូនដល់កម្មករនិយោជិត ដើម្បីបង្កើតទំនាក់ទំនងវិជ្ជាជីវៈ បង្កឱ្យមានភាពស្រុះស្រួលគ្នា និងភាពអាចទទួលយកបានពីគ្រប់ភាគីពាក់ព័ន្ធទាំងអស់។
កូនប្រុសច្បងមេដឹកនាំបក្សកាន់អំណាចរូបនេះបញ្ជាក់ថា លោក ហ៊ុន សែន តែងតែគិតគូរគ្រប់ជ្រុងជ្រោយ និងល្អិតល្អន់ ដើម្បីផ្តល់អត្ថប្រយោជន៍ឱ្យបានច្រើនជូនដល់កម្មករនិយោជិត ទាំងសេដ្ឋកិច្ចក្នុងប្រព័ន្ធ និងក្រៅប្រព័ន្ធ។ លោកបន្ថែមថា រយៈពេលជាង ៤០ឆ្នាំកន្លងមកនេះ លោក ហ៊ុន សែន បានដឹកនាំតាំងពីប្រជាជនមានកម្រិតជីវភាពទាបរហូតមានការរីកចម្រើន និងបន្តរុងរឿងសម្បូរហូរហៀរដូចសព្វថ្ងៃនេះ។
ទោះជាបែបនេះក្តី កាលពីចុងឆ្នាំ២០២២ អង្គការឃ្លាំមើលសិទ្ធិមនុស្ស Human Rights Watch បានចេញសេចក្តីរាយការណ៍សង្ខេបចំនួន ២៧ទំព័ររកឃើញថា រដ្ឋាភិបាលកម្ពុជាក្រោមការដឹកនាំរបស់លោក ហ៊ុន សែន មិនបានគោរពសិទ្ធិសេរីភាពជាមូលដ្ឋានរបស់ពលរដ្ឋឱ្យបានពេញលេញឡើយ ក្នុងនោះពួកគេបានធ្វើទុក្ខបុកម្នេញលើសហជីពឯករាជ្យ ប្រព្រឹត្តអំពើពុករលួយជាប្រព័ន្ធ រំលោភសិទ្ធិមនុស្សរាល់គ្រប់ទម្រង់ បំផ្លាញមូលដ្ឋានគ្រឹះនៃប្រជាធិបតេយ្យ និងវាយប្រហារលើក្រុមកូដករនៃក្រុមហ៊ុនណាហ្គាវើលដ៍ដែលទាមទារយុត្តិធម៌ពីការរំលោភសិទ្ធិការងារយ៉ាងធ្ងន់ធ្ងរ៕