ប្រធានគណៈកម្មាធិការជាតិរៀបចំការបោះឆ្នោត អះអាងថា គ.ជ.ប នឹងអញ្ជើញស្ថានទូតរុស្ស៊ីប្រចាំនៅកម្ពុជា ចូលរួមសង្កេតការណ៍ការបោះឆ្នោតជ្រើសតាំងតំណាងរាស្ត្រអាណត្តិទី៧ នៅខែកក្កដា ឆ្នាំ២០២៣ ខាងមុខនេះក្នុងនាមជាភ្ញៀវពិសេស។
ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក ប្រាជ្ញ ចន្ទ បានចេញសេចក្តីប្រកាសព័ត៌មានកាលពីថ្ងៃទី២០ ខែមេសា ឆ្នាំ២០២៣ នេះថា សហព័ន្ធរុស្ស៊ី អះអាងថា ប្រជាធិបតេយ្យនៅកម្ពុជាមានលក្ខណៈសមស្របទៅកត្តាប្រជាសាស្ត្រ ភូមិសាស្ត្រ វប្បធម៌ និងនយោបាយជាក់ស្ដែងពិតប្រាកដរបស់កម្ពុជា។
លោក ប្រាជ្ញ ចន្ទ អះអាងថា ឯកអគ្គរដ្ឋទូតនៃសហព័ន្ធរុស្ស៊ីប្រចាំនៅកម្ពុជា លោក អាណាតូលី បូរ៉ូវីក (Anatoly BOROVIK) បានអបអរសាទរចំពោះគណៈកម្មាធិការជាតិរៀបចំការបោះឆ្នោតកម្ពុជា ដែលបានរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ កន្លងទៅដោយជោគជ័យក្នុងបរិយាកាសសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងគ្មានការគំរាមកំហែង។
លោក ប្រាជ្ញ ចន្ទ បញ្ជាក់ថា ឯកអគ្គរដ្ឋទូតនៃសហព័ន្ធរុស្ស៊ីប្រចាំនៅកម្ពុជា ក៏បានលើកឡើងដែរថា ចំពោះការបោះឆ្នោតជ្រើសតាំងតំណាងរាស្ត្រអាណត្តិទី៧ នៅខែកក្កដា ឆ្នាំ២០២៣ ខាងមុខនេះ គឺជាព្រឹត្តិការណ៍ប្រវត្តិសាស្ត្រដ៏សំខាន់បំផុតរបស់ប្រទេសកម្ពុជា ដែលសភាស៊ីវិលនៅសហព័ន្ធរុស្ស៊ី មានការចាប់អារម្មណ៍ និងតាមដានខ្លាំងបំផុត។
ការអះអាងនេះ ធ្វើឡើងបន្ទាប់ពីលោក ប្រាជ្ញ ចន្ទ បានជួបជាមួយឯកអគ្គរដ្ឋទូតនៃសហព័ន្ធរុស្ស៊ីប្រចាំកម្ពុជា លោក អាណាតូលី បូរ៉ូវីក (Anatoly BOROVIK) ដើម្បីពិភាក្សាការងារពាក់ព័ន្ធនឹងកិច្ចសហប្រតិបត្តិការរវាងគណៈកម្មាធិការមជ្ឈិមរៀបចំការបោះឆ្នោតនៃសហព័ន្ធរុស្ស៊ី ជាមួយនឹងគណៈកម្មាធិការជាតិរៀបចំការបោះឆ្នោតកម្ពុជានៅពេលនេះ។
ដំណើរការនៃការបោះឆ្នោតជាតិរបស់កម្ពុជាអាណត្តិទី៧ ឆ្នាំ២០២៣ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ខណៈប្រទេសសេរីប្រជាធិបតេយ្យមួយចំនួនមិនបានបញ្ជូនអ្នកសង្កេតការណ៍របស់ពួកគេមកពិនិត្យមើលការបោះឆ្នោតនេះទេ ដោយសារតែគេមើលឃើញថា ជាការបោះឆ្នោតដែលគ្មានតម្លាភាព។
កាលពីថ្ងៃទី១០ ខែមេសា ឆ្នាំ២០២៣ អតីតមេដឹកនាំបក្សប្រឆាំង លោក សម រង្ស៊ី អះអាងថា ប្រទេសបារាំង សហភាពអឺរ៉ុប សហរដ្ឋអាមេរិក ប្រទេសជប៉ុន និងប្រទេសប្រជាធិបតេយ្យទាំងអស់ក្នុងពិភពលោក បានសម្រេចថានឹងមិនបញ្ជូនអ្នកសង្កេតការណ៍របស់ពួកគេមកកម្ពុជានោះទេ សម្រាប់ចូលរួមការបោះឆ្នោតនៅខែកក្កដា ខាងមុខនេះ។
លោក សម រង្ស៊ី បញ្ជាក់ថា ដោយសារតែប្រទេសទាំងនោះចាត់ទុកថាការបោះឆ្នោតដែលរៀបចំដោយគណបក្សប្រជាជនកម្ពុជាក្នុងឆ្នាំ២០២៣ នេះ គឺជាការបោះឆ្នោតក្លែងក្លាយ ព្រោះថាគណៈកម្មាធិការជាតិរៀបចំការបោះឆ្នោត (គ.ជ.ប) បានក្លាយជាស្ថាប័នមួយដែលស្ថិតនៅក្រោមការចាត់ចែងរបស់បក្សកាន់អំណាចទៅហើយនោះ។
ទាក់ទិននឹងបញ្ហានេះ កាលពីអំឡុងខែមីនា ឆ្នាំ២០២៣ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានស្នើមន្ត្រីជាន់ខ្ពស់នៃក្រសួងការបរទេសបារាំង ឱ្យបញ្ជូនអ្នកសង្កេតការណ៍បារាំងមកពិនិត្យ និងសង្កេតមើលការបោះឆ្នោតជាតិនៅកម្ពុជាដែរ ប៉ុន្តែបារាំងនៅមិនទាន់ឆ្លើយតបថាតើនឹងបញ្ជូន ឬមិនបញ្ជូនអ្នកសង្កេតការណ៍បោះឆ្នោតមកកម្ពុជានៅឡើយទេ រហូតដល់ពេលនេះ។
គណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់បានបញ្ជាក់កាលពីពេលថ្មីៗនេះថា ក្រៅពីប្រទេសបារាំង រដ្ឋាភិបាលកម្ពុជាក៏បានអញ្ជើញអ្នកសង្កេតការណ៍មកពីប្រទេសអង់គ្លេស (U.K) អាល្លឺម៉ង់ (Germany) និងប៉ាឡេស្ទីន (Palestine ) ផងដែរ ប៉ុន្តែកម្ពុជានៅមិនទាន់បានទទួលចម្លើយពីប្រទេសទាំងនោះថានឹងមកចូលរួម ឬមិនមកចូលរួមនៅឡើយទេ។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី២១ មេសា នេះថា ការបោះឆ្នោតក្នុងឆ្នាំ២០២៣ នេះ សហគមន៍អន្តរជាតិរង់ចាំមើលតែវត្តមានរបស់ប្រធានគណបក្សសង្គ្រោះជាតិ លោក កឹម សុខា ប៉ុណ្ណោះ ដែលពួកគេនឹងទទួលស្គាល់លទ្ធផលនៃការបោះឆ្នោតនេះ ប៉ុន្តែបើគ្មានវត្តមានរបស់លោក កឹម សុខា ទេ ប្រទេសលោកសេរីទាំងនោះគ្មានហេតុផលណានឹងទទួលស្គាល់ការបោះឆ្នោតនេះឡើយ៕