 ប្រកាសថានៅពេលនេះមានគណបក្សនយោបាយចំនួន ៦ ហើយដែលបានចុះបញ្ជីគណបក្សនយោបាយ និងបញ្ជីបេក្ខជនតំណាងរាស្ត្រសម្រាប់ឈរឈ្មោះបោះឆ្នោតក្នុងការបោះឆ្នោតជ្រើសតាំងតំណាងរាស្ត្រអាណត្តិទី៧ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។){kind=link}
គណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសថានៅពេលនេះមានគណបក្សនយោបាយចំនួន ៦ ហើយដែលបានចុះបញ្ជីគណបក្សនយោបាយ និងបញ្ជីបេក្ខជនតំណាងរាស្ត្រសម្រាប់ឈរឈ្មោះបោះឆ្នោតក្នុងការបោះឆ្នោតជ្រើសតាំងតំណាងរាស្ត្រអាណត្តិទី៧ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
គណៈកម្មាធិការជាតិរៀបចំការបោះឆ្នោតបានចេញសេចក្តីប្រកាសព័ត៌មានកាលពីថ្ងៃទី២៥ ខែមេសា ឆ្នាំ២០២៣ ថា គិតត្រឹមថ្ងៃអង្គារ ទី២៥ មេសា មានគណបក្សចំនួន៦ ដូចជាគណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ គណបក្សធម្មាធិបតេយ្យ គណបក្សកម្លាំងប្រជាធិបតេយ្យ និងគណបក្សសញ្ជាតិកម្ពុជា បានដាក់បញ្ជីបេក្ខជនតំណាងរាស្ត្ររួចរាល់ហើយសម្រាប់ចូលរួមការបោះឆ្នោតនៅខែកក្កដា ខាងមុខនេះ។
គណៈកម្មាធិការជាតិរៀបចំការបោះឆ្នោត បញ្ជាក់ថា ក្នុងចំណោមគណបក្សទាំង៦ មានតែគណបក្សកម្លាំងប្រជាធិបតេយ្យមួយប៉ុណ្ណោះដែលដាក់បញ្ជីបេក្ខជនតំណាងរាស្ត្របានតែ ១២រាជធានីខេត្ត ខណៈគណបក្សនយោបាយ ៥ ផ្សេងទៀត បានដាក់បេក្ខជនគ្រប់ចំនួនទាំង ២៥រាជធានីខេត្តនៅទូទាំងប្រទេស។
គ.ជ.ប គូសបញ្ជាក់ថា ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះជាតំណាងរាស្ត្រសម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៧ ឆ្នាំ២០២៣ មានរយៈពេល ១៥ថ្ងៃ គឺចាប់ពីថ្ងៃទី២៤ ខែមេសា រហូតដល់ថ្ងៃទី៨ ខែឧសភា ឆ្នាំ២០២៣ ខាងមុខនេះ។
ដំណើរការនៃការបោះឆ្នោតជាតិរបស់ប្រទេសកម្ពុជាអាណត្តិទី៧ ឆ្នាំ២០២៣ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ខណៈប្រទេសសេរីប្រជាធិបតេយ្យមួយចំនួនមិនបានបញ្ជូនអ្នកសង្កេតការណ៍របស់ពួកគេមកពិនិត្យមើលការបោះឆ្នោតនេះទេ ដោយសារតែគេមើលឃើញថាជាការបោះឆ្នោតដែលគ្មានតម្លាភាព។
កាលពីថ្ងៃទី១០ ខែមេសា ឆ្នាំ២០២៣ អតីតមេដឹកនាំបក្សប្រឆាំង លោក សម រង្ស៊ី អះអាងថា ប្រទេសបារាំង សហភាពអឺរ៉ុប សហរដ្ឋអាមេរិក ប្រទេសជប៉ុន និងប្រទេសប្រជាធិបតេយ្យទាំងអស់ក្នុងពិភពលោក បានសម្រេចថានឹងមិនបញ្ជូនអ្នកសង្កេតការណ៍របស់ពួកគេមកប្រទេសកម្ពុជាទេសម្រាប់ចូលរួមការបោះឆ្នោតនៅខែកក្កដា ខាងមុខនេះ។
លោក សម រង្ស៊ី បញ្ជាក់ថា ដោយសារតែប្រទេសទាំងនោះចាត់ទុកថាការបោះឆ្នោតដែលរៀបចំដោយបក្សប្រជាជនកម្ពុជាក្នុងឆ្នាំ២០២៣ នេះ គឺជាការបោះឆ្នោតក្លែងក្លាយ ព្រោះថាគណៈកម្មាធិការជាតិរៀបចំការបោះឆ្នោត (គ.ជ.ប) បានក្លាយជាស្ថាប័នមួយដែលស្ថិតនៅក្រោមការចាត់ចែងរបស់បក្សកាន់អំណាចទៅហើយនោះ។
ទាក់ទិននឹងបញ្ហានេះ កាលពីអំឡុងខែមីនា ឆ្នាំ២០២៣ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានស្នើមន្ត្រីជាន់ខ្ពស់នៃក្រសួងការបរទេសបារាំង ឱ្យបញ្ជូនអ្នកសង្កេតការណ៍បារាំង មកពិនិត្យ និងសង្កេតមើលការបោះឆ្នោតជាតិនៅកម្ពុជាដែរ ប៉ុន្តែបារាំងនៅមិនទាន់ឆ្លើយតបថាតើនឹងបញ្ជូន ឬមិនបញ្ជូនអ្នកសង្កេតការណ៍បោះឆ្នោតមកកម្ពុជានៅឡើយទេរហូតដល់ពេលនេះ។
គណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់បានបញ្ជាក់កាលពីពេលថ្មីៗនេះថា ក្រៅពីប្រទេសបារាំង រដ្ឋាភិបាលកម្ពុជាក៏បានអញ្ជើញអ្នកសង្កេតការណ៍មកពីប្រទេសអង់គ្លេស (U.K) អាល្លឺម៉ង់ (Germany) និងប៉ាឡេស្ទីន (Palestine) ផងដែរ ប៉ុន្តែកម្ពុជានៅមិនទាន់បានទទួលចម្លើយពីប្រទេសទាំងនោះថានឹងមកចូលរួម ឬមិនមកចូលរួមនៅឡើយទេ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២៦ មេសា នេះថា ការមិនចូលរួមសង្កេតការណ៍ពីសហគមន៍អន្តរជាតិជុំវិញការបោះឆ្នោតនៅខែកក្កដា ខាងមុខនេះ នឹងមិនមានអ្វីដែលនាំឱ្យរាំងស្ទះដល់បក្សកាន់អំណាច ឬរដ្ឋាភិបាលដែលបង្កើតឡើងក្រោយការបោះឆ្នោតឡើយ ឱ្យតែប្រទេសលោកសេរីទាំងនោះអនុវត្តដូចដែលពួកគេបានធ្វើកន្លងមក។
លោក សេក សុជាតិ លើកឡើងថា ការបោះឆ្នោតក្រុមប្រឹក្សាឃុំ-សង្កាត់កាលពីខែមិថុនា ឆ្នាំ២០២២ក៏មិនមានការចូលរួមសង្កេតការណ៍ពីប្រទេសលោកសេរីខ្លះដែរ ប៉ុន្តែក្រោយការបោះឆ្នោត បក្សកាន់អំណាចនៅតែដឹកនាំរដ្ឋាភិបាល និងរៀបចំដំណើរការក្រុមប្រឹក្សាឃុំ-សង្កាត់របស់ពួកគេឱ្យធ្វើកិច្ចការដើម្បីចូលរួមការបោះឆ្នោតជាតិខាងមុខនេះបានដដែល៕