វេទិកាពលរដ្ឋដែលមានមូលដ្ឋាននៅសហរដ្ឋអាមេរិក ថ្កោលទោសដាច់អហង្ការចំពោះសមាជិកគណបក្សប្រជាជនកម្ពុជាដែលស្និទ្ធនឹងគ្រួសារត្រកូល ហ៊ុន គឺលោក ផែង វណ្ណៈ ដែលបានគំរាមសម្លាប់លើប្រធានផ្នែកប្រព័ន្ធផ្សព្វផ្សាយនៃសារព័ត៌មាន The Cambodia Daily ជាភាសាខ្មែរ ដោយស្នើឲ្យរដ្ឋាភិបាលរបស់លោក ហ៊ុន សែន ចាត់វិធានការផ្លូវច្បាប់លើបុគ្គលឈ្មោះ ផែង វណ្ណៈ ដើម្បីធានានូវការអនុវត្តច្បាប់របស់កម្ពុជា។
អគ្គលេខាធិការវេទិកាពលរដ្ឋ លោក អ៊ាប គឹមសេង បានចេញសេចក្តីថ្លែងការណ៍កាលពីថ្ងៃទី២២ ខែមិថុនា នេះថា វេទិកាពលរដ្ឋសូមថ្កោលទោសដាច់អហង្ការចំពោះសមាជិកគណបក្សប្រជាជនកម្ពុជាដែលស្និទ្ធនឹងគ្រួសារត្រកូល ហ៊ុន គឺលោក ផែង វណ្ណៈ ដែលបានជេរប្រមាថបែបអវិជ្ជាជាទីបំផុត រហូតដល់គំរាមសម្លាប់លើប្រធានផ្នែកប្រព័ន្ធផ្សព្វផ្សាយនៃសារព័ត៌មាន The Cambodia Daily ជាភាសាខ្មែរកាលពីថ្ងៃទី១៩ ខែមិថុនា ឆ្នាំ២០២៣ កន្លងទៅនេះ។
លោក អ៊ាប គឹមសេង អះអាងថា សម្ដីរបស់បុគ្គលឈ្មោះ ផែង វណ្ណៈ ដែលបានប្រើពាក្យប្រមាថអាយុជីវិតអ្នកដទៃដោយអំពើឃាតកម្ម គឺជាការបង្ហាញថា របបដឹកនាំសង្គមកម្ពុជាសព្វថ្ងៃក្រោមអំណាចរបស់លោក ហ៊ុន សែន គឺស្រដៀងនឹងរបប ប៉ុល ពត យ៉ាងខ្លាំង បើបុគ្គល ផែង វណ្ណៈ នៅតែអាចបន្តគំរាមសម្លាប់អ្នកដទៃដូចសព្វថ្ងៃនេះទៀតនោះ។
អគ្គលេខាធិការវេទិកាពលរដ្ឋរូបនេះបញ្ជាក់ថា មានតែរបប ប៉ុល ពត ប៉ុណ្ណោះដែលភ្នាក់ងាររបស់អង្គការគ្រប់លំដាប់ថ្នាក់មានសិទ្ធិសម្លាប់ពលរដ្ឋដែលគ្មានកំហុសតាមទំនើងចិត្ត ដូច្នេះ តើឯណាទៅសិទ្ធិរស់រានមានជីវិតជាមូលដ្ឋានរបស់ពលរដ្ឋខ្មែរ ដែលមន្ត្រីរដ្ឋាភិបាលគណបក្សប្រជាជនកម្ពុជាសូត្រឃោសនារាល់ថ្ងៃ និងអះអាងថាត្រូវតែអនុវត្តឲ្យបាននោះ?
អគ្គលេខាធិការវេទិកាពលរដ្ឋ លោក អ៊ាប គឹមសេង បញ្ជាក់ថា ក្រោយពីបានស្ដាប់ប្រតិកម្មរបស់ប្រជាពលរដ្ឋទូទៅ វេទិកាពលរដ្ឋបានដឹងយ៉ាងច្បាស់ថា ពួកគាត់ទទួលយកមិនបានឡើយនៅពេលដែលបានឮសារសំឡេងដែលបង្ហាញពីចេតនាជាឃាតកររបស់បុគ្គល ផែង វណ្ណៈ ត្បិតការប៉ុនប៉ងសម្លាប់មនុស្ស និងការសម្លាប់មនុស្សដោយចេតនាពីបុគ្គលណាម្នាក់ គឺជាការបំពានធ្ងន់ធ្ងរលើរដ្ឋធម្មនុញ្ញ ក្រមព្រហ្មទណ្ឌ ច្បាប់សិទ្ធិមនុស្សសកល និងច្បាប់សាសនាផងដែរ។
ការព្រមាននេះ ធ្វើឡើងបន្ទាប់ពីសមាជិកគណបក្សប្រជាជនកម្ពុជាដែលស្និទ្ធនឹងគ្រួសារត្រកូល ហ៊ុន គឺលោក ផែង វណ្ណៈ គំរាមសម្លាប់លើប្រធានផ្នែកប្រព័ន្ធផ្សព្វផ្សាយនៃសារព័ត៌មាន The Cambodia Daily ជាភាសាខ្មែរ លោក តាំង សារ៉ាដា កាលពីពេលថ្មីៗនេះ។
កាលពីថ្ងៃព្រឹកថ្ងៃចន្ទ ទី១៩ ខែមិថុនា ឆ្នាំ២០២៣ វេលាម៉ោងប្រមាណជា ១០ព្រឹកនៅសហរដ្ឋអាមេរិក លោក ផែង វណ្ណៈ ដែលប្រជាពលរដ្ឋជាទូទៅចាត់ទុកជាមនុស្សមានចរិតពាលបាតផ្សារ និងកូនឥតពូជ ហើយជាក៏ជាមនុស្សស្និទ្ធនឹងក្រុមគ្រួសារលោក ហ៊ុន សែន ផងនោះ បានគំរាមផ្តាច់ជីវិតប្រធានផ្នែកប្រព័ន្ធផ្សព្វផ្សាយនៃសារព័ត៌មាន The Cambodia Daily ជាភាសាខ្មែរ លោក តាំង សារ៉ាដា និងបានជេរប្រមាថមាក់ងាយដោយពាក្យអសុរោះផ្សេងៗជាច្រើនលើភរិយា និងម្តាយរបស់លោកថែមទៀត។
យោងតាមមាត្រា ៣១ នៃរដ្ឋធម្មនុញ្ញចែងថា ការប្រើសិទ្ធិសេរីភាពផ្ទាល់ខ្លួនរបស់បុគ្គលម្នាក់ៗ មិនត្រូវឱ្យប៉ះពាល់ដល់សិទ្ធិសេរីភាពអ្នកដទៃឡើយ។ ការប្រើសិទ្ធិសេរីភាពនេះ ត្រូវប្រព្រឹត្តតាមលក្ខខណ្ឌកំណត់ក្នុងច្បាប់។
ចំណែកច្បាប់ក្រមព្រហ្មទណ្ឌកម្ពុជា មាត្រា២៣១ ចែងថា អំពើគំរាមកំហែងថានឹងប្រព្រឹត្តបទឧក្រិដ្ឋ ឬបទមជ្ឈិមប្រឆាំងនឹងបុគ្គល កាលបើការគំរាមកំហែងនេះធ្វើឡើងម្ដងហើយម្តងទៀត ឬសម្ដែងចេញតាមលិខិត រូបភាព ឬវត្ថុអ្វីមួយ ត្រូវផ្ដន្ទាទោសដាក់ពន្ធនាគារពី ១ខែទៅ ៦ខែ និងពិន័យជាប្រាក់ពី ១សែនរៀលទៅ ១លានរៀលផងដែរ។
ដោយឡែកមាត្រា ២៣២ នៃក្រមព្រហ្មទណ្ឌ ចែងថា ការគំរាមកំហែងក្រោមទម្រង់ណាក៏ដោយ ថានឹងប្រព្រឹត្តបទឧក្រិដ្ឋ ឬបទមជ្ឈិមប្រឆាំងនឹងបុគ្គល ប្រសិនបើការគំរាមកំហែងនេះត្រូវបានធ្វើឡើងដោយមានបញ្ជាឱ្យបំពេញលក្ខខណ្ឌអ្វីមួយ ត្រូវផ្ដន្ទាទោសដាក់ពន្ធនាគារពី ៦ខែទៅ ២ឆ្នាំ និងពិន័យជាប្រាក់ពី ១លានរៀលទៅ ៤លានរៀលថែមទៀត។
ជាងនេះទៀត មាត្រា២៣៣ នៃក្រមព្រហ្មទណ្ឌ ក៏បានចែងដែរថា ការគំរាមកំហែងថានឹងសម្លាប់ កាលបើការគំរាមកំហែងនេះធ្វើឡើងម្តងហើយម្តងទៀត ឬសម្ដែងចេញតាមលិខិត រូបភាព ឬវត្ថុអ្វីមួយ ត្រូវផ្ដន្ទាទោសដាក់ពន្ធនាគារពី ៦ខែទៅ ២ឆ្នាំ និងពិន័យជាប្រាក់ពី ១លានរៀលទៅ ៤លានរៀលជាកំហិត។
យ៉ាងណាក៏ដោយ ទោះបីប្រទេសកម្ពុជាមានច្បាប់ក្រមព្រហ្មទណ្ឌចែងយ៉ាងនេះក្តី លោក ផែង វណ្ណៈ នៅតែមានសិទ្ធិដើរជេរប្រមាថ និងគំរាមសម្លាប់អ្នកដទៃយ៉ាងអនាធិបតេយ្យនៅក្នុងប្រទេសកម្ពុជាបានដោយសេរីដដែល ខណៈរដ្ឋាភិបាលដែលកំពុងដឹកនាំដោយលោកនាយករដ្ឋមន្ត្រី ហ៊ុន សែន ក៏មិនបានចាត់វិធានការច្បាប់ណាមួយលើបុគ្គលនេះឡើយ៕