មន្ត្រីនៃក្រសួងការបរទេសកម្ពុជាមួយរូបបានទម្លាយថា បេក្ខជនអនាគតនាយករដ្ឋមន្ត្រីរបស់បក្សកាន់អំណាចលោក ហ៊ុន ម៉ាណែត នឹងធ្វើដំណើរទៅចូលរួមកិច្ចប្រជុំមហាសន្និបាតអង្គការសហប្រជាជាតិក្នុងបុរីញីវយ៉ក សហរដ្ឋអាមេរិក ក្នុងឋានៈជានាយករដ្ឋមន្ត្រីកម្ពុជានៅអំឡុងខែកញ្ញា ឆ្នាំ២០២៣ ខាងមុខនេះ ខណៈក្រុមមន្ត្រីខ្លះ ឬក្រុមអ្នកគាំទ្រគណបក្សប្រជាជនកម្ពុជាខ្លះកំពុងនាំគ្នាសម្រុកកក់សណ្ឋាគារក្នុងទីក្រុងនេះយ៉ាងគគ្រឹកគគ្រេង។
មន្ត្រីជាន់ខ្ពស់ក្នុងជួរបក្សកាន់អំណាចមួយរូបបានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីសុវត្ថិភាពផ្ទាល់ខ្លួននៅថ្ងៃទី៧ កក្កដា នេះថា រឿងនេះត្រូវបានផ្សព្វផ្សាយតែផ្ទៃក្នុងគណបក្សភាគីលោក ហ៊ុន សែន តែប៉ុណ្ណោះ ព្រោះថានៅពេលបោះឆ្នោតរួចរាល់ ការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត នឹងត្រូវតែធ្វើឡើងជាបន្ទាន់ ក្នុងនោះក៏អាចនឹងមានការបោះឆ្នោតជាកញ្ចប់ផងដែរ ដើម្បីកុំឲ្យមានការទប់ស្កាត់ណាមួយពីមន្ត្រីជាន់ខ្ពស់ក្នុងជួរបក្សកាន់អំណាចផ្សេងទៀត។
ប្រភពដដែលអះអាងថា ការមិនកំណត់ពេលវេលាជាក់លាក់ក្នុងការតែងតាំងលោក ហ៊ុន ម៉ាណែត ឲ្យស្នងអំណាចជានាយករដ្ឋមន្ត្រី គឺជាយុទ្ធសាស្ត្ររបស់លោក ហ៊ុន សែន ព្រោះគាត់ខ្លាចមានការទប់ស្កាត់ណាមួយពីមន្ត្រីជាន់ខ្ពស់នៅផ្ទៃក្នុងបក្សរបស់ខ្លួន ដូច្នេះគាត់ត្រូវតែប្រើពេលខ្លីបំផុតដើម្បីផ្ទេរអំណាចទៅឱ្យកូនប្រុសរបស់គាត់ ដើម្បីកុំឲ្យអ្នកដែលមិនយល់ស្របនឹងការផ្ទេរអំណាចនេះមានឱកាសធ្វើឱ្យរាំងស្ទះដល់ផែនការនេះ។
ប្រភពដដែលបញ្ជាក់ថា មន្ត្រីដទៃទៀតក្នុងជួរបក្សរិះគន់ថា ការតែងតាំងលោក ហ៊ុន ម៉ាណែត ឱ្យធ្វើជាបេក្ខជននាយករដ្ឋមន្ត្រី ពួកគេក៏មិនជំទាស់ដែរ ប៉ុន្តែលោក ហ៊ុន សែន ត្រូវកំណត់ឱ្យបានច្បាស់ថា លោក ហ៊ុន ម៉ាណែត ត្រូវប្រកាសឈរឈ្មោះជាបេក្ខជននាយករដ្ឋមន្ត្រីនៅអាណត្តិមួយណាដើម្បីប្រកាសនៅមុនការបោះឆ្នោតឲ្យសមាជិកបក្សកាន់អំណាច និងពលរដ្ឋខ្មែរបានដឹង ហើយក្រោយពេលដែលគណបក្សប្រជាជនកម្ពុជាឈ្នះឆ្នោតនោះ លោក ហ៊ុន ម៉ាណែត អាចធ្វើជានាយករដ្ឋមន្ត្រីដោយស្របច្បាប់បានហើយ។
មន្ត្រីដដែលបញ្ជាក់ថា អាណត្តិនេះលោក ហ៊ុន ម៉ាណែត មិនបានប្រកាសឈរឈ្មោះបេក្ខជននាយករដ្ឋមន្ត្រីសម្រាប់ឱ្យពលរដ្ឋខ្មែរ ឬសមាជិកបក្សកាន់អំណាចឲ្យបោះឆ្នោតគាំទ្រគាត់ទេ ខណៈគាត់ត្រឹមតែជាបេក្ខជននាយករដ្ឋមន្ត្រីក្នុងលក្ខខណ្ឌត្រៀមខ្លួនប៉ុណ្ណោះ ដូច្នេះបើលោក ហ៊ុន សែន ហ៊ានផ្ទេរអំណាចឱ្យលោក ហ៊ុន ម៉ាណែត នៅក្រោយការបោះឆ្នោតនេះមែន នោះវាគឺជាការប្លន់តំណែងនាយករដ្ឋមន្ត្រីក្នុងគណបក្សរបស់ខ្លួនទាំងស្រុង។
មន្ត្រីជាន់ខ្ពស់បក្សកាន់អំណាចរូបនេះបញ្ជាក់ថា ទំនងដោយសារតែមូលហេតុនេះហើយទើបបានជាលោក ហ៊ុន សែន ត្រូវតែរកវិធីផ្ទេរអំណាចឱ្យកូនប្រុសរបស់គាត់ឱ្យបានកាន់តែឆាប់ ដើម្បីកុំឱ្យមានការជំទាស់ណាមួយផ្ទុះឡើងដែលនាំឲ្យរាំងស្ទះដល់ផែនការនេះ។
ការអះអាងនេះ ធ្វើឡើងក្នុងចេតនាទម្លាយនូវអាថ៌កំបាំងផែនការផ្ទេរអំណាចរបស់លោក ហ៊ុន សែន ទៅឲ្យលោក ហ៊ុន ម៉ាណែត ដែលពួកគេកំពុងត្រៀមអនុវត្តនៅក្រោយការបោះឆ្នោតជាតិឆ្នាំ២០២៣នេះ។
មហាសន្និបាតប្រចាំឆ្នាំរបស់អង្គការសហប្រជាជាតិ គឺជាវេទិកាជួបជុំប្រទេសជាសមាជិកដើម្បីពិភាក្សា និងអនុម័តលើសេចក្តីសម្រេចផ្សេងៗនៅរៀងរាល់ខែកញ្ញា ហើយមេដឹកនាំប្រទេសដែលជាសមាជិកមានកាតព្វកិច្ចត្រូវចូលរួមមហាសន្និបាតនេះផងដែរ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៧ កក្កដា នេះថា ការទម្លាយព័ត៌មានផ្ទៃក្នុងចំពោះបញ្ហាដែលថា លោក ហ៊ុន ម៉ាណែត នឹងធ្វើដំណើរទៅចូលរួមមហាសន្និបាតអង្គការសហប្រជាជាតិក្នុងឋានៈជានាយករដ្ឋមន្ត្រីកម្ពុជានៅអំឡុងខែកញ្ញា ឆ្នាំ២០២៣ ខាងមុខនេះ គឺត្រូវតែធ្វើការស៊ើបអង្កេតជាមុនសិន ទើបអាចវាយតម្លៃបានថា នឹងមានរឿងបែបនេះ ឬក៏អត់ ប៉ុន្តែព័ត៌មានគឺមានអត្ថន័យស្របគ្នាដែលគ្រួសារលោក ហ៊ុន សែន ចង់ឱ្យលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីឲ្យបានកាន់តែឆាប់នោះ។
លោក គឹម សុខ លើកឡើងថា ប្រសិនបើរឿងនេះជារឿងពិត នោះការផ្ទេរអំណាចច្បាស់ជាត្រូវធ្វើឡើងនៅក្រោយការបោះឆ្នោតនាចុងខែកក្កដា ឆ្នាំ២០២៣ នេះតែម្តង ដើម្បីឲ្យលោក ហ៊ុន ម៉ាណែត អាចដឹកនាំមន្ត្រីរដ្ឋាភិបាលរបស់ខ្លួនទៅចូលរួមមហាសន្និបាតនេះដោយពេញមុខ ព្រោះថាលោក ហ៊ុន ម៉ាណែត ក៏មិនអាចដឹកនាំមន្ត្រីរដ្ឋាភិបាលទៅចូលរួមមហាសន្និបាតអង្គការសហប្រជាជាតិនៅខែកញ្ញា ខាងមុខនេះក្នុងតួនាទីណាមួយដែលមិនមែនជានាយករដ្ឋមន្ត្រីនោះដែរ។
អ្នកវិភាគរូបនេះបញ្ជាក់ថា ផ្ទុយទៅវិញ បើរឿងនេះមិនមែនជាការពិត នោះការទម្លាយព័ត៌មាននេះគឺជាល្បិចរបស់លោក ហ៊ុន សែន ដើម្បីស្ទាបស្ទង់សភាពការណ៍នៅផ្ទៃក្នុងគណបក្សរបស់ខ្លួនថា តើមានភាគីណាខ្លះបង្ហាញជំហរមិនយល់ស្របចំពោះការផ្ទេរអំណាចនេះ ដើម្បីឲ្យលោក ហ៊ុន សែន អាចមានពេលវេលាគ្រប់គ្រាន់ក្នុងការកែសម្រួលផែនការផ្ទេរអំណាចរបស់គាត់ឱ្យទាន់ពេលមុនការបោះឆ្នោតមកដល់។
កាលពីថ្ងៃទី២ ខែធ្នូ ឆ្នាំ២០២១ បុរសខ្លាំងក្រាញអំណាចតត្រកូលលោក ហ៊ុន សែន បានប្រកាសគាំទ្រកូនប្រុសច្បងរបស់លោក គឺលោក ហ៊ុន ម៉ាណែត ឱ្យធ្វើជាបេក្ខភាពជានាយករដ្ឋមន្ត្រីរបស់គណបក្សប្រជាជនកម្ពុជា ប៉ុន្តែនៅមុនការបោះឆ្នោតអាណត្តិទី៧ នេះ លោក ហ៊ុន ម៉ាណែត មិនត្រូវបានប្រកាសឈរឈ្មោះជានាយករដ្ឋមន្ត្រីសម្រាប់ការបោះឆ្នោតក្នុងឆ្នាំ២០២៣ នោះឡើយ ដូច្នេះមានន័យថា លោក ហ៊ុន ម៉ាណែត មិនអាចធ្វើជានាយករដ្ឋមន្ត្រីបានទេសម្រាប់អាណត្តិទី៧ នេះ ព្រោះអ្នកដែលប្រកាសឈ្មោះជានាយករដ្ឋមន្ត្រីក្នុងការបោះឆ្នោតនេះ គឺលោក ហ៊ុន សែន ប៉ុណ្ណោះ។
ក្រុមអ្នកសង្កេតការណ៍លើកឡើងថា បើលោក ហ៊ុន ម៉ាណែត ឡើងកាន់អំណាចជានាយករដ្ឋមន្ត្រីនៅក្រោយការបោះឆ្នោតនាចុងខែកក្កដា នេះមែន នោះលោកមិនមែនជានាយករដ្ឋមន្ត្រីដែលកើតចេញពីការបោះឆ្នោតទេ គឺជានាយករដ្ឋមន្ត្រីដែលកើតចេញពីការលើកបន្តុបពីឪពុករបស់ខ្លួនប៉ុណ្ណោះ ព្រោះគាត់មិនបានប្រកាសឈរឈ្មោះជាបេក្ខជននាយករដ្ឋមន្ត្រីនៅមុនការបោះឆ្នោតនេះឡើយ ដូច្នេះការផ្ទេរអំណាចបែបនេះ គឺត្រូវធ្វើឡើងតាមបែបប្រទេសកុម្មុយនីស្តផ្ដាច់ការ ជាជាងតាមបែបប្រជាធិបតេយ្យ។
ចំណុចសង្ស័យជុំវិញការរៀបចំផែនការផ្ទេរអំណាចនេះ ក៏មានករណីដែលគួរឱ្យចាប់អារម្មណ៍ផងដែរ ក្នុងនោះលោក ហ៊ុន សែន បានប្រកាសផ្លាស់ប្ដូរថ្ងៃបង្កើតរដ្ឋាភិបាលក្រោយការបោះឆ្នោតជាតិឆ្នាំ២០២៣ នេះភ្លាមៗ ដោយលោកប្រកាសផ្លាស់ប្ដូរថ្ងៃបង្កើតរដ្ឋាភិបាលដែលលោកបានប្រកាសជាសាធារណៈ ដោយកំណត់យកថ្ងៃទី២៩ ខែកក្កដា មកនៅថ្ងៃទី៣១ ខែសីហា ឆ្នាំ២០២៣ វិញ ខណៈការប្រជុំសភានឹងត្រូវផ្លាស់ប្ដូរពីថ្ងៃទី២៨ ខែកក្កដា មកថ្ងៃទី២៩ ខែសីហា វិញផងដែរ ដូច្នេះការបង្កើតរដ្ឋាភិបាលអាណត្តិទី៧ នេះ គឺមានរយៈពេលដល់ទៅជាង ១ខែឯណោះបន្ទាប់ពីបោះឆ្នោតរួច៕