កូនប្រុសច្បងរបស់បុរសខ្លាំងដែលកំពុងត្រៀមស្នងមរតកអំណាចពីលោក ហ៊ុន សែន គឺលោក ហ៊ុន ម៉ាណែត លើកឡើងថា គណបក្សប្រជាជនកម្ពុជាគឺជាគណបក្សដែលស្លាប់មិនដូរឈ្មោះ រស់មិនដូរត្រកូល ទោះកាលៈទេសៈណាក៏ដោយ។
បេក្ខជនអនាគតនាយករដ្ឋមន្ត្រីបក្សកាន់អំណាចដ៏ចម្រូងចម្រាស លោក ហ៊ុន ម៉ាណែត បង្ហោះវីដេអូលើគណនីហ្វេសប៊ុករបស់ខ្លួននៅថ្ងៃទី១៥ មិថុនា នេះថា គណបក្សប្រជាជនកម្ពុជាឈ្មោះដដែល បុព្វហេតុដដែល តែលទ្ធផលមិនដដែលទេ គឺធ្វើការកែទម្រង់វិធីសាស្ត្រដើម្បីបម្រើប្រជាជន និងប្រទេសជាតិឲ្យកាន់តែប្រសើរជានិច្ច។
កូនប្រុសរបស់លោក ហ៊ុន សែន ដែលកំពុងរៀបផែនការប្លន់តំណែងនាយករដ្ឋមន្ត្រី លោក ហ៊ុន ម៉ាណែត អំពាវនាវឱ្យប្រជាពលរដ្ឋខ្មែរជឿទុកចិត្តលើគណបក្សប្រជាជនកម្ពុជា ថាបក្សនេះនឹងបន្តផ្លាស់ប្ដូរនូវសមិទ្ធផលថ្មីៗកាន់តែល្អជូនប្រទេសជាតិ និងប្រជាជនបន្តទៀត ហើយនេះក៏ជាការប្ដេជ្ញាចិត្តដែលមានក្នុងគោលនយោបាយរបស់គណបក្សប្រជាជនកម្ពុជាដែរ។
គណបក្សប្រជាជនកម្ពុជា មានឈ្មោះដើមថា «បក្សប្រជាជនបដិវត្តន៍កម្ពុជា» ដែលត្រូវបានបង្កើតឡើងដោយលោក សឺន ង៉ុក មិញ ហៅអាចារ្យ មៀន កាលពីថ្ងៃទី២៨ ខែមិថុនា ឆ្នាំ១៩៥១ ចំណែកលោក សឺន ង៉ុក មិញ ដែលមានឈ្មោះជាភាសាវៀតណាមថា ផាម យ៉ាំង ហួ (Phạm Văn Hua) គឺជាអតីតសមាជិកបក្សកុម្មុយនីស្តឥណ្ឌូចិន ដែលត្រូវបានបង្កើតឡើងដោយលោក ហូ ជី មិញ (Ho Chi Minh) តាំងពីឆ្នាំ១៩៣០ ខណៈនាយករដ្ឋមន្ត្រីខ្មែរលោក ហ៊ុន សែន ក៏ជាមេដឹកនាំដែលកងទ័ពវៀតណាមលើកបន្តុបកាលពីឆ្នាំ១៩៨៥ ដែរ។
បើគិតចាប់តាំងពីគណបក្សប្រជាជនកម្ពុជា ត្រូវបានបង្កើតឡើងកាលពីឆ្នាំ១៩៥១ រហូតដល់ឆ្នាំ២០២៣ នេះ គណបក្សនេះមានអាយុកាល ៧២ឆ្នាំហើយ។ បច្ចុប្បន្ន គណបក្សនេះបានក្លាយជាគណបក្សស្របច្បាប់មួយ និងធ្វើសកម្មភាពនយោបាយពេញទំហឹងនៅក្នុងប្រទេសកម្ពុជា ក្រោមការគ្រប់គ្រងរបស់មេដឹកនាំខ្មែរលោក ហ៊ុន សែន ដែលវៀតណាមលើកបន្តុបដូចគ្នាដែរ ក្រោមការសន្យាបម្រើមហិច្ឆតាវៀតណាមគ្រប់បែបយ៉ាងទាំងអស់។
មុននឹងប្តូរឈ្មោះមកជា «គណបក្សប្រជាជនកម្ពុជា» ដើម្បីចូលមកគ្រប់គ្រងទឹកដីខ្មែរ គណបក្សនេះបានប្តូរឈ្មោះចំនួន ៣ដងរួចទៅហើយទៅតាមសម័យកាលដឹកនាំនៃរបបនីមួយៗ។ ជាក់ស្តែងនៅចុងឆ្នាំ១៩៦០ បន្ទាប់ពីមហាសន្និបាតបក្សលើកទី២ «បក្សប្រជាជនបដិវត្តន៍កម្ពុជា» ត្រូវបានប្តូរឈ្មោះទៅជា «បក្សពលករកម្ពុជា» ប៉ុន្តែនៅឆ្នាំ១៩៦៦ ដោយចង់ផ្ដាច់ខ្លួនចេញពីបក្សកុម្មុយនីស្តវៀតណាម មេដឹកនាំខ្មែរក្រហមលោក ប៉ុល ពត បានសម្រេចប្តូរឈ្មោះពី «បក្សពលករកម្ពុជា» ទៅជា «បក្សកុម្មុយនីស្តកម្ពុជា» វិញ។
យ៉ាងណាក៏ដោយ ក្រោយទទួលបានជ័យជម្នះនៅថ្ងៃទី៧ ខែមករា ឆ្នាំ១៩៧៩ កងទ័ពវៀតណាមដែលបានចូលឈ្លានពានកម្ពុជានៅពេលនោះ បានលើកបន្តុបរដ្ឋាភិបាលថ្មីមួយដែលសមាសភាពដូចជា លោក ប៉ែន សុវណ្ណ លោក ចាន់ ស៊ី លោក ហ៊ុន សែន លោក ជា ស៊ីម និងលោក ហេង សំរិន ជាដើម ឱ្យដឹកនាំកម្ពុជា ប៉ុន្តែត្រូវស្ថិតក្រោមការចាត់ចែងរបស់រដ្ឋាភិបាលវៀតណាមទាំងអស់ ហើយស្របពេលជាមួយគ្នានោះ អតីតមេកម្មាភិបាលខ្មែរក្រហមទាំងនោះក៏បានប្តូរឈ្មោះ «បក្សកុម្មុយនីស្តកម្ពុជា» មកឈ្មោះដើមវិញ គឺ «បក្សប្រជាជនបដិវត្តន៍កម្ពុជា»។
ប៉ុន្តែនៅទីបំផុត ក្នុងឆ្នាំ១៩៩១ «បក្សប្រជាជនបដិវត្តន៍កម្ពុជា» ត្រូវបានគេប្ដូរឈ្មោះទៅជា «គណបក្សប្រជាជនកម្ពុជា» និងត្រូវស្ថិតក្រោមការដឹកនាំរបស់លោក ហ៊ុន សែន ចាប់តាំងពីថ្ងៃទី២០ ខែមិថុនា ឆ្នាំ២០១៥ មក បន្ទាប់មេដឹកនាំមុនៗរបស់បក្សនេះត្រូវបានចាប់ខ្លួន និងស្លាប់ជាបន្តបន្ទាប់ ដូចជាលោក ប៉ែន សុវណ្ណ លោក ចាន់ ស៊ី និងលោក ជា ស៊ីម ជាដើម។
អ្នកតាមដានស្ថានការណ៍កម្ពុជាលោក សុខ សុគន្ធ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលកន្លងទៅថា អ្នកគាំទ្របក្សកាន់អំណាចរបស់លោក ហ៊ុន សែន ពួកគេមិនបានដឹងទាល់តែសោះថា បក្សនេះបង្កើតឡើងដោយនរណា ក្នុងផែនការអ្វី និងស្ថិតក្រោមការគ្រប់គ្រងរបស់អ្នកណានោះទេ ប៉ុន្តែការចូលរួមរបស់ពួកគេគឺដោយសារតែខ្លាចការគំរាមកំហែង និងការគាបសង្កត់របស់មេដឹកនាំរបស់បក្សនេះតែប៉ុណ្ណោះ។
លោក សុខ សុគន្ធ បញ្ជាក់ថា កម្ពុជាក្រោមការដឹកនាំរបស់អតីតបក្សកុម្មុយនីស្តវៀតណាម បានធ្វើឱ្យកម្ពុជាធ្លាក់ចូលទៅក្នុងការគ្រប់គ្រងរបស់បរទេសឈ្លានពានបន្តិចម្តងៗ តាមរយៈនៃការផ្តល់ឯកសារខុសច្បាប់នានា ដែលមានការចុះកិច្ចព្រមព្រៀងរវាងមេដឹកនាំខ្មែរដែលវៀតណាមលើកបន្តុប និងរដ្ឋាភិបាលវៀតណាម តាំងពីទសវត្សឆ្នាំ១៩៨០ រហូតដល់សព្វថ្ងៃនេះ។
ជាក់ស្តែង កាលពីខែកក្កដា ឆ្នាំ២០២០ អគ្គលេខាធិការមជ្ឈិមបក្សវៀតណាម និងជាប្រធានរដ្ឋវៀតណាម លោក ង្វៀន ភូទ្រង់ ធ្លាប់បានជំរុញឲ្យលោក ហ៊ុន សែន បន្តអនុវត្តកិច្ចសន្យារវាងកម្ពុជា-វៀតណាម ឲ្យបានល្អបន្តទៀត ខណៈមេដឹកនាំខ្មែរលោក ហ៊ុន សែន មិនបានបដិសេធនឹងសំណើរបស់មេដឹកនាំវៀតណាមឡើយ។
ជុំវិញបញ្ហានេះ ក្រុមអ្នកសង្កេតការណ៍លើកឡើងថា ក្រោមកិច្ចព្រមព្រៀងខុសច្បាប់ទាំងនេះ រដ្ឋាភិបាលវៀតណាមបានកាត់ឆ្វៀលយកទឹកដីខ្មែរជាច្រើនអន្លើ ដូចជាចង្កោមកោះក្រចកសេះ គ្រប់គ្រងដែនអាកាស ព្រមទាំងដាក់ផ្ទៃសមុទ្រទំហំ ១ម៉ឺនគីឡូម៉ែត្រក្រឡាដែលជាកម្មសិទ្ធិរបស់កម្ពុជា ឲ្យទៅជាដែនទឹករួមគ្នាជាមួយវៀតណាម ផងដែរ៕