32 C
Phnom Penh

គ.ជ.ប ស្នើ​ចាត់​វិធានការ​ទប់ស្កាត់​យុទ្ធនាការ​លើ​បណ្ដាញ​ហ្វេសប៊ុក​មិន​ឱ្យ​ពលរដ្ឋ​ទៅ​បោះឆ្នោត

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) បាន​ដាក់​ពាក្យ​ទៅ​អគ្គលេខាធិការដ្ឋាន​នៃ​គណៈកម្មការ​សន្តិសុខ​បោះឆ្នោត ស្នើសុំ​ចាត់​វិធានការ​ទប់ស្កាត់​ចំពោះ​យុទ្ធនាការ​ដែល​ចែកចាយ​នូវ​សារ​ជា​រូបភាព និង​វីដេអូ​នៅ​លើ​បណ្ដាញ​សង្គម​ហ្វេសប៊ុក ដែល​ឲ្យ​ប្រជាពលរដ្ឋ​គូស​សន្លឹកឆ្នោត​ចោល និង​មិន​ឲ្យ​ទៅ​បោះឆ្នោត។

អ្នក​នាំពាក្យ គ.ជ.ប លោក ហង្ស ពុទ្ធា បាន​ប្រាប់​សារព័ត៌មាន​ក្នុង​ស្រុក​ថា គ.ជ.ប បាន​ដាក់​ពាក្យ​ទៅ​អគ្គលេខាធិការដ្ឋាន​នៃ​គណៈកម្មការ​សន្តិសុខ​បោះឆ្នោត ស្នើសុំ​ចាត់​វិធានការ​ទប់ស្កាត់​ចំពោះ​យុទ្ធនាការ​ដែល​ចែកចាយ​នូវ​សារ​ជា​រូបភាព និង​វីដេអូ​នៅ​លើ​បណ្ដាញ​សង្គម​ហ្វេសប៊ុក ដែល​ឲ្យ​ប្រជាពលរដ្ឋ​គូស​សន្លឹកឆ្នោត​ចោល និង​មិន​ឲ្យ​ទៅ​បោះឆ្នោត។

លោក ហង្ស ពុទ្ធា បន្ត​ថា ការ​ស្នើ​របស់ គ.ជ.ប ធ្វើឡើង​បន្ទាប់ពី​ជន​មួយ​ចំនួន​បាន​ធ្វើ​យុទ្ធនាការ​តាមរយៈ​ខិត្តប័ណ្ណ រូបភាព ឬ​ស្ប៉ត​ឃោសនា​នានា​តាម​បណ្ដាញ​ព័ត៌មាន​សង្គម ដោយ​អំពាវនាវ​ឱ្យ​ប្រជាពលរដ្ឋ​គូស​សន្លឹកឆ្នោត​ចោល មិន​ឱ្យ​ទៅ​បោះឆ្នោត ព្រោះ​ ​គ្មាន​គណបក្ស​ភ្លើង​ទៀន។

ប្រភព​ដដែល​លើកឡើង​ថា លោក​អំពាវនាវ​ដល់​ប្រជាពលរដ្ឋ​ដែល​មាន​ឈ្មោះ​ក្នុង​បញ្ជី​បោះឆ្នោត ត្រៀម​ខ្លួន​ចេញ​ទៅ​បោះឆ្នោត ដោយ​កុំ​យក​ព័ត៌មាន​ទាំងឡាយ​ណា​ដែល​មិន​ចេញពី គ.ជ.ប ធ្វើការ​រំខាន​ក្នុង​អារម្មណ៍​ផ្លូវចិត្ត​ឲ្យ​សោះ ហើយ​អ្នក​ដែល​រំខាន ឬ​ក៏​ញុះញង់​ដល់​ការ​បោះឆ្នោត នឹង​ត្រូវ​ទទួល​ទោស​តាម​ផ្លូវ​ច្បាប់។

លោក ហង្ស ពុទ្ធា លើកឡើង​ថា យុទ្ធនាការ​នេះ​គឺជា​សកម្មភាព​ដែល​ប្រាសចាក​ទៅ​នឹង​ព្រះរាជសារ​អំពាវនាវ​ឱ្យ​ទៅ​បោះឆ្នោត​របស់​ព្រះករុណា​ព្រះបាទ​សម្តេច ព្រះបរមនាថ​នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ចុះ​ថ្ងៃទី​៨ ខែ​កុម្ភៈ ឆ្នាំ​២០២៣។

គួរ​បញ្ជាក់​ផង​ដែរ​ថា កាលពី​ថ្ងៃទី​៦ ខែ​មិថុនា ឆ្នាំ​២០២៣ គ.ជ.ប បាន​ចេញ​សេចក្តី​ប្រកាស​ព័ត៌មាន​ដោយ​អំពាវនាវ​ឲ្យ​បញ្ឈប់​ជាបន្ទាន់​នូវ​សកម្មភាព​ទាំងឡាយ​ណា​ដែល​រារាំង​ដល់​ដំណើរការ​បោះឆ្នោត ជាពិសេស​ការ​ចែកចាយ​នូវ​សារ​ជា​រូបភាព និង​វីដេអូ​មួយ​ចំនួន​លើ​បណ្ដាញ​សង្គម​ហ្វេសប៊ុក​ថ្មីៗ​នេះ ក្នុង​បំណង​ឲ្យ​ប្រជាពលរដ្ឋ​គូស​សន្លឹកឆ្នោត​ចោល និង​មិន​ឲ្យ​ទៅ​បោះឆ្នោត​ជាដើម។

គ.ជ.ប អះអាង​ថា យុទ្ធនាការ​នេះ​គឺជា​ការ​រំលោភ​បំពាន​លើ​មាត្រា​១៤២ នៃ​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ​យ៉ាង​ធ្ងន់ធ្ងរ ដែល​តម្រូវ​ឱ្យ​ផាក​ពិន័យ​ជា​ប្រាក់​ពី ៥,០០០,០០០ (ប្រាំ​លាន) រៀល​ទៅ ២០,០០០,០០០ (ម្ភៃ​លាន) រៀល ដោយ គ.ជ.ប ពុំ​ទាន់​គិត​ដល់​ទោស​ព្រហ្មទណ្ឌ​ផ្សេង​ទៀត​នៅឡើយ​ទេ។

គណនី​ហ្វេសប៊ុក​ឈ្មោះ ឆាំ ឆានី និង​បណ្ដាញ​យុវជន​កម្ពុជា​សកល បាន​បង្ហោះ​សារ​លើ​បណ្ដាញ​សង្គម​ហ្វេសប៊ុក​ឱ្យ​ប្រជាពលរដ្ឋ​ដែល​ទៅ​បោះឆ្នោត គូស​សន្លឹកឆ្នោត​ចោល បើ​គ្មាន​គណបក្ស​ដែល​ពួកគេ​ស្រឡាញ់។

កាលពី​ថ្ងៃទី​១៥ ខែ​ឧសភា ឆ្នាំ​២០២៣ កន្លងមក បណ្ដាញ​សហគមន៍​ខ្មែរ​នៅ​ក្រៅ​ប្រទេស​បាន​ចាប់ផ្តើម​ធ្វើ​យុទ្ធនាការ​ស្វែងរក​ហត្ថលេខា​អ្នកគាំទ្រ​តាម​ប្រព័ន្ធ​អនឡាញ​លើ​ញត្តិ​របស់​ពួកគេ ដើម្បី​ទាមទារ​ឲ្យ​ផ្អាក​ការ​បោះឆ្នោត​ជាតិ​នៅ​កម្ពុជា​ឆ្នាំ​២០២៣ នេះ ក្នុង​នោះ​ពួកគេ​អំពាវនាវ​ឲ្យ​ពលរដ្ឋ​ខ្មែរ​ម្ចាស់​ឆ្នោត​ទាំងអស់​ពហិការ​មិន​ចូលរួម​ការ​បោះឆ្នោត​នៅ​ចុងខែ​កក្កដា ខាងមុខ​នេះ​ផង​ដែរ។

ជុំវិញ​ការ​ប្រកាស​យុទ្ធនាការ​នៃ​ការ​ប្រឆាំង​ការ​បោះឆ្នោត​នេះ មេដឹកនាំ​បក្ស​កាន់​អំណាច​លោក ហ៊ុន សែន បាន​ព្រមាន​កាលពី​ថ្ងៃទី​៣១ ខែ​ឧសភា ក្នុង​ពិធី​សម្ពោធ​ស្ពាន​ឫស្សីកែវ ថា ឱ្យ​តែ​មាន​យុទ្ធនាការ​របស់​ក្រុម​ប្រឆាំង​កើតឡើង សមត្ថកិច្ច​ត្រូវតែ​ចាប់​ខ្លួន​មន្ត្រី​គណបក្ស​ភ្លើង​ទៀន​ទាំង​ថ្នាក់​ជាតិ និង​ថ្នាក់​ក្រោម​ជាតិ​ដាក់​គុក​ទាំងអស់ ដើម្បី​ឆ្លើយតប​នឹង​យុទ្ធនាការ​ប្រឆាំង​ការ​បោះឆ្នោត​ខាងមុខ​នេះ។

កាលពី​ថ្ងៃទី​១៥ ខែ​ឧសភា ឆ្នាំ​២០២៣ គណៈកម្មាធិការ​ជាតិ​រៀបចំ​ការ​បោះឆ្នោត​បាន​ចេញ​សេចក្តី​សម្រេច​បដិសេធ​ការ​ចុះបញ្ជី​គណបក្ស​នយោបាយ​ឈរឈ្មោះ​បោះឆ្នោត​ជ្រើសតាំង​តំណាងរាស្ត្រ​នៅ​ខែ​កក្កដា របស់​គណបក្ស​ភ្លើង​ទៀន និង​គណបក្ស​មហា​សាមគ្គី​ជាតិ​ខ្មែរ ក្រោម​ហេតុផល​ថា គណបក្ស​នេះ​មិន​បាន​ភ្ជាប់​មក​ជាមួយ​នូវ​ប្រកាស​ស្ដីពី​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ​ដែល​មាន​បញ្ជាក់​នីត្យានុកូលកម្ម​ដោយ​រដ្ឋបាល​រាជធានី​ខេត្ត ក្រុង ស្រុក​ខណ្ឌ នៅ​ច្រក​ចេញ​ចូល​តែ​មួយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស