29 C
Phnom Penh

គ.ជ.ប អំពាវនាវ​ឱ្យ​បញ្ឈប់​ជាបន្ទាន់​ចំពោះ​ការ​ចែក​ចាយ​វីដេអូ​មិន​ឱ្យ​ពលរដ្ឋ​ទៅ​បោះឆ្នោត

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) អំពាវនាវ​ឲ្យ​បញ្ឈប់​ជាបន្ទាន់​ចំពោះ​ការ​ចែកចាយ​នូវ​សារ​ជា​រូបភាព និង​វីដេអូ​នៅ​លើ​បណ្ដាញ​សង្គម​ហ្វេសប៊ុក ដែល​បង្រៀន​ពលរដ្ឋ​ឲ្យ​គូស​សន្លឹកឆ្នោត​ចោល និង​មិន​ឲ្យ​ទៅ​បោះឆ្នោត។

គ.ជ.ប កាលពី​ថ្ងៃទី​៦ មិថុនា អំពាវនាវ​ឲ្យ​បញ្ឈប់​ជាបន្ទាន់​នូវ​សកម្មភាព​ទាំងឡាយ​ណា​ដែល​រារាំង​ដល់​ដំណើរការ​បោះឆ្នោត ជាពិសេស​ការ​ចែកចាយ​នូវ​សារ​ជា​រូបភាព និង​វីដេអូ​មួយ​ចំនួន​លើ​បណ្ដាញ​សង្គម​ហ្វេសប៊ុក​កាលពី​ពេល​ថ្មីៗ​នេះ ក្នុង​បំណង​ឲ្យ​ពលរដ្ឋ​គូស​សន្លឹកឆ្នោត​ចោល ឬ​មិន​ឲ្យ​ទៅ​បោះឆ្នោត ជាដើម។

គ.ជ.ប អះអាង​ថា យុទ្ធនាការ​នេះ​គឺជា​ការ​រំលោភ​បំពាន​លើ​មាត្រា​១៤២ នៃ​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ​យ៉ាង​ធ្ងន់ធ្ងរ ដែល​តម្រូវ​ឱ្យ​ផាក​ពិន័យ​ជា​ប្រាក់​ពី ៥,០០០,០០០ (ប្រាំ​លាន) រៀល​ទៅ ២០,០០០,០០០ (ម្ភៃ​លាន) រៀល ដោយ គ.ជ.ប ពុំ​ទាន់​គិត​ដល់​ទោស​ព្រហ្មទណ្ឌ​ផ្សេង​ទៀត​នៅឡើយ​ទេ។

គណៈកម្មាធិការ​ជាតិ​រៀបចំ​ការ​បោះឆ្នោត ព្រមាន​ថា ខ្លួន​នឹង​ចាត់​វិធានការ​យ៉ាង​ម៉ឺងម៉ាត់​បំផុត​ចំពោះ​សកម្មភាព​ទាំងឡាយ​ណា​ដែល​រំលោភ​លើ​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ និង​បទបញ្ជា​នានា ព្រមទាំង​នីតិវិធី​របស់ គ.ជ.ប ផ្សេង​ទៀត ដែល​ជា​ការ​រារាំង​ពលរដ្ឋ​មិន​ឱ្យ​ទៅ​បោះឆ្នោត និង​ជា​ការ​ធ្វើ​ឲ្យ​មាន​ការ​ភាន់ច្រឡំ​រហូត​ធ្វើ​ឲ្យ​បាត់​ទំនុកចិត្ត​លើ​ការ​បោះឆ្នោត និង​បង្ក​ការ​រំខាន​ដល់​ដំណើរការ​បោះឆ្នោត​ថែម​ទៀត​នោះ។

ក្នុង​រយៈពេល​ចុងក្រោយ​នេះ មាន​គណនី​ហ្វេសប៊ុក​មួយ​ចំនួន ដូចជា​ឈ្មោះ ឆាំ ឆានី និង​បណ្ដាញ​យុវជន​កម្ពុជា​សកល ជាដើម បាន​បង្ហោះ​សារ​លើ​បណ្ដាញ​សង្គម​ហ្វេសប៊ុក​ជំរុញ​ឲ្យ​ពលរដ្ឋ​ដែល​ទៅ​បោះឆ្នោត គូស​សន្លឹកឆ្នោត​ចោល បើ​គ្មាន​គណបក្ស​ដែល​ពួកគេ​ស្រឡាញ់។

កាលពី​ថ្ងៃទី​៣១ ខែ​ឧសភា ឆ្នាំ​២០២៣ មេដឹកនាំ​បក្ស​កាន់​អំណាច​លោក ហ៊ុន សែន បាន​ទម្លាយ​សំឡេង​សកម្មជន​បក្ស​ប្រឆាំង​ដែល​ស្និទ្ធ​នឹង​អតីត​មេដឹកនាំ​បក្ស​ប្រឆាំង​លោក សម រង្ស៊ី គឺ​លោក ឆាំ ឆានី ដែល​បាន​ប្រកាស​ធ្វើ​យុទ្ធនាការ​លើ​បណ្ដាញ​សង្គម​ហ្វេសប៊ុក​ដើម្បី​ប្រឆាំង​ដំណើរការ​នៃ​ការ​បោះឆ្នោត​ខាងមុខ​នេះ។

ជុំវិញ​ការ​ប្រកាស​យុទ្ធនាការ​នៃ​ការ​ប្រឆាំង​ការ​បោះឆ្នោត​នេះ មេដឹកនាំ​បក្ស​កាន់​អំណាច​លោក ហ៊ុន សែន បាន​ព្រមាន​កាលពី​ថ្ងៃទី​៣១ ខែ​ឧសភា ក្នុង​ពិធី​សម្ពោធ​ស្ពាន​ឫស្សីកែវ ថា ឱ្យ​តែ​មាន​យុទ្ធនាការ​របស់​ក្រុម​ប្រឆាំង​កើតឡើង សមត្ថកិច្ច​ត្រូវតែ​ចាប់​ខ្លួន​មន្ត្រី​គណបក្ស​ភ្លើង​ទៀន​ទាំង​ថ្នាក់​ជាតិ និង​ថ្នាក់​ក្រោម​ជាតិ​ដាក់​គុក​ទាំងអស់ ដើម្បី​ឆ្លើយតប​នឹង​យុទ្ធនាការ​ប្រឆាំង​ការ​បោះឆ្នោត​ខាងមុខ​នេះ។

កាលពី​ថ្ងៃទី​១៥ ខែ​ឧសភា ឆ្នាំ​២០២៣ គ.ជ.ប បាន​បដិសេធ​ការ​ចុះបញ្ជី​គណបក្ស​នយោបាយ​ឈរឈ្មោះ​បោះឆ្នោត​ជ្រើសតាំង​តំណាងរាស្ត្រ​នៅ​ខែ​កក្កដា របស់​គណបក្ស​ភ្លើង​ទៀន និង​គណបក្ស​មហា​សាមគ្គី​ជាតិ​ខ្មែរ ក្រោម​ហេតុផល​ថា គណបក្ស​នេះ​មិន​បាន​ភ្ជាប់​មក​ជាមួយ​នូវ​ប្រកាស​ស្ដីពី​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ ដែល​មាន​បញ្ជាក់​នីត្យានុកូលកម្ម​ដោយ​រដ្ឋបាល​រាជធានី​ខេត្ត ក្រុង ស្រុក​ខណ្ឌ នៅ​ច្រក​ចេញ​ចូល​តែ​មួយ។

ទាក់ទិន​នឹង​បញ្ហា​នេះ កាលពី​ថ្ងៃទី​១៥ ខែ​ឧសភា បណ្ដាញ​សហគមន៍​ខ្មែរ​នៅ​ក្រៅ​ប្រទេស​បាន​ចាប់ផ្តើម​ធ្វើ​យុទ្ធនាការ​ស្វែងរក​ហត្ថលេខា​អ្នកគាំទ្រ​តាម​ប្រព័ន្ធ​អនឡាញ​លើ​ញត្តិ​របស់​ពួកគេ ដើម្បី​ទាមទារ​ឲ្យ​ផ្អាក​ការ​បោះឆ្នោត​ជាតិ​នៅ​កម្ពុជា​ឆ្នាំ​២០២៣ នេះ ក្នុង​នោះ​ពួកគេ​អំពាវនាវ​ឲ្យ​ពលរដ្ឋ​ខ្មែរ​ម្ចាស់​ឆ្នោត​ទាំងអស់ ពហិការ​មិន​ចូលរួម​ការ​បោះឆ្នោត​នៅ​ចុងខែ​កក្កដា ខាងមុខ​នេះ​ផង​ដែរ។

ដំណើរការ​នៃ​ការ​បោះឆ្នោត​ជាតិ​អាណត្តិ​ទី​៧ នឹង​ប្រព្រឹត្ត​ទៅ​នៅ​អាទិត្យ ទី​២៣ ខែ​កក្កដា ឆ្នាំ​២០២៣ ខាងមុខ​នេះ ប៉ុន្តែ​ការ​បោះឆ្នោត​នេះ​មិន​មាន​ការ​ចូលរួម​សង្កេតការណ៍​ពី​សហគមន៍​អន្តរជាតិ​ទេ ដោយសារ​តែ​ពួកគេ​ចាត់ទុក​ថា​ការ​បោះឆ្នោត​ដែល​មិន​ប្រកប​ដោយ​សេរី ត្រឹមត្រូវ យុត្តិធម៌ និង​គ្មាន​តម្លាភាព៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស