 ដែលប្រកាសមិនចាត់វិធានការទៅលើសកម្មជនគណបក្សប្រជាជនកម្ពុជាលោក ខាន់ ចាន់សុផល ទោះបីបុគ្គលរូបនេះបានបំភ័យ និងបង្ខំពលរដ្ឋឲ្យទៅបោះឆ្នោតក៏ដោយ។){kind=link}
អ្នកប្រើប្រាស់បណ្ដាញសង្គមបានចេញប្រតិកម្មរិះគន់លើគណៈកម្មាធិការជាតិរៀបចំការបោះឆ្នោត (គ.ជ.ប) ដែលប្រកាសមិនចាត់វិធានការទៅលើសកម្មជនគណបក្សប្រជាជនកម្ពុជាលោក ខាន់ ចាន់សុផល ទោះបីបុគ្គលរូបនេះបានបំភ័យ និងបង្ខំពលរដ្ឋឲ្យទៅបោះឆ្នោតក៏ដោយ។
បើតាមហ្វេសប៊ុកឈ្មោះ Sovan Ran បានសរសេររិះគន់ថា អ្នកគាំទ្រគណបក្សប្រជាជនកម្ពុជាធ្វើខុស ហើយសុំទោសវិញ ពួកគេរួចពីសំណាញ់ច្បាប់ ប៉ុន្តែបើអ្នកមិនគាំទ្រគណបក្សប្រជាជនកម្ពុជាវិញ ពួកគេជៀសមិនផុតពីការជាប់គុក និងការពិន័យជាប្រាក់នោះទេ។
សកម្មជនការពារសិទ្ធិមនុស្ស លោក សាន់ ម៉ាឡា បង្ហាញការហួសចិត្តក្រោយពីគណៈកម្មាធិការរៀបចំការបោះឆ្នោតឆ្លើយតបថា ឝ.ជ.ប មិនចាត់វិធានការច្បាប់លើលោក ខាន់ ចាន់សុផល បានលុបវីដេអូចោល និងសុំទោសជាសាធារណៈរួចហើយ។ លោកចាត់ទុកការអនុវត្តច្បាប់របស់ គ.ជ.ប ថាមានស្តង់ដារពីរ។
ចំណែកសកម្មជនគណបក្សប្រជាធិបតេយ្យមូលដ្ឋាន លោក អាន វិចិត្រ បានសរសេរលើហ្វេសប៊ុកដែរថា ទោះបីច្បាប់គឺជាច្បាប់ក៏ដោយ ប៉ុន្តែលោកថាច្បាប់នេះមិនបានអនុវត្តទៅលើបក្សពួកក្រុមខ្លួនវិញនោះទេ ខណៈអ្នកប្រើប្រាស់បណ្ដាញសង្គមផ្សេងៗទៀតក៏បានបញ្ចេញប្រតិកម្មស្រដៀងគ្នាដែរ ដោយចាត់ទុកការអនុវត្តច្បាប់របស់គណៈកម្មាធិការជាតិរៀបចំការបោះឆ្នោតមិនឯករាជ្យ ស្ថិតក្រោមឥទ្ធិពលគណបក្សប្រជាជនកម្ពុជា។
ការចេញរិះគន់របស់ប្រជាពលរដ្ឋ និងសកម្មជននយោបាយនេះ ក្រោយពីគណៈកម្មការរៀបចំការបោះឆ្នោតរាជធានីភ្នំពេញក្រោមបញ្ជារបស់លោក ហ៊ុន សែន បានលុបឈ្មោះថ្នាក់ដឹកនាំ និងសកម្មជនគណបក្សប្រឆាំង រួមទាំងអ្នកវិភាគសរុបជាង ៣០អង្គ/នាក់ចេញពីបញ្ជីបោះឆ្នោតរយៈពេលចន្លោះពី ២០ឆ្នាំ ២៥ឆ្នាំ និងពិន័យម្នាក់ ១០លានរៀលក្រោមការចោទប្រកាន់ថាញុះញង់បំផ្លាញសន្លឹកឆ្នោតចោល។
ចំណែកសកម្មជននយោបាយរបស់បក្សកាន់អំណាចលោក ខាន់ ចាន់សុផល ដែលបានចេញវីដេអូមួយកាលពីថ្ងៃទី២០ ខែកក្កដា នេះ ដោយព្រមានថា គណៈកម្មាធិការជាតិរៀបចំការបោះឆ្នោត (គ.ជ.ប) នឹងធ្វើកោសល្យវិច័យស្នាមក្រយៅដៃលើសន្លឹកឆ្នោតដែលត្រូវបានគូសខ្វែងចោល និងស្រង់ឈ្មោះប្រជាពលរដ្ឋ មន្ត្រីរាជការ និងកម្មករនិយោជិតបញ្ជូនទៅឱ្យអង្គភាពរបស់ពួកគេដើម្បីដាក់ពិន័យ។
សកម្មជននយោបាយរបស់បក្សកាន់អំណាចរូបនេះបញ្ជាក់ថា អ្នកដែលគូសខ្វែងសន្លឹកឆ្នោត និងអ្នកដែលមិនទៅបោះឆ្នោត នឹងមានបញ្ហាកាន់តែធ្ងន់ធ្ងរទៀតទៅថ្ងៃមុខ ដោយសារតែរដ្ឋាភិបាលដឹកនាំដោយគ្រួសារលោក ហ៊ុន សែន នឹងធ្វើការផាកពិន័យ និងចាត់វិធានការច្បាប់ដោយដាក់ទណ្ឌកម្មនានាទៅលើអ្នកដែលមិនទៅបោះឆ្នោតទាំងនោះ។
ទណ្ឌកម្មដែលលោក ខាន់ ចាន់សុផល និយាយបំភ័យប្រជាពលរដ្ឋដើម្បីបង្ខំឲ្យទៅបោះឆ្នោតនោះ ដូចជាការធ្វើប្លង់ដីសម្គាល់ម្ចាស់កម្មសិទ្ធិ ឬពាក់ព័ន្ធនឹងការធ្វើដំណើរទៅបរទេស ជាដើម។
ទោះបីជាសកម្មជនគណបក្សប្រជាជនកម្ពុជា លោក ខាន់ ចាន់សុផល លើកឡើងដូច្នេះក៏ដោយ ប៉ុន្តែគណៈកម្មាធិការជាតិរៀបចំការបោះឆ្នោតកាលពីថ្ងៃទី២៤ ខែកក្កដា នេះបានប្រកាសមិនចាត់វិធានការច្បាប់ទៅលើលោក ខាន់ ចាន់សុផល ក្រោមលេសថា លោក ខាន់ ចាន់សុផល បានសុំទោសជាសាធារណៈ និងដកពាក្យពេចន៍ដែលបាននិយាយលើហ្វេសប៊ុកចេញវិញ។
បើតាមកម្មករ និងប្រជាពលរដ្ឋដែលទៅបោះឆ្នោត បានលើកឡើងប្រហាក់ប្រហែលគ្នាថា ពួកគេទៅបោះឆ្នោតកាលពីថ្ងៃទី២៣ ខែកក្កដា ឆ្នាំ២០២៣ ទាំងបង្ខំ ដោយបារម្ភខ្លាចអាជ្ញាធរមូលដ្ឋានធ្វើទុក្ខបុកម្នេញលើគ្រួសារ និងពួកគេ ខណៈអាជ្ញាធរភូមិឃុំ បាននាំដើរស្រង់ឈ្មោះ និងឃ្លាំមើលពលរដ្ឋណាខ្លះទៅបោះឆ្នោត។ ចំណែកអ្នកខ្លះបង្ខំចិត្តទៅបោះឆ្នោត ទោះបីជាមិនមានគណបក្សនយោបាយដែលពួកគេពេញចិត្ត។
អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល លោក កន សាវាង្ស បានប្រាប់សារព័ត៌មានថា ការបោះឆ្នោតជ្រើសតាំងតំណាងរាស្ត្រកាលពីថ្ងៃអាទិត្យ ទី២៣ ខែកក្កដា អង្គការខុមហ្វ្រែលបានរកឃើញថា ភាពមិនប្រក្រតីមួយចំនួន ក្នុងនោះមានវត្តមានរបស់អាជ្ញាធរ និងភ្នាក់ងារសង្កេតការណ៍នានាដែលបានកត់ឈ្មោះអ្នកទៅបោះឆ្នោត និងការមិនបិទកំណត់ហេតុលទ្ធផលបោះឆ្នោតតាមទម្រង់ ១១០២ ឱ្យបានត្រឹមត្រូវតាមគោលការណ៍ដែលបានណែនាំ ជាដើម៕