គណបក្សកែទម្រង់កម្ពុជាប្រកាសធ្វើពហិការមិនចូលរួមការបោះឆ្នោតជ្រើសរើសតំណាងរាស្ត្រនៅខែកក្កដា ឆ្នាំ២០២៣ ខាងមុខនេះទេ ដោយសារតែគណបក្សនេះមើលឃើញថា ស្ថានភាពនយោបាយនៅកម្ពុជាសព្វថ្ងៃមិនទាន់អនុគ្រោះឲ្យខ្លួនអាចចូលរួមប្រកួតប្រជែងតាមបែបប្រជាធិបតេយ្យឲ្យបានពេញលេញនៅឡើយ។
គណបក្សកែទម្រង់កម្ពុជា បានចេញសេចក្តីប្រកាសព័ត៌មានកាលពីថ្ងៃទី៤ ខែឧសភា ឆ្នាំ២០២៣ នេះថា ប្រសិនបើខ្លួនចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនៅថ្ងៃបោះឆ្នោតខាងមុខនេះ ក៏នឹងអាចធ្វើឲ្យប៉ះពាល់ដល់សន្លឹកឆ្នោតរបស់គណបក្សប្រជាធិបតេយ្យផ្សេងទៀតដែលកំពុងត្រៀមចូលរួមការបោះឆ្នោតនាពេលខាងមុខនេះដែរ។
គណបក្សខាងលើនេះបញ្ជាក់ថា ខ្លួនបង្កើតឡើង គឺដើម្បីចូលរួមដំណើរប្រជាធិបតេយ្យសម្រាប់រយៈពេលទៅមុខ និងជាគណបក្សដែលមានបំណងត្រួសត្រាយផ្លូវប្រជាធិបតេយ្យសម្រាប់យុវជនបន្តវេនទៅថ្ងៃអនាគតផងដែរ មិនមែនជាគណបក្សដែលបង្កើតឡើងដើម្បីជាន់ពន្លិច ឬធ្វើឲ្យរាំងស្ទះដល់ដំណើរការប្រជាធិបតេយ្យនោះឡើយ។
ការប្រកាសមិនចូលរួមការបោះឆ្នោតនេះ ធ្វើឡើងស្របពេលដែលការរៀបចំឲ្យមានការបោះឆ្នោតនៅខែកក្កដា ឆ្នាំ២០២៣ ខាងមុខនេះ ត្រូវគេរិះគន់ថាជាការបោះឆ្នោតដែលមិនប្រកបដោយសេរី ត្រឹមត្រូវ និងយុត្តិធម៌ ដោយសារតែជាការបោះឆ្នោតដែលគ្រប់គ្រងដោយបក្សកាន់អំណាច។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៥ ឧសភា នេះថា ការជ្រើសរើសចូលរួម ឬមិនចូលរួមក្នុងការបោះឆ្នោតខាងមុខនេះ គឺជាសិទ្ធិរបស់គណបក្សនយោបាយរៀងៗខ្លួន ប្រសិនបើពួកគេមើលឃើញថាការបោះឆ្នោតនោះមិនប្រកបដោយសេរី ត្រឹមត្រូវ និងយុត្តិធម៌ ចំណែកប្រជាពលរដ្ឋម្ចាស់ឆ្នោតក៏មានសិទ្ធិក្នុងការសម្រេចចិត្តបែបនេះដែរ បើពួកគាត់គិតថាការបោះឆ្នោតនេះមិនអាចធានានូវឆន្ទៈក្នុងការសម្ដែងមតិរបស់គាត់ស្របទៅតាមច្បាប់បានទេនោះ។
លោក សេក សុជាតិ លើកឡើងថា ការបោះឆ្នោតខាងមុខនេះ គឺជាព្រឹត្តិការណ៍ដែលសហគមន៍អន្តរជាតិកំពុងតែតាមដានដោយយកចិត្តទុកដាក់ បើទោះបីជាប្រទេសលោកសេរីប្រជាធិបតេយ្យខ្លះមិនបានដាក់អ្នកសង្កេតការណ៍ជុំវិញការបោះឆ្នោតនេះក៏ដោយ ព្រោះថាគេកំពុងរង់ចាំមើលថា តើដំណើរការនៃការបោះឆ្នោតនេះជាការបោះឆ្នោតមួយដែលមានតម្លាភាពអាចទទួលយកបានដែរឬទេ នៅពេលដែលអវត្តមានគណបក្សប្រឆាំងដែលគួរឲ្យទុកចិត្តបាន គឺគណបក្សសង្គ្រោះជាតិ និងអវត្តមានមេដឹកនាំបក្សប្រឆាំងដែលកំពុងរងនូវការផ្ដន្ទាទោសដាក់ពន្ធនាគារនៅពេលនេះ។
កាលពីថ្ងៃទី១០ ខែមេសា ឆ្នាំ២០២៣ អតីតមេដឹកនាំបក្សប្រឆាំង លោក សម រង្ស៊ី អះអាងថា ប្រទេសបារាំង សហភាពអឺរ៉ុប សហរដ្ឋអាមេរិក ប្រទេសជប៉ុន និងប្រទេសប្រជាធិបតេយ្យទាំងអស់ក្នុងពិភពលោក បានសម្រេចថានឹងមិនបញ្ជូនអ្នកសង្កេតការណ៍របស់ពួកគេមកប្រទេសកម្ពុជាទេសម្រាប់ចូលរួមការបោះឆ្នោតនៅខែកក្កដា ខាងមុខនេះ។
លោក សម រង្ស៊ី បញ្ជាក់ថា ដោយសារតែប្រទេសទាំងនោះចាត់ទុកថាការបោះឆ្នោតដែលរៀបចំដោយគណបក្សប្រជាជនកម្ពុជាក្នុងឆ្នាំ២០២៣ នេះ គឺជាការបោះឆ្នោតក្លែងក្លាយ ព្រោះថាគណៈកម្មាធិការជាតិរៀបចំការបោះឆ្នោត (គ.ជ.ប) បានក្លាយជាស្ថាប័នមួយដែលស្ថិតនៅក្រោមការចាត់ចែងរបស់បក្សកាន់អំណាចទៅហើយនោះ។
ទាក់ទិននឹងបញ្ហានេះ កាលពីអំឡុងខែមីនា ឆ្នាំ២០២៣ ប្រធានគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ បានស្នើមន្ត្រីជាន់ខ្ពស់នៃក្រសួងការបរទេសបារាំង ឱ្យបញ្ជូនអ្នកសង្កេតការណ៍បារាំងមកពិនិត្យ និងសង្កេតមើលការបោះឆ្នោតជាតិនៅកម្ពុជាដែរ ប៉ុន្តែបារាំងនៅមិនទាន់ឆ្លើយតបថា តើនឹងបញ្ជូនឬមិនបញ្ជូនអ្នកសង្កេតការណ៍បោះឆ្នោតមកកម្ពុជានៅឡើយទេរហូតដល់ពេលនេះ។
ចំណែកឯគណៈកម្មាធិការជាតិរៀបចំការបោះឆ្នោត (គ.ជ.ប) ក៏ធ្លាប់បានបញ្ជាក់កាលពីពេលថ្មីៗនេះដែរថា ក្រៅពីប្រទេសបារាំង រដ្ឋាភិបាលកម្ពុជាក៏បានអញ្ជើញអ្នកសង្កេតការណ៍មកពីប្រទេសអង់គ្លេស (U.K) អាល្លឺម៉ង់ (Germany) និងប៉ាឡេស្ទីន (Palestine) ផងដែរ ប៉ុន្តែពួកគេនៅមិនទាន់បានទទួលចម្លើយពីប្រទេសទាំងនោះដែរ។
កាលពីថ្ងៃទី២៥ ខែមេសា ឆ្នាំ២០២៣ គណៈកម្មាធិការជាតិរៀបចំការបោះឆ្នោតបានចេញសេចក្តីប្រកាសព័ត៌មានថា មានគណបក្សចំនួន ៦ ដូចជាគណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ គណបក្សធម្មាធិបតេយ្យ គណបក្សកម្លាំងប្រជាធិបតេយ្យ និងគណបក្សសញ្ជាតិកម្ពុជា បានដាក់បញ្ជីបេក្ខជនតំណាងរាស្ត្ររួចរាល់ហើយសម្រាប់ចូលរួមការបោះឆ្នោតនៅខែកក្កដា ខាងមុខនេះ ខណៈគណបក្សផ្សេងទៀតត្រូវគេមើលឃើញថាក៏កំពុងដាក់ឯកសារមក គ.ជ.ប ជាបន្តបន្ទាប់ផងដែរ ដើម្បីទទួលបានសិទ្ធិចូលរួមការបោះឆ្នោតនាពេលខាងមុខនេះ។
ដំណើរការនៃការបោះឆ្នោតជាតិរបស់ប្រទេសកម្ពុជាអាណត្តិទី៧ ឆ្នាំ២០២៣ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ខណៈប្រទេសសេរីប្រជាធិបតេយ្យមួយចំនួនមិនបានបញ្ជូនអ្នកសង្កេតការណ៍របស់ពួកគេមកពិនិត្យមើលការបោះឆ្នោតនេះទេ ដោយសារតែគេមើលឃើញថាជាការបោះឆ្នោតមួយដែលគ្មានតម្លាភាព៕