អតីតមេដឹកនាំបក្សប្រឆាំងលោក សម រង្ស៊ី អំពាវនាវឱ្យពលរដ្ឋខ្មែរអ្នកស្នេហាជាតិ និងអ្នកស្រឡាញ់យុត្តិធម៌គ្រប់និន្នាការនយោបាយទាំងអស់ រួបរួមគ្នាក្នុងឆន្ទៈតែមួយ គូសខ្វែងសន្លឹកឆ្នោតចោលនៅថ្ងៃទី២៣ កក្កដា ខាងមុខនេះ ដើម្បីជួយជាតិឲ្យរួចផុតពីក្រញាំនៃគ្រួសារបំផ្លាញជាតិរបស់មេដឹកនាំបក្សកាន់អំណាចលោក ហ៊ុន សែន។
អតីតមេដឹកនាំបក្សប្រឆាំងលោក សម រង្ស៊ី សរសេរលើទំព័រហ្វេសប៊ុករបស់ខ្លួនកាលពីថ្ងៃទី៩ កក្កដា នេះថា ការគូសខ្វែងសន្លឹកឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ គឺក្នុងគោលដៅទម្លាក់លោក ហ៊ុន សែន ចេញពីអំណាច ដើម្បីកុំឱ្យមេដឹកនាំខ្មែរក្រាញអំណាចរូបនេះបន្តបំផ្លាញទ្រព្យសម្បត្តិជាតិកម្ពុជា រហូតនាំឱ្យប្រទេសជាតិធ្លាក់ទៅក្នុងបំណុលបរទេសវ័ណ្ឌកទៅថ្ងៃមុខ។
ជាងនេះទៀត ក៏ដើម្បីកុំឱ្យមេដឹកនាំបំផ្លាញជាតិបែបនេះកម្ទេចលទ្ធិប្រជាធិបតេយ្យ សិទ្ធិសេរីភាពប្រជាពលរដ្ឋ និងយុត្តិធម៌សង្គម ព្រមទាំងដើម្បីកុំឱ្យបំផ្លាញភាពរុងរឿង និងភាពថ្លៃថ្នូររបស់ប្រជារាស្ត្រខ្មែរបន្តទៀតផងដែរ។
អតីតមេដឹកនាំបក្សប្រឆាំងរូបនេះលើកឡើងថា ប្រជាពលរដ្ឋខ្មែរគ្រប់រូបនឹងគូសខ្វែងសន្លឹកឆ្នោតចោលនៅថ្ងៃបោះឆ្នោតខាងមុខនេះជាមិនខាន ហើយក្នុងនោះ អ្នកគាំទ្រគណបក្សប្រជាជនកម្ពុជាក៏នឹងគូសខ្វែងសន្លឹកឆ្នោតចោលដែរ ពីព្រោះពួកគេក៏មិនពេញចិត្តនឹងការដឹកនាំតាមបែបគ្រួសារនិយមរបស់លោក ហ៊ុន សែន ដែរ។
លោក សម រង្ស៊ី បញ្ជាក់ថា សព្វថ្ងៃនេះ លោក ហ៊ុន សែន មិនមែនត្រឹមតែគាបសង្កត់ និងគំរាមកំហែងគណបក្សប្រឆាំងទេ គាត់ក៏គាបសង្កត់ និងគំរាមកំហែងថ្នាក់ដឹកនាំដទៃទៀតនៃគណបក្សប្រជាជនកម្ពុជាដែរ ដោយប្រើវិធី «អារកមាន់» ដើម្បីបន្លាចស្វា ដែលមានន័យថា គាបសង្កត់បក្សប្រឆាំងដើម្បីគំរាមកំហែងមន្ត្រីផ្ទៃក្នុងរបស់ខ្លួនដែលមិនស្របនឹងទង្វើព្រៃផ្សៃរបស់គាត់។
ការអំពាវនាវនេះ ធ្វើឡើងស្របពេលដែលដំណើរការនៃការបោះឆ្នោតជាតិឆ្នាំ២០២៣ នាខែកក្កដា ខាងមុខនេះ ត្រូវគេមើលឃើញថាជាការបោះឆ្នោតដែលរៀបចំ និងគ្រប់គ្រងដោយគណបក្សប្រជាជនកម្ពុជារបស់លោក ហ៊ុន សែន ប៉ុណ្ណោះ។
ដំណើរការនៃការបោះឆ្នោតជាតិអាណត្តិទី៧ នឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ដ៏ខ្លីខាងមុខនេះ ប៉ុន្តែការបោះឆ្នោតនេះត្រូវគេរិះគន់ថាជាការបោះឆ្នោតដែលរៀបចំដោយបក្សកាន់អំណាចប៉ុណ្ណោះ ព្រោះថាលោក ហ៊ុន សែន បានកម្ចាត់គណបក្សប្រឆាំងមិនឱ្យចូលរួម ដូចជាគណបក្សសង្គ្រោះជាតិ និងគណបក្សភ្លើងទៀន ជាដើម ខណៈមន្ត្រីបក្សប្រឆាំងក៏ត្រូវលោក ហ៊ុន សែន ប្តឹងដាក់គុក និងរឹបអូសទ្រព្យសម្បត្តិថែមទៀត។
កាន់តែធ្ងន់ធ្ងរជាងនេះទៀតនោះ លោក ហ៊ុន សែន បានបញ្ជាឱ្យរដ្ឋសភាឯកបក្សរបស់គណបក្សប្រជាជនកម្ពុជាកែច្បាប់បោះឆ្នោត ដើម្បីគាបសង្កត់ឱ្យពលរដ្ឋទៅបោះឆ្នោតទាំងដែលគណបក្សដែលពួកគេគាំទ្រត្រូវបានហាមឃាត់មិនឱ្យឈរឈ្មោះបោះឆ្នោតថែមទៀត។
ទាក់ទិននឹងបញ្ហានេះ កូនប្រុសច្បងមេដឹកនាំខ្មែរពូកែប្លន់អំណាចផ្ដាច់មុខនៅកម្ពុជា លោក ហ៊ុន ម៉ាណែត បានចេញមុខប្រកាសជាសាធារណៈសុំឱ្យប្រជាពលរដ្ឋនាំគ្នាទៅបោះឆ្នោតឲ្យបានគ្រប់គ្នា និងបោះឆ្នោតឲ្យគណបក្សប្រជាជនកម្ពុជា ដើម្បីឲ្យលោក ហ៊ុន សែន ដឹកនាំប្រទេសកម្ពុជាបន្តទៀត និងសុំប្រជាពលរដ្ឋកុំជឿការញុះញង់របស់ក្រុមប្រឆាំងដែលឃោសនាឲ្យប្រជាពលរដ្ឋគូសខ្វែងសន្លឹកឆ្នោតដើម្បីបំផ្លាញការបោះឆ្នោតនាពេលខាងមុខនេះ។
បែបនេះក្តី អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានលើកឡើងកាលពីពេលថ្មីៗនេះថា ការបោះឆ្នោតដ៏អយុត្តិធម៌នាពេលខាងមុខនេះ មិនមែនជាការបោះឆ្នោតដើម្បីធានានូវសិទ្ធិពលរដ្ឋ លើកស្ទួយលទ្ធិប្រជាធិបតេយ្យ ធានានូវយុត្តិធម៌សង្គមនោះទេ គ្រាន់តែជាការបោះឆ្នោតជ្រើសរើសតំណាងរាស្ត្រឯកបក្ស និងមេដឹកនាំរបស់គណបក្សប្រជាជនកម្ពុជាដែលចេះតែបំផ្លាញផលប្រយោជន៍ជាតិ ដើម្បីអំណាចប៉ុណ្ណោះ។
ទាក់ទិននឹងបញ្ហានេះ កាលអំឡុងខែមីនា ឆ្នាំ២០២៣ ប្រធានគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ បានស្នើមន្ត្រីជាន់ខ្ពស់នៃក្រសួងការបរទេសបារាំង ឱ្យបញ្ជូនអ្នកសង្កេតការណ៍បារាំងមកពិនិត្យ និងសង្កេតមើលការបោះឆ្នោតជាតិនៅកម្ពុជាដែរ ប៉ុន្តែប្រទេសបារាំងមិនបញ្ជូនអ្នកសង្កេតការណ៍បោះឆ្នោតមកកម្ពុជា ដើម្បីចូលរួមការបោះឆ្នោតខាងមុខនេះឡើយ។
ជាងនេះទៀត គណៈកម្មាធិការជាតិរៀបចំការបោះឆ្នោត (គ.ជ.ប) ក៏ធ្លាប់បានបញ្ជាក់ដែរថា ក្រៅពីប្រទេសបារាំង រដ្ឋាភិបាលកម្ពុជាក៏បានអញ្ជើញអ្នកសង្កេតការណ៍មកពីប្រទេសអង់គ្លេស (U.K) អាល្លឺម៉ង់ (Germany) និងប៉ាឡេស្ទីន (Palestine) ផងដែរ ប៉ុន្តែប្រទេសទាំងនោះក៏មិនដាក់បញ្ជូនអ្នកសង្កេតការណ៍មកចូលរួមដូចប្រទេសបារាំងដែរ៕