នាយករដ្ឋមន្ត្រីចាំផ្ទះនៃប្រទេសថៃ លោក ប្រាយុទ្ធ ចាន់អូចា ទទូចដល់ប្រជាជនថៃ ជាពិសេសអ្នកគាំទ្របក្សចលនាឆ្ពោះទៅមុខ ឱ្យស្ថិតក្នុងសភាពស្ងប់ស្ងាត់ដែលលោកថាលោកនៅតែរង់ចាំផ្ទេរអំណាចទៅរដ្ឋាភិបាលថ្មីក្រោយពីកើតចេញជារូបរាងហើយនោះ។
យោងតាមទីភ្នាក់ងារសារព័ត៌មាន AFP ចុះផ្សាយនៅថ្ងៃទី២១ កក្កដា ការអំពាវនាវរបស់លោក ប្រាយុទ្ធ បន្ទាប់ពីអ្នកគាំទ្រគណបក្សចលនាឆ្ពោះទៅមុខបានប្រកាសស្វែងរកកម្លាំងដ៏ធំមួយ ដើម្បីធ្វើការតវ៉ាប្រឆាំងស្ថាប័នសមាជិកសភា និងតុលាការធម្មនុញ្ញដែលបានរាំងខ្ទប់លោក ភីថា លឹមចារឿនរ៉ាត់ មិនឱ្យមានឱកាសក្លាយជានាយករដ្ឋមន្ត្រីជាប់ឆ្នោត។
គណបក្សចលនាឆ្ពោះទៅមុខជាបក្សដែលបានឈ្នះអាសនៈច្រើនជាងគេលំដាប់ទី១ បន្ទាប់មកគណបក្សភឿថៃ និងគណបក្សភូមិចៃថៃ។ លោក ភីថា ដែលជាមេបក្សចលនាឆ្ពោះទៅមុខ បានបរាជ័យលើកទី២ ដែលមិនអាចក្លាយជានាយករដ្ឋមន្ត្រី។
ស្ថាប័នដែលត្រូវចាត់ទុកថាជាឧបសគ្គខ្លាំងមិនអាចឱ្យលោក ភីថា មានឱកាសជានាយករដ្ឋមន្ត្រី គឺក្រុមសមាជិកព្រឹទ្ធសភា និងសេចក្ដីសម្រេចរបស់តុលាការធម្មនុញ្ញដែលព្យួរសមាជិកភាពលោក ភីថា ជាអ្នកតំណាងរាស្ត្រ។
ឥឡូវនេះ បើតាមការផ្សាយព័ត៌មានពីទីក្រុងបាងកក ប្រជាជនថៃ ជាពិសេសគឺយុវជននៅទីក្រុងបាងកក ចាប់ផ្ដើមធ្វើការតវ៉ាតាមដងផ្លូវនៅមុខមន្ទីររដ្ឋសភា និងនៅខាងមុខវិមានប្រជាធិបតេយ្យនៅក្រុងបាងកក ទាមទារឲ្យតុលាការធម្មនុញ្ញទម្លាក់ចោលសំណុំរឿងរបស់គណៈកម្មការបោះឆ្នោតដែលប្ដឹងលោក ភីថា ពីបទរំលោភច្បាប់បោះឆ្នោត ព្រោះតែចោទលោក ភីថា ថាមានភាគហ៊ុនក្នុងប្រព័ន្ធផ្សព្វផ្សាយដែលជាមុខជំនួញហាមសមាជិកសភាមានមុខជំនួញដូចនេះ។
រឿងនេះ លោក ភីថា ខ្លួនលោកផ្ទាល់បានបដិសេធដោយបានអះអាងថា លោកគ្មានឈ្មោះនៅក្នុងភាគហ៊ុននេះទេ ហើយភាគហ៊ុននេះគឺជាកេរដំណែលរបស់ឪពុករបស់លោកតែប៉ុណ្ណោះ។
មួយវិញទៀត នៅក្នុងដៃរបស់តុលាការធម្មនុញ្ញ គឺសំណុំរឿងមួយជាសំណុំរឿងព្រហ្មទណ្ឌធ្ងន់ធ្ងរដែលប្ដឹងដោយមេធាវីសកម្មជនម្នាក់ប្ដឹងលោក ភីថា ពីបទចង់ផ្ដួលរំលំរបបរាជានិយម ព្រោះតែលោក ភីថា ព្យាយាមរុះរើមាត្រា១១២ នៃក្រមព្រហ្មទណ្ឌដែលប្រឆាំងជនទាំងឡាយណាប្រមាថចេស្ដាព្រះមហាក្សត្រ និងញាតិវង្ស ហើយមាត្រានេះមានទម្ងន់ទោសរហូតដល់ទៅ ១៥ឆ្នាំ។
ក្រុមអ្នកតំណាងរាស្ត្រប្រឆាំង ជាពិសេសក្រុមសមាជិកព្រឹទ្ធសភាដែលជាស្ថាប័នមួយលើកបន្តុបដោយពួកយោធាតាមរយៈរដ្ឋប្រហារឆ្នាំ២០១៤ ពួកគេបង្ហាញកំហឹងប្រឆាំងនឹងលោក ភីថា ដែលថាចង់រុះរើមាត្រានេះ គឺនាំទៅរកការប៉ះពាល់ធ្ងន់ធ្ងរដល់របបរាជានិយម។
ប៉ុន្តែអ្នកវិភាគមើលឃើញថា ការដែលលោក ភីថា ខកខានចូលកាន់តំណែងនាយករដ្ឋមន្ត្រីជាគណបក្សដែលឈ្នះឆ្នោតនោះ ក៏ព្រោះតែពួកសមាជិកសភាបោះឆ្នោតមិនគាំទ្រលោក ហើយក៏មិនចង់ឲ្យលោកក្លាយជានាយករដ្ឋមន្ត្រីរបស់ថៃ បាននោះទេ។
ឥឡូវនេះ លោក ភីថា បាត់បង់ឱកាសជាបេក្ខជននាយករដ្ឋមន្ត្រីទៅហើយ។ មិនតែប៉ុណ្ណោះ លោកប្រឈមមុខនឹងការបាត់បង់សមាជិកភាពជាអ្នកតំណាងរាស្ត្រទៀតផង ប្រសិនបើតុលាការធម្មនុញ្ញរកកំហុសគាត់ឃើញដូចការប្ដឹងក្នុងសំណុំរឿងពីរខាងលើនេះ។
តែសម្រាប់អ្នកគាំទ្របក្សចលនាឆ្ពោះទៅមុខ នៅពេលនេះបានចេញមុខទាមទាររកយុត្តិធម៌សម្រាប់លោក ភីថា។ ពួកគេបានថ្លែងប្រហាក់ប្រហែលគ្នាថា ពលរដ្ឋជាង ១៤លាននាក់ដែលគាំទ្រគណបក្សចលនាឆ្ពោះទៅមុខ មិនទទួលស្គាល់បទចោទទាំងឡាយប្រឆាំងនឹងលោក ភីថា នោះទេ ហើយថាវាជាគំនិតកើតចេញពីពួកព្រឹទ្ធសភាតែប៉ុណ្ណោះ។ មេដឹកនាំបាតុករជាច្រើនបានប្រកាសថា ចាប់ពីថ្ងៃនេះតទៅ គេត្រូវធ្វើបាតុកម្មរហូតរយៈពេល ១១ថ្ងៃ គឺរហូតទាល់តែតុលាការធម្មនុញ្ញផ្ដល់យុត្តិធម៌ដល់លោក ភីថា មកវិញ។
អ្នកជំនាញ និងអ្នកវិភាគព្រមានថា ទីក្រុងបាងកកចាប់ពីពេលនេះតទៅមានតែចលាចល និងវឹកវរដោយសារតែវិបត្តិនយោបាយចាប់ផ្ដើមផ្ទុះឡើង។
សម្រាប់លោក ភីថា បានប្រកាសថា លោកចង់ឃើញប្រជាជនថៃនៅពីក្រោយលោក ដើម្បីទាញអំណាចពីពួកយោធា គឺមិនឲ្យក្រុមនេះមានអំណាចនោះទេ ដែលលោកថាព្រឹទ្ធសភាមិនតំណាងឲ្យឆន្ទៈរបស់ប្រជាជន គឺមិនត្រូវមានសិទ្ធិចូលទៅអង្គុយនៅក្នុងរដ្ឋសភាធ្វើសេចក្ដីសម្រេចចិត្តជំនួសប្រជាជននោះទេ។
បើតាមបេក្ខជនដែលបរាជ័យមិនអាចឡើងធ្វើនាយករដ្ឋមន្ត្រីថៃរូបនេះ បានថ្លែងថា ត្រូវតែកាត់បន្ថយអំណាចរបស់ពួកយោធា ហើយត្រូវតែទប់ស្កាត់ពួកយោធាមិនឲ្យមានអំណាចនៅក្នុងស្ថាប័ននីតិប្បញ្ញត្តិ និងនីតិប្រតិបត្តិនោះឡើយ។
សម្រាប់លោក ភីថា ជាអ្នកនយោបាយវ័យក្មេងដ៏មានប្រជាប្រិយភាពនេះ បានប្រកាសថា លោកសម្រេចឲ្យគណបក្សភឿថៃ ដែលជាបក្សសម្ព័ន្ធភាពជាមួយនឹងលោកត្រួសត្រាយផ្លូវបញ្ជូនបេក្ខជនម្នាក់ទៅសភា ដើម្បីសុំការទុកចិត្តឡើងធ្វើជានាយករដ្ឋមន្ត្រីជំនួសរូបលោកដែលលោកទទួលស្គាល់ពីបរាជ័យរបស់លោក។
នៅថ្ងៃទី២៧ កក្កដា នេះ សភាទាំងពីរថ្នាក់នឹងប្រជុំគ្នាដើម្បីជ្រើសតាំងនាយករដ្ឋមន្ត្រីម្នាក់ឲ្យបង្កើតគណៈរដ្ឋមន្ដ្រីថ្មី ដែលគេរំពឹងថាបេក្ខជនពីររូបមកពីគណបក្សភឿថៃ គឺលោក Srettha Thavisin និងអ្នកស្រី ផែថោងថាន ស៊ីណាវ៉ាត់ កូនស្រីរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ជាបេក្ខជននាយករដ្ឋមន្ត្រី។
ឥឡូវនេះ គណបក្សភឿថៃ កំពុងតែសម្របសម្រួលជាមួយនឹងគណបក្សផ្សេងៗទៀតក្រៅពីសម្ព័ន្ធភាព ៨គណបក្ស ធ្វើយ៉ាងណាឲ្យសំឡេងគាំទ្រនាយករដ្ឋមន្ត្រីអាចមានសំឡេងគ្រប់គ្រាន់ ៣៧៦សំឡេងឡើងកាន់តំណែងនាយករដ្ឋមន្ត្រីទី៣០ របស់រាជាណាចក្រនេះ។
បើតាមដំណឹងមកថា បក្សភឿថៃ កំពុងតែសម្របសម្រួលជាមួយសមាជិកព្រឹទ្ធសភាផងដែរ៕