សមាគមខ្មែរដើម្បីលទ្ធិប្រជាធិបតេយ្យ និងគណបក្សសង្គ្រោះជាតិប្រចាំទ្វីបអឺរ៉ុប រួមជាមួយសហគមន៍ខ្មែរអ្នកស្នេហាប្រជាធិបតេយ្យក្នុងរដ្ឋវ៉ាស៊ីនតោន អំពាវឱ្យប្រជាពលរដ្ឋខ្មែរគ្រប់និន្នាការ និងសហគមន៍អន្តរជាតិ បដិសេធកុំទទួលស្គាល់លទ្ធផលនៃការបោះឆ្នោតជាតិនៅកម្ពុជានៅថ្ងៃទី២៣ ខែកក្កដា ឆ្នាំ២០២៣។
សមាគមសំឡេងខ្មែរដើម្បីលទ្ធិប្រជាធិបតេយ្យ (KVD) សាខាគណបក្សសង្គ្រោះជាតិទ្វីបអឺរ៉ុប (CNRP) និងសហគមន៍ខ្មែរអ្នកស្នេហាប្រជាធិបតេយ្យក្នុងរដ្ឋវ៉ាស៊ីនតោន បានចេញសេចក្តីថ្លែងការណ៍រួមគ្នាមួយនៅថ្ងៃទី២១ កក្កដា នេះ ដោយបដិសេធការបោះឆ្នោតជាតិនៅកម្ពុជា ដោយសារតែការបោះឆ្នោតនេះគឺជាការបោះឆ្នោតក្លែងក្លាយដែលរៀបចំដោយរដ្ឋាភិបាលឯកបក្សរបស់លោក ហ៊ុន សែន ដែលមិនអាចធានានូវតម្លាភាព សេរី ត្រឹមត្រូវ និងយុត្តិធម៌សម្រាប់សិទ្ធិបញ្ចេញមតិរបស់ពលរដ្ឋម្ចាស់ឆ្នោត។
ប្រភពដដែលលើកឡើងថា ការសម្រេចបដិសេធលទ្ធផលនៃការបោះឆ្នោតនេះ ដោយសារតែពួកគេសង្កេតឃើញថា រដ្ឋាភិបាលឯកបក្សរបស់លោក ហ៊ុន សែន បានរារាំងគណបក្សសង្គ្រោះជាតិ និងមេដឹកនាំនៃគណបក្សនេះមិនឱ្យចូលរួមការបោះឆ្នោត និងបានរំលោភរដ្ឋធម្មនុញ្ញកម្ពុជាឆ្នាំ១៩៩៣ ព្រមទាំងកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែលធានាឱ្យមានដំណើរការបោះឆ្នោតដោយសេរី ត្រឹមត្រូវ និងយុត្តិធម៌តាមគោលការណ៍ប្រជាធិបតេយ្យសេរីពហុបក្សនៅកម្ពុជាយ៉ាងធ្ងន់ធ្ងរ។
សមាគមខ្មែរដែលមានមូលដ្ឋាននៅលើទឹកដីសហរដ្ឋអាមេរិកខាងលើ បញ្ជាក់ថា រដ្ឋាភិបាលគ្រួសារនិយមមួយនេះក៏បានរៀបចំការបោះឆ្នោតក្លែងក្លាយជាមួយគណបក្សតូចៗកំដរឆាកល្ខោននយោបាយ ដើម្បីតែពង្រឹងអំណាច និងដើម្បីតែផលប្រយោជន៍របស់ក្រុមគ្រួសារ និងបក្ខពួកត្រកូលហ៊ុនតែប៉ុណ្ណោះ ហើយដើម្បីផែនការរបស់ពួកគេបានសម្រេច ពួកគេបានរឹតត្បិតយ៉ាងខ្លាំងលើសេរីភាពបញ្ចេញមតិ សេរីភាពសារព័ត៌មាន សិទ្ធិនយោបាយ និងសិទ្ធិមនុស្សនៅក្នុងប្រទេសកម្ពុជា ដោយគាបសង្កត់អង្គការសង្គមស៊ីវិល និងចាប់ខ្លួនសកម្មជននយោបាយនានាជាដើម។
ការចេញសេចក្តីថ្លែងការណ៍រួមនេះ ធ្វើឡើងដើម្បីប្រឆាំងនឹងការបោះឆ្នោតនៅកម្ពុជាដែលនឹងប្រព្រឹត្តទៅនៅថ្ងៃអាទិត្យចុងសប្តាហ៍នេះ។
ប្រធានសមាគមសំឡេងខ្មែរដើម្បីលទ្ធិប្រជាធិបតេយ្យ (KVD) លោក វឿក ឆាយហឿន លើកឡើងថា ការចូលរួមរបស់ពលរដ្ឋខ្មែរក្នុងការប្រឆាំងនឹងការបោះឆ្នោតក្លែងក្លាយនេះ គឺជារឿងសំខាន់មិនអាចខ្វះបាន ពីព្រោះការបោះឆ្នោតនេះគ្រាន់តែក្រឡាអុកបម្រើនយោបាយរបស់លោក ហ៊ុន សែន ក្នុងការពង្រឹង និងបន្តអំណាចត្រកូលហ៊ុនតែប៉ុណ្ណោះ។
លោក វឿក ឆាយហឿន ដាស់តឿនថា ប្រជាពលរដ្ឋខ្មែរគ្រប់រូបគួរចងចាំថា ឱ្យតែអំណាចត្រកូលហ៊ុនបន្តគ្រប់គ្រងប្រទេសកម្ពុជា នោះប្រជាពលរដ្ឋខ្មែរដែលរស់ក្នុងជំនាន់នៃការត្រួតត្រារបស់ពួកគេ នឹងមិនបានសុខឡើយ ហើយខ្មែរនឹងបែកបាក់សាមគ្គីជាតិទៅជាចម្រៀកៗរហូតធ្វើឱ្យជាតិខ្មែរទាំងមូលទន់ខ្សោយ មិនអាចការពារបូរណភាពទឹកដីរបស់ខ្លួនបាននៅថ្ងៃមុខ។
នៅថ្ងៃទី២០ ខែកក្កដា ឆ្នាំ២០២៣ គណបក្សសង្គ្រោះជាតិសហរដ្ឋអាមេរិក និងសមាគមសំឡេងខ្មែរដើម្បីលទ្ធិប្រជាធិបតេយ្យ (KVD) បានចេញសេចក្តីជូនដំណឹងអំពាវនាវឱ្យប្រជាពលរដ្ឋខ្មែរដែលរស់នៅជុំវិញពិភពលោក ចូលរួមបាតុកម្មនៅថ្ងៃសុក្រនេះ ដើម្បីប្រឆាំងនឹងការបោះឆ្នោតនៅកម្ពុជា និងដើម្បីចូលរួមចុះហត្ថលេខានៅលើច្បាប់ S-831 (Transnational Repression Policy Act) ដើម្បីជំរុញឱ្យសមាជិកសភា និងព្រឹទ្ធសភាសហរដ្ឋអាមេរិក ចេញច្បាប់នេះឱ្យបានឆាប់ផងដែរ។
គណបក្សសង្គ្រោះជាតិសហរដ្ឋអាមេរិក និងសមាគមសំឡេងខ្មែរដើម្បីលទ្ធិប្រជាធិបតេយ្យ (KVD) បានកំណត់យកថ្ងៃសុក្រ ទី២១ ខែកក្កដា ឆ្នាំ២០២៣ ជាថ្ងៃធ្វើបាតុកម្មប្រឆាំងការបោះឆ្នោតនៅកម្ពុជា ដោយប្រកាសជួបជុំគ្នានៅវិមានអូឡាំហ្យា ក្នុងរដ្ឋធានីវ៉ាស៊ីនតោន លើទឹកដីសហរដ្ឋអាមេរិក ខណៈយុទ្ធនាការនេះនឹងចាប់ផ្តើមពីម៉ោង ២រសៀលរហូតដល់ម៉ោង ៥ល្ងាច។
នៅថ្ងៃទី២១ ខែកក្កដា ឆ្នាំ២០២៣ នេះ យុទ្ធនាការនៃការឃោសនាបោះឆ្នោតត្រូវបញ្ចប់ហើយ ខណៈដំណើរការនៃការបោះឆ្នោតនឹងត្រូវធ្វើឡើងនៅថ្ងៃអាទិត្យ ទី២៣ ខែកក្កដា ឆ្នាំ២០២៣ នេះ ខណៈគណបក្សនយោបាយដែលចូលរួមការបោះឆ្នោតមាន ១៨គណបក្ស ប៉ុន្តែគណបក្សដែលមានឥទ្ធិពល គឺមានគណបក្សប្រជាជនកម្ពុជារបស់លោក ហ៊ុន សែន មួយប៉ុណ្ណោះ ខណៈគណបក្សដែលមានកម្លាំងគាំទ្រអាចប្រកួតប្រជែងក្នុងការបោះឆ្នោតនេះ ដូចជាគណបក្សសង្គ្រោះជាតិ និងគណបក្សភ្លើងទៀន ដែលមានអ្នកគាំទ្រជាង ១លាន ៦សែននាក់ ជាដើម ត្រូវបានរាំងខ្ទប់មិនឱ្យចូលរួមការបោះឆ្នោតនេះទេ៕