ឯកអគ្គរាជទូតជប៉ុនប្រចាំកម្ពុជា លោក អ៊ូអិណុ អាត់ស៊ូស៊ី ថ្លែងថា រដ្ឋាភិបាលជប៉ុនខិតខំប្រឹងប្រែងដោយជំរុញការអភិវឌ្ឍតាមបែបប្រជាធិបតេយ្យក្នុងប្រទេសកម្ពុជា តាមរយៈកិច្ចសន្ទនារវាងរដ្ឋាភិបាល និងសង្គមស៊ីវិល ព្រមទាំងបក្សកាន់អំណាច ហើយនិងបក្សប្រឆាំង។
ការថ្លែងរបស់ឯកអគ្គរាជទូតជប៉ុនប្រចាំកម្ពុជា លោក អ៊ូអិណុ អាត់ស៊ូស៊ី ធ្វើឡើងក្នុងកិច្ចប្រជុំជាមួយតំណាងមកពីអង្គការសង្គមស៊ីវិលចំនួន ៩ និងបានពិភាក្សាគ្នាលើប្រធានបទជាច្រើន រួមមានបញ្ហាសង្គមផ្សេងៗ និងស្ថានភាពសិទ្ធិមនុស្សនៅកម្ពុជាកាលពីថ្ងៃទី១៥ ខែមីនា។
បើតាមហ្វេសប៊ុករបស់ស្ថានទូតជប៉ុននៅកម្ពុជា (Embassy of Japan in Cambodia) កាលពីថ្ងៃទី១៦ ខែមីនា បានលើកឡើងដោយដកស្រង់ប្រសាសន៍ឯកអគ្គរាជទូត លោក អ៊ូអិណុ អាត់ស៊ូស៊ី ថា រដ្ឋាភិបាលជប៉ុននឹងបន្តសហការជាមួយភាគីពាក់ព័ន្ធជាច្រើន រួមទាំងអង្គការសង្គមស៊ីវិល។ លោកបញ្ជាក់ថា សង្គមស៊ីវិលមានតួនាទីសំខាន់នៅក្នុងវិស័យជាច្រើន ដូចជាការអភិវឌ្ឍប្រកបដោយចីរភាព និងការលើកស្ទួយលទ្ធិប្រជាធិបតេយ្យជាដើម។ ដូច្នេះ លោក អ៊ូអិណុ អាត់ស៊ូស៊ី អះអាងថា កន្លងមក និងបច្ចុប្បន្ន រដ្ឋាភិបាលជប៉ុនខិតខំប្រឹងប្រែងដើម្បីជំរុញការអភិវឌ្ឍតាមបែបប្រជាធិបតេយ្យក្នុងប្រទេសកម្ពុជា តាមរយៈកិច្ចសន្ទនារវាងរដ្ឋាភិបាល និងសង្គមស៊ីវិល ក៏ដូចជារវាងគណបក្សកាន់អំណាច និងគណបក្សប្រឆាំងផងដែរ។
អង្គការសង្គមស៊ីវិលដែលឯកអគ្គរាជទូត លោក អ៊ូអិណុ អាត់ស៊ូស៊ី បានជួបកាលពីថ្ងៃទី១៥ ខែមីនា ឆ្នាំ២០២៣ ក្នុងនោះមានសមាគមការពារសិទ្ធិមនុស្សអាដហុក មជ្ឈមណ្ឌលសិទ្ធិមនុស្សកម្ពុជា អង្គការសង់ត្រាល់ អង្គការឃ្លាំមើលការបោះឆ្នោតខុមហ្វ្រែល សម្ព័ន្ធអ្នកសារព័ត៌មានកម្ពុជា និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ជាដើម។
ជំនួបពិភាក្សារវាងឯកអគ្គរាជទូតជាមួយសង្គមស៊ីវិល ស្របពេលដែលស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាត្រូវគេមើលឃើញថា បានធ្លាក់ចុះកាន់តែខ្លាំង ខណៈខែកុម្ភៈ ឆ្នាំ២០២៣ នេះ លោក ហ៊ុន សែន បានបិទសារព័ត៌មាន VOD និងកាត់ទោសលោក កឹម សុខា ឲ្យជាប់គុក ២៧ឆ្នាំ ពីបទ «សន្ទិដ្ឋភាពជាមួយបរទេស ឬឃុបឃិតត្រូវរ៉ូវជាមួយរដ្ឋបរទេសចង់ផ្ដួលរំលំរដ្ឋាភិបាល» ពាក់ព័ន្ធជាមួយសហរដ្ឋអាមេរិក។
ការបិទសារព័ត៌មាន VOD និងកាត់ទោសប្រធានគណបក្សសង្គ្រោះជាតិ លោក កឹម សុខា ស្របពេលកម្ពុជានឹងរៀបចំការបោះឆ្នោតថ្នាក់ជាតិនៅខែកក្កដា ខាងមុខនេះ៕