លោក ស ខេង អនុប្រធានគណបក្សប្រជាជនកម្ពុជា និងជារដ្ឋមន្ត្រីក្រសួងមហាផ្ទៃ ស្នើប្រជាពលរដ្ឋបន្តបោះឆ្នោតគាំទ្រគណបក្សប្រជាជនដើម្បីផ្ដល់លទ្ធភាពដល់គណបក្សមួយនេះបានដឹកនាំមាតុភូមិកម្ពុជាឆ្ពោះទៅរកភាពរីកចម្រើនរុងរឿង និងឈរស្មើមុខប្រទេសនានានៅលើឆាកអន្តរជាតិ។
ថ្លែងក្នុងឱកាសដឹកនាំយុទ្ធនាការឃោសនារកសំឡេងឆ្នោតនៅស្រុកបវេល ខេត្តបាត់ដំបង នៅថ្ងៃទី៣ ខែកក្កដា លោក ស ខេង អំពាវនាវដល់សមាជិកសមាជិកា អ្នកគាំទ្រគណបក្សប្រជាជនកម្ពុជា និងជារួមប្រជាពលរដ្ឋខ្មែរដែលមានឈ្មោះក្នុងបញ្ជីឈ្មោះបោះឆ្នោត សូមត្រៀមលក្ខណៈអញ្ជើញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ដើម្បីគាំទ្រការអនុវត្តលទ្ធិប្រជាធិបតេយ្យដែលបានចាក់គ្រឹះយ៉ាងរឹងមាំនៅកម្ពុជាចាប់តាំងពីឆ្នាំ១៩៩៣។
លោក ស ខេង បានលើកឡើងថា បោះឆ្នោតគាំទ្រគណបក្សប្រជាជនកម្ពុជា ដើម្បីផ្ដល់លទ្ធភាពដល់គណបក្សមួយនេះបានដឹកនាំមាតុភូមិកម្ពុជាឆ្ពោះទៅរកភាពរីកចម្រើនរុងរឿង និងឈរស្មើមុខប្រទេសនានានៅលើឆាកអន្តរជាតិ។
លោក ស ខេង បានលើកឡើងថា រាជរដ្ឋាភិបាលបានគ្រប់គ្រង បង្ការទប់ស្កាត់បានប្រកបដោយប្រសិទ្ធភាពជំងឺកូវីដ-១៩ និងជាពិសេស ការចូលរួមគាំទ្រការបោះឆ្នោតឃុំ-សង្កាត់ ឆ្នាំ២០២២ ហើយនឹងបន្តគាំទ្រដល់ការបោះឆ្នោតជ្រើសតាំងតំណាងរាស្ត្រឆ្នាំ២០២៣ នេះថែមទៀត។
គណៈកម្មាធិការជាតិរៀបចំការបោះឆ្នោត (គ.ជ.ប) បានចេញផ្សាយសេចក្ដីប្រកាសព័ត៌មានស្តីអំពីស្ថានភាពទូទៅនៃការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ បានកត់សម្គាល់អំពីសកម្មភាពយុទ្ធនាការឃោសនារបស់បណ្ដាគណបក្សនយោបាយនានាថា បានប្រព្រឹត្តទៅដោយរលូន គ្មានអំពើហិង្សា មានសន្តិសុខ សុវត្ថិភាព សណ្ដាប់ធ្នាប់ល្អ។
ដោយឡែកនាថ្ងៃទី២ ខែកក្កដា ឆ្នាំ២០២៣ គ.ជ.ប បានបន្តវាយតម្លៃជាវិជ្ជមាន និងបានកត់សម្គាល់អំពីកំណើនគណបក្សនយោបាយធ្វើសកម្មភាពច្រើនជាងថ្ងៃទីមួយ។ ជាក់ស្ដែង គណបក្សហ៊្វុនស៊ិនប៉ិច គណបក្សខ្មែរអភិរក្ស គណបក្សឯកភាពជាតិខ្មែរ គណបក្សកម្លាំងប្រជាធិបតេយ្យ និងគណបក្សយុវជនកម្ពុជា បានធ្វើសកម្មភាពហែក្បួនឃោសនានៅរាជធានីភ្នំពេញ ខណៈគណបក្សប្រជាជនកម្ពុជា គណបក្សខ្មែររួបរួមជាតិ និងគណបក្សសំបុកឃ្មុំសង្គមប្រជាធិបតេយ្យ ហែក្បួនឃោសនាច្រើននៅតាមបណ្ដាខេត្ត។
សូមបញ្ជាក់ថា យុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ នឹងបន្តប្រព្រឹត្តទៅរហូតដល់ថ្ងៃទី២១ ខែកក្កដា ឆ្នាំ២០២៣។ ថ្ងៃទី២២ គឺជាថ្ងៃ «ស» ដែលគ្រប់គណបក្សនយោបាយទាំងអស់ត្រូវរក្សាភាពស្ងប់ស្ងៀម ខណៈថ្ងៃបន្ទាប់ គឺថ្ងៃទី២៣ ខែកក្កដា គឺជាថ្ងៃបោះឆ្នោត។ ការបោះឆ្នោតនេះមានគណបក្សនយោបាយចំនួន១៨ បានចុះឈ្មោះចូលរួមប្រកួតប្រជែង។ ក្រៅពីយុទ្ធនាការឃោសនានៅតាមទីតាំងសាធារណៈ គណបក្សនយោបាយទាំងអស់ក៏បានបង្កើនសកម្មភាពផ្សព្វផ្សាយ និងឃោសនាកម្មវិធីនយោបាយ៕