 អំពាវនាវដល់ភាគីពាក់ព័ន្ធ ជាពិសេសរាជរដ្ឋាភិបាលកម្ពុជា បង្កើនតម្លាភាពនៅក្នុងលទ្ធកម្មរបស់រដ្ឋាភិបាល ដោយធានាថាសេចក្ដីសម្រេចលើលទ្ធកម្ម និងព័ត៌មាននៅលើគ្រប់ដំណាក់កាលនៃដំណើរការលទ្ធកម្ម ត្រូវបានផ្សព្វផ្សាយជាសាធារណៈនៅក្នុងទម្រង់ដែលមិនស្មុគស្មាញ។){kind=link}
អង្គការតម្លាភាពកម្ពុជា (TI Cambodia) អំពាវនាវដល់ភាគីពាក់ព័ន្ធ ជាពិសេសរាជរដ្ឋាភិបាលកម្ពុជា បង្កើនតម្លាភាពនៅក្នុងលទ្ធកម្មរបស់រដ្ឋាភិបាល ដោយធានាថាសេចក្ដីសម្រេចលើលទ្ធកម្ម និងព័ត៌មាននៅលើគ្រប់ដំណាក់កាលនៃដំណើរការលទ្ធកម្ម ត្រូវបានផ្សព្វផ្សាយជាសាធារណៈនៅក្នុងទម្រង់ដែលមិនស្មុគស្មាញ។
យោងទៅតាមលទ្ធផលនៃកិច្ចប្រជុំសមាជិកភាពប្រចាំឆ្នាំ (AMM) លើកទីពីររបស់អង្គការតម្លាភាពកម្ពុជា (TI Cambodia) ផ្សព្វផ្សាយជាសាធារណៈនៅលើគេហទំព័រហ្វេសប៊ុករបស់ខ្លួនកាលពីថ្ងៃទី៣ ខែឧសភា ឆ្នាំ២០២៣ បានឲ្យដឹងថា ក្នុងគោលដៅបន្តចូលរួមក្នុងការប្រយុទ្ធប្រឆាំងនឹងអំពើពុករលួយ និងលើកកម្ពស់តម្លាភាព និងអភិបាលកិច្ចល្អនៅកម្ពុជា បានលើកអនុសាសន៍ដោយអំពាវនាវដល់ភាគីពាក់ព័ន្ធ ជាពិសេសរាជរដ្ឋាភិបាលកម្ពុជាបង្កើនតម្លាភាពនៅក្នុងលទ្ធកម្មរបស់រដ្ឋាភិបាល ធានាថាសេចក្ដីសម្រេចលើលទ្ធកម្ម និងព័ត៌មាននៅលើគ្រប់ដំណាក់កាលនៃដំណើរការលទ្ធកម្ម ត្រូវបានផ្សព្វផ្សាយជាសាធារណៈនៅក្នុងទម្រង់ដែលមិនស្មុគស្មាញ រួមទាំងតាមរយៈវេបផតថលផងដែរ ពង្រឹងការត្រួតពិនិត្យរបស់រដ្ឋ និងការពិនិត្យតាមដានជាសាធារណៈលើសេវាកម្ម ឬផលិតផលដែលផ្ដល់ដោយអ្នកទទួលកិច្ចសន្យា។
នៅក្នុងលិខិតដដែលក៏បានលើកឡើងចំនួន ៧ចំណុចបន្ថែមទៀត ភាគីពាក់ព័ន្ធ ជាពិសេសរាជរដ្ឋាភិបាលកម្ពុជា ពង្រឹងកិច្ចខិតខំប្រឹងប្រែងប្រឆាំងការសម្អាតប្រាក់ លើកកម្ពស់សិទ្ធិទទួលបានព័ត៌មាន បង្កើនការចូលរួមរបស់សាធារណជន ពង្រឹងការការពារអ្នករាយការណ៍អំពើពុករលួយ លើកកម្ពស់សេរីភាពសារព័ត៌មាន ជំរុញសុចរិតភាពក្នុងប្រព័ន្ធតុលាការ និងធានាបាននូវសុចរិតភាពនៃការបោះឆ្នោត។
កាលពីថ្ងៃទី២៧ ខែធ្នូ ឆ្នាំ២០២២ កន្លងមក អង្គការសង្គមស៊ីវិលចំនួន២ គឺអង្គការវិទ្យាស្ថានតស៊ូមតិ និងគោលនយោបាយ (API) អង្គការតម្លាភាពអន្តរជាតិកម្ពុជា (TI) បានផ្សព្វផ្សាយរបាយការណ៍ «សិក្សាស្រាវជ្រាវលើក្របខ័ណ្ឌច្បាប់លទ្ធកម្មសាធារណៈ» ដោយជំរុញឱ្យរដ្ឋាភិបាលបង្កើតប្រព័ន្ធមួយដែលអាចឱ្យសាធារណជនផ្តល់យោបល់ទៅលើផែនការលទ្ធកម្ម ឬវិធីកំណត់នូវតម្រូវការដោយបើកចំហយុត្តិធម៌នៅថ្នាក់ក្រោមជាតិ។
របាយការណ៍ដដែលបានផ្ដោតសំខាន់លើបញ្ហាបច្ចេកទេស ៧ចំណុច ដូចជាតម្លាភាព ការគ្រប់គ្រង គណនេយ្យភាព និងសុចរិតភាព ការគ្រប់គ្រង និងត្រួតពិនិត្យ សិទ្ធិប្តឹងទាមទារ ការចូលរួមពីសាធារណជន និងការបើកចំហ និងបរិយាប័ន្ន។
តាមរយៈរបាយការណ៍បានផ្តល់យោបល់ថា រដ្ឋាភិបាលគួរបង្កើតប្រព័ន្ធមួយដែលអនុញ្ញាតឱ្យសាធារណជនអាចផ្តល់យោបល់ទៅលើផែនការលទ្ធកម្ម និងគម្រោងលទ្ធកម្ម ដោយយកគណនេយ្យភាពសង្គមដែលបង្កើតឡើងដោយរដ្ឋបាលថ្នាក់ក្រោមជាតិជាគំរូ។
របាយការណ៍បន្តថា ដើម្បីជំរុញឱ្យមានការចូលរួមពីសាធារណជនឱ្យមានប្រសិទ្ធភាព ព័ត៌មានអំពីគម្រោងលទ្ធកម្មសាធារណៈ រួមមានព័ត៌មានអំពីតម្លៃ គុណភាព និងការអនុវត្ត គួរត្រូវបានបោះផ្សាយជូនសាធារណជនជាទម្រង់សង្ខេប និងងាយយល់។
ប្រភពដដែលបន្ថែមថា សាធារណជនអាចត្រូវបានតំណាងដោយសមាជិកសភា ឬក្រុមប្រឹក្សាថ្នាក់ក្រោមជាតិ ដើម្បីពិនិត្យ និងសម្រេចលើការចំណាយទៅលើគម្រោងលទ្ធកម្មសាធារណៈ។ ដូច្នេះ រាល់ថវិកាដែលត្រូវចំណាយទៅលើគម្រោងលទ្ធកម្មសាធារណៈ និងផែនការគម្រោងលទ្ធកម្មសាធារណៈ គួរត្រូវបានរាយការណ៍ជាសង្ខេបជូនសភា និងក្រុមប្រឹក្សាថ្នាក់ក្រោមជាតិ ភ្ជាប់ជាមួយនឹងឯកសារថវិកាប្រចាំឆ្នាំសម្រាប់ឱ្យសភា និងក្រុមប្រឹក្សាថ្នាក់ក្រោមជាតិពិនិត្យ និងសម្រេច៕