ក្រុមអ្នកតស៊ូមតិ ប្រកាសធ្វើយុទ្ធនាការពលរដ្ឋគេចពីការិយាល័យបោះឆ្នោត ចាប់ពីថ្ងៃទី៥ ខែមិថុនា រហូតដល់ថ្ងៃទី២២ ខែកក្កដា ឆ្នាំ២០២៣ នៅមុនការបោះឆ្នោតជាតិមកដល់ ហើយពួកគេនឹងបង្ហាញអំពីវិធីសាស្ត្រដែលពលរដ្ឋអាចគេចពីការិយាល័យបោះឆ្នោតបាននៅយប់ថ្ងៃទី២២ ខែកក្កដា ឆ្នាំ២០២៣ ដែលជាថ្ងៃស។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១ មិថុនា នេះថា លោកមិនប្រឆាំងការបោះឆ្នោតទេ ប៉ុន្តែលោកប្រឆាំងដាច់ខាតនឹងនយោបាយប្លន់អំណាច និងអំណាចផ្ដាច់ការគ្រួសារនិយម បំផ្លាញប្រយោជន៍ពលរដ្ឋ និងបុព្វហេតុជាតិរបស់ក្រុមគ្រួសារត្រកូលហ៊ុន។
លោកបន្ថែមថា ការធ្វើយុទ្ធនាការពលរដ្ឋគេចពីការិយាល័យបោះឆ្នោតនេះ ព្រោះតែលោកបានសិក្សាឃើញថា ថ្ងៃទី២៣ ខែកក្កដា ឆ្នាំ២០២៣ មិនមែនជាថ្ងៃបោះឆ្នោតឡើយ ប៉ុន្តែជាល្បែងបន្តប្លន់អំណាចរបស់ក្រុមគ្រួសារហ៊ុនប៉ុណ្ណោះ។
អ្នកវិភាគរូបនេះបញ្ជាក់ថា គោលដៅនៃយុទ្ធនាការនេះ គឺផ្ដោតលើរឿងពីរធំៗ គឺទី១ ការប្រឆាំងនឹងអំពើអយុត្តិធម៌ និងពុតត្បុតនយោបាយផ្ដាច់ការរបស់លោក ហ៊ុន សែន និងទី២ គឺដើម្បីរំឭកពលរដ្ឋខ្មែរ ជាពិសេសអ្នកនយោបាយខ្មែរឲ្យហ៊ានរកវិធីប្រកួត ក្រៅតែពីការពឹងលើការបោះឆ្នោត។
លោកបញ្ជាក់ថា ការបោះឆ្នោតគឺជាលក្ខខណ្ឌប្រកួតមួយហើយ ប៉ុន្តែនៅពេលគេបិទឱកាសមិនឲ្យចូលរួមបោះឆ្នោត គួរណាស់តែហ៊ានទាមទារយុត្តិធម៌ ធ្វើជាយុទ្ធនាការផ្សេងទៀតដើម្បីឱ្យការប្រកួតតាមរយៈនៃការបោះឆ្នោតនេះងាកទៅរកផ្លូវត្រឹមត្រូវតាមច្បាប់កំណត់។
លោក គឹម សុខ បញ្ជាក់ថា យុទ្ធនាការនេះមានអ្នកចូលរួមច្រើន ប៉ុន្តែទំនងជាមានអ្នកហ៊ានចេញមុខធ្វើមិនច្រើនទេ ព្រោះតែភាពតានតឹងនៃស្ថានការណ៍នយោបាយ ប៉ុន្តែលោកនឹងចាប់ផ្ដើមពន្យល់ពីមូលហេតុសំខាន់ៗ និងគោលដៅនៃយុទ្ធនាការនេះចាប់ពីថ្ងៃទី៥ ខែមិថុនា តទៅ ថាតើហេតុអ្វីបានជាពលរដ្ឋមិនត្រូវទៅចូលរួមបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ការប្រកាសធ្វើយុទ្ធនាការនេះ ធ្វើឡើងដើម្បីប្រឆាំងទៅនឹងការបោះឆ្នោតនៅខែកក្កដា ឆ្នាំ២០២៣ ខាងមុខនេះដែលរងនូវការរិះគន់ថាជាការបោះឆ្នោតដែលរៀបចំដោយបក្សកាន់អំណាចរបស់លោក ហ៊ុន សែន ដើម្បីប្លន់លទ្ធផលបោះឆ្នោតនៅពេលនោះ។
លោក គឹម សុខ ពន្យល់ថា ដែលហៅថាជាការបោះឆ្នោត លុះត្រាតែយ៉ាងហោចណាស់ភាគីនយោបាយខ្មែរទាំងអស់អាចចូលរួមបាន និងមានគណៈកម្មាធិការជាតិរៀបចំការបោះឆ្នោតមួយដែលគ្រប់ភាគីទទួលស្គាល់អំពីលក្ខណៈសម្បត្តិត្រឹមត្រូវតាមច្បាប់ក្នុងការរៀបចំការប្រកួតនេះ។
លោកបន្តថា តែផ្ទុយទៅវិញ គ.ជ.ប សព្វថ្ងៃ គឺស្ថិតនៅក្រោមឥទ្ធិពលអំណាចរបស់លោក ហ៊ុន សែន ទាំងស្រុង ហើយភាគីនយោបាយដែលមានឥទ្ធិពលផ្សេងទៀតដូចជាលោក កឹម សុខា លោក សម រង្ស៊ី និងគណបក្សភ្លើងទៀន ជាដើម ត្រូវគេបិទមិនឱ្យចូលរួមបោះឆ្នោតដោយប្រើលេសនៅលើមាត់របស់លោក ហ៊ុន សែន ប៉ុណ្ណោះ។
កាលពីថ្ងៃទី៣១ ខែឧសភា ឆ្នាំ២០២៣ មេដឹកនាំបក្សកាន់អំណាចលោក ហ៊ុន សែន បានទម្លាយសំឡេងសកម្មជនបក្សប្រឆាំងដែលស្និទ្ធនឹងអតីតមេដឹកនាំបក្សប្រឆាំងលោក សម រង្ស៊ី គឺលោក ឆាំ ឆានី ដែលបានប្រកាសធ្វើយុទ្ធនាការលើបណ្ដាញសង្គមហ្វេសប៊ុកដើម្បីប្រឆាំងដំណើរការនៃការបោះឆ្នោតខាងមុខនេះ។
លោក ឆាំ ឆានី បានណែនាំសមាជិកបក្សប្រឆាំងថា យុទ្ធនាការនេះគឺត្រូវនាំគ្នាបង្ហោះវីដេអូជា ៣ទម្រង់ ក្នុងនោះយុទ្ធនាការទី១ គឺត្រូវនិយាយអំពីលោក ស ខេង ខ្លាំង លោក ហ៊ុន សែន ខ្លាចជុំវិញការរារាំងមិនឱ្យគណបក្សភ្លើងទៀនចូលរួមការបោះឆ្នោតខាងមុខនេះ។
លោក ឆាំ ឆានី បញ្ជាក់ថា លោក ហ៊ុន សែន មិនមែនខ្លាចគណបក្សភ្លើងទៀនចូលរួមការបោះឆ្នោតខាងមុខនេះទេ ប៉ុន្តែអ្វីដែលគាត់ខ្លាចពិតប្រាកដនោះ គឺគាត់ខ្លាចលោក ស ខេង សហការជាមួយគណបក្សដែលមានសំឡេងក្នុងរដ្ឋសភាធ្វើពហិការមិនគាំទ្របេក្ខភាពនាយករដ្ឋមន្ត្រីរបស់លោក ហ៊ុន ម៉ាណែត។
ចំណែកយុទ្ធនាការទី២ គឺត្រូវប្រកាសឱ្យពលរដ្ឋធ្វើពហិការកុំទៅចូលរួមការបោះឆ្នោត ព្រោះពលរដ្ឋមានសិទ្ធិទៅបោះឆ្នោត ហើយក៏មានសិទ្ធិមិនទៅបោះឆ្នោតដែរនៅពេលដែលគ្មានគណបក្សដែលពួកគេស្រឡាញ់។
ដោយឡែកយុទ្ធនាការទី៣ គឺការប្រកាសឆ្លើយតបទៅនឹងការលើកឡើងរបស់លោក ហ៊ុន សែន ដែលថាក្នុងកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញ មិនបានចែងថាត្រូវតែមានបក្សប្រឆាំងនោះ គឺត្រូវនាំគ្នាឆ្លើយតបតាមវីដេអូឃ្លីបថា ក្នុងកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញ ក៏មិនបានចែងថា លោក ហ៊ុន ម៉ាណែត ត្រូវតែធ្វើជានាយករដ្ឋមន្ត្រីរបស់ប្រទេសកម្ពុជាដែរ។
ជុំវិញការប្រកាសយុទ្ធនាការនៃការប្រឆាំងការបោះឆ្នោតនេះ មេដឹកនាំបក្សកាន់អំណាចលោក ហ៊ុន សែន បានព្រមានកាលពីថ្ងៃទី៣១ ខែឧសភា ក្នុងពិធីសម្ពោធស្ពានឫស្សីកែវ ថា ឱ្យតែមានយុទ្ធនាការរបស់ក្រុមប្រឆាំងកើតឡើង សមត្ថកិច្ចត្រូវតែចាប់ខ្លួនមន្ត្រីគណបក្សភ្លើងទៀនទាំងថ្នាក់ជាតិ និងថ្នាក់ក្រោមជាតិដាក់គុកទាំងអស់ ដើម្បីឆ្លើយតបនឹងយុទ្ធនាការប្រឆាំងការបោះឆ្នោតខាងមុខនេះ៕