បុរសខ្លាំងដឹកនាំកម្ពុជាជិត ៤០ឆ្នាំ លោក ហ៊ុន សែន ចេញអនុក្រឹត្យថ្មីក្នុងគោលដៅគ្រប់គ្រងអត្តសញ្ញាណអតិថិជនដែលប្រើប្រព័ន្ធឌីជីថលនៅកម្ពុជា ខណៈលោក ហ៊ុន សែន ប្រកាសថាលោក ហ៊ុន ម៉ាណែត នឹងធ្វើជានាយករដ្ឋមន្ត្រីនៅថ្ងៃទី២២ ខែសីហា ខាងមុខនេះ។
ក្នុងអនុក្រឹត្យស្ដីពីការគ្រប់គ្រងអត្តសញ្ញាណអតិថិជនឌីជីថលកម្ពុជា ចេញនាថ្ងៃទី២៦ ខែកក្កដា ឆ្នាំ២០២៣ ដែលចុះហត្ថលេខាដោយលោក ហ៊ុន សែន ឲ្យដឹងថា អនុក្រឹត្យនេះមានវិសាលភាពអនុវត្តទៅក្រសួង ស្ថាប័ន អង្គភាពសាធារណៈប្រហាក់ប្រហែល រដ្ឋបាលថ្នាក់ក្រោមជាតិ សហគ្រាសសាធារណៈ គ្រឹះស្ថានសាធារណៈរដ្ឋបាល នីតិបុគ្គលទទួលផលប្រយោជន៍ពីហិរញ្ញវត្ថុសាធារណៈ ក្រុមហ៊ុនឬសហគ្រាស និងសមាគមដែលត្រូវបានបង្កើតស្របតាមច្បាប់ និងលិខិតបទដ្ឋានគតិយុត្តិផ្សេងទៀតជាធរមាននៅកម្ពុជា។
ក្រៅពីស្ថាប័នរាប់រៀបខាងលើ អនុក្រឹត្យនេះក៏មានវិសាលភាពអនុវត្តចំពោះបុគ្គលមានសញ្ជាតិខ្មែរ និងរូបវន្តបុគ្គលមានសញ្ជាតិបរទេសដែលប្រើប្រាស់សេវា និងទិន្នន័យនៃអត្តសញ្ញាណអតិថិជនឌីជីថលកម្ពុជា លើកលែងតែការប្រើប្រាស់សេវា និងទិន្នន័យក្នុងវិស័យការពារជាតិ សន្តិសុខជាតិ និងសណ្ដាប់ធ្នាប់សាធារណៈ។
បើតាមខ្លឹមសារមាត្រា ៤ នៃអនុក្រឹត្យនេះ ក៏បានតម្រូវឲ្យអតិថិជនដែលប្រើប្រាស់ប្រព័ន្ធឌីជីថលនៅកម្ពុជាទាំងអស់ ត្រូវសហការជាមួយនឹងក្រសួងស្ថាប័នមានសមត្ថកិច្ចពាក់ព័ន្ធ។ ក្រៅពីសហការហើយ សមត្ថកិច្ចត្រូវរៀបចំរបាយការណ៍វឌ្ឍនភាពការងារ និងសមិទ្ធផល បញ្ហាប្រឈម និងការស្នើឡើងនូវវិធានការដោះស្រាយជូនរដ្ឋាភិបាល – បំពេញភារកិច្ចផ្សេងទៀតតាមការប្រគល់ជូនពីរដ្ឋាភិបាល។
ចំណែកមាត្រា ២៥ នៅក្នុងជំពូកទី៥ នៃអនុក្រឹត្យនេះ ក៏បាននិយាយអំពីការការពារសន្តិសុខតាមបច្ចេកវិទ្យាព័ត៌មាន និងសុវត្ថិភាពទិន្នន័យ អត្តសញ្ញាណអតិថិជនឌីជីថលនៃ អ.ឌ.ក. ដោយសមត្ថកិច្ចផងដែរ។
មាត្រានេះក៏បានលើកពីការវាយប្រហារតាមបច្ចេកវិទ្យាព័ត៌មាន និងសុវត្ថិភាពទិន្នន័យ អត្តសញ្ញាណអតិថិជនឌីជីថល ដែលតម្រូវឱ្យមានវិធានការការពារសន្តិសុខតាមបច្ចេកវិទ្យាព័ត៌មាន និងសុវត្ថិភាពទិន្នន័យ អត្តសញ្ញាណអតិថិជនឌីជីថលដូចជា៖
- ការប្រមូល ការថតចម្លង ការកែប្រែ ការប្រើប្រាស់ ការបង្ហាញ ការបញ្ជូន ការផ្សព្វផ្សាយ និង/ឬការធ្វើឱ្យបែកធ្លាយទិន្នន័យអត្តសញ្ញាណអតិថិជនឌីជីថលនៃ អ.ឌ.ក. ដោយគ្មានការអនុញ្ញាត – ការលួចយក ការបំផ្លាញ ការលុប ការធ្វើឱ្យបាត់បង់ ឬការធ្វើឱ្យខូចខាតទិន្នន័យអត្តសញ្ញាណអតិថិជនឌីជីថលនៃ អ.ឌ.ក. ដោយចៃដន្យ ឬដោយចេតនា
- ការក្លែងបន្លំ ឬការប៉ុនប៉ងក្លែងបន្លំទិន្នន័យអត្តសញ្ញាណបុគ្គលដទៃដោយផ្តល់ទិន្នន័យមិនពិត
- ការបញ្ចូលមេរោគ ការផ្ញើសារគំរាមកំហែង ការចាប់ជំរិត និង/ឬការធ្វើឱ្យប៉ះពាល់ដល់សន្តិសុខសេដ្ឋកិច្ច និងសង្គមឌីជីថល
- ការសមគំនិត ឬការផ្តល់មធ្យោបាយ ឬការផ្ដល់វិធីសាស្ត្រក្នុងការវាយប្រហារប្រព័ន្ធប្រតិបត្តិការ អ.ឌ.ក. ប្រព័ន្ធបច្ចេកវិទ្យាព័ត៌មានរបស់សមាជិកភាពដោយស្វ័យប្រវត្តិ និងសមាជិកភាពដោយការស្នើសុំ ដែលស្នើសុំធ្វើយថាភូតកម្ម និងប្រើប្រាស់ទិន្នន័យអត្តសញ្ញាណអតិថិជនឌីជីថលនៃ អ.ឌ.ក. និងទិន្នន័យអត្តសញ្ញាណអតិថិជនឌីជីថល
- ការវាយប្រហារផ្សេងៗទៀតដែលបង្កហានិភ័យដល់សន្តិសុខប្រព័ន្ធអន្តរប្រតិបត្តិការ និងសុវត្ថិភាពទិន្នន័យអត្តសញ្ញាណអតិថិជនឌីជីថលតាមរយៈ អ.ឌ.ក.។
ប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ ចាត់ទុកការចេញអនុក្រឹត្យនេះឆ្លុះបញ្ចាំងឲ្យឃើញថា លោក ហ៊ុន ម៉ាណែត ដែលត្រៀមឡើងដឹកនាំប្រទេសតាមក្បួន ប៉ុល ពត សុទ្ធសាធ ដោយសារសម័យ ប៉ុល ពត គ្រប់គ្រងមនុស្សដោយវិធីបែងចែកជាសហករណ៍ ក្មេងដោយក្មេង ចាស់ដោយចាស់ ប្រុសដោយប្រុស ស្រីដោយស្រី ហើយដើរឈ្លបយកការណ៍តាមផ្ទះ។
តែនៅសម័យលោក ហ៊ុន ម៉ាណែត វិញ លោក គឹម សុខ ថារដ្ឋាភិបាលចាប់ផ្ដើមកំណត់អត្តសញ្ញាណប្រជាពលរដ្ឋជាក្រុម ឬសមាគម ដើម្បីពួកអ្នកកាន់អំណាចងាយបិទសិទ្ធិ និងគំរាមកំហែង ដោយចាត់ជាក្រុមបក្ខពួកតាំងពីកសិករ កម្មករ បុគ្គលិកក្រុមហ៊ុនឯកជន មន្ត្រីរាជការ គ្រូបង្រៀន កងកម្លាំងប្រដាប់អាវុធ អ្នករៀនក្នុងស្រុក អ្នករៀនក្រៅស្រុក អ្នករត់តាក់ស៊ី អ្នករត់កង់បី អ្នករត់ម៉ូតូឌុប អាជីវករតូចធំ អ្នកកាសែត រហូតដល់ព្រះសង្ឃ អតីតអ្នកបួស អ្នកលក់លៀស ពួកជើងកាងដៃដល់ ជាដើម។
ជាមួយគ្នានេះ លោកថាក្រុមរបស់លោក ហ៊ុន ម៉ាណែត ក៏ចាត់តាំងជាមេក្រុមតាមសណ្ឋាននីមួយៗ ដើម្បីឲ្យតាមដាន និងគំរាមកំហែង។ ករណីនេះវាបានបង្ហាញឲ្យឃើញជាក់ស្ដែងណាស់ថា ការកំណត់អត្តសញ្ញាណអតិថិជនឌីជីថលកម្ពុជានៅពេលនេះ គឺស្ថិតក្នុងផែនការត្រួតត្រា និងគំរាមកំហែងតាមផ្លូវនយោបាយ។
លោក គឹម សុខ យល់ថា មូលហេតុដែលលោក ហ៊ុន សែន និងលោក ហ៊ុន ម៉ាណែត រៀបចំ និងធ្វើដូច្នេះ ដោយសារតែលោកបានដឹងថា អំណាចរបស់គ្រួសារហ៊ុនបានពីឧក្រិដ្ឋកម្មនយោបាយ ក្បត់ឆន្ទៈពលរដ្ឋ ទៅជាប្រឈមនឹងប្រតិកម្មថ្កោលទោសពីប្រជាពលរដ្ឋ ហើយបណ្ដាញសង្គម និងប្រព័ន្ធឌីជីថល គឺជាអាវុធបញ្ចេញមតិ និងការផ្សព្វផ្សាយទូលំទូលាយរបស់ប្រជាពលរដ្ឋ។
ដូច្នេះហើយ លោក គឹម សុខ ថា ទើបក្រុមគ្រួសារត្រកូលហ៊ុនខំប្រឹងកំណត់អត្តសញ្ញាណពលរដ្ឋតាមប្រព័ន្ធឌីជីថលបែបនេះវិញនោះ ដែលវាជាការបង្ហាញឲ្យឃើញថាគ្រួសារត្រកូលហ៊ុនខ្លាចយុវជនដែលមានសមត្ថភាពប្រើប្រព័ន្ធឌីជីថល ដើម្បីលើកទឹកចិត្តគ្នាទៅវិញទៅមកក្នុងគោលបំណងតស៊ូប្ដូរអំណាចផ្ដាច់ការដែលដឹកនាំគ្រួសារលោក ហ៊ុន សែន ចេញ។
បើតាមអនុក្រឹត្យថ្មីស្ដីពីការគ្រប់គ្រងអត្តសញ្ញាណអតិថិជនឌីជីថលកម្ពុជានេះ មានទាំងអស់ចំនួន ៧ជំពូក និង ៣៦មាត្រា ដោយតម្រូវឲ្យក្រសួងស្ថាប័នពាក់ព័ន្ធទាំងអស់ត្រូវអនុវត្តតាមភារកិច្ចរបស់ខ្លួនចាប់ពីថ្ងៃទី២៦ ខែកក្កដា ឆ្នាំ២០២៣ តទៅ៕