មន្ត្រីជាន់ខ្ពស់បក្សប្រឆាំង លើកឡើងថា ការជំទាស់សុំនៅក្រៅឃុំលើសំណុំរឿងរបស់អនុប្រធានគណបក្សភ្លើងទៀនលោក ថាច់ សេដ្ឋា គឺស្ថិតក្នុងរបៀបវារៈនយោបាយ ជាជាងការស្វែងរកយុត្តិធម៌ ព្រោះថាអ្នកដែលចុះចូលជាមួយនឹងបក្សកាន់អំណាចតែងទទួលបានការលើកលែងទោស។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិលោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៤ សីហា នេះថា ការអនុវត្តច្បាប់ដោយយុត្តិធម៌ ទាល់តែដាក់ពិន័យដូចគ្នាទៅលើអ្នកដែលខ្លួនបានចោទថាប្រព្រឹត្តខុស នោះទើបជាការអនុវត្តច្បាប់ដោយត្រឹមត្រូវ ប៉ុន្តែការអនុវត្តច្បាប់ដែលមានស្តង់ដារពីរ ដោយការលើកលែងទោសអ្នកដែលចុះចូលជាមួយបក្សកាន់អំណាច និងបន្តគាបសង្កត់លើអ្នកដែលមិនចុះចូលដូចដែលបានកើតមានកន្លងមកនោះ មិនមែនជាការអនុវត្តច្បាប់ឡើយ ប៉ុន្តែគឺជារបៀបអនុវត្តនៃសេណារីយ៉ូនយោបាយប៉ុណ្ណោះ។
លោក មាជ សុវណ្ណារ៉ា លើកឡើងថា កន្លងមកអ្នកដែលបានចុះចូលជាមួយបក្សកាន់អំណាចខ្លះ ត្រូវបានតែងតាំងជាឯកឧត្តមព្រោងព្រាត ទាំងដែលអ្នកខ្លះមិនទាន់ត្រូវបានព្រះមហាក្សត្រចេញព្រះរាជក្រឹត្យលើកលែងទោសផងនោះ ដែលទង្វើបែបនេះបង្ហាញឱ្យឃើញពីការអនុវត្តច្បាប់ដោយស្ថិតក្នុងលក្ខខណ្ឌនយោបាយ និងស្តង់ដារពីរ ដែលជាមូលហេតុធ្វើឱ្យប្រជាពលរដ្ឋអស់ជំនឿលើប្រព័ន្ធយុត្តិធម៌របស់កម្ពុជាទៅថ្ងៃមុខ។
មន្ត្រីជាន់ខ្ពស់គណបក្សសង្គ្រោះជាតិរូបនេះបញ្ជាក់ថា យោងទៅលើស្ថានភាពជាក់ស្តែងដែលបង្ហាញលើរូបរាងកាយលោក ថាច់ សេដ្ឋា ពិតជាមានជំងឺប្រចាំកាយដែលតម្រូវឱ្យគាត់ត្រូវតែទទួលការព្យាបាលពីវេជ្ជបណ្ឌិតជំនាញពិតមែន។ ជាងនេះទៀត សំណុំរឿងរបស់គាត់ ចៅក្រមស៊ើបសួរបានបញ្ចប់ការស៊ើបសួរអស់ហើយ ដូច្នេះនីតិវិធីក្នុងរឿងក្ដីនេះ គឺនៅសល់តែសវនាការវិនិច្ឆ័យសេចក្តីតែប៉ុណ្ណោះ ដែលមិនចាំបាច់ត្រូវតែឃុំខ្លួនគាត់ក្នុងពន្ធនាគារបន្តទៀតនោះទេ។
កាលពីថ្ងៃទី៣ ខែកក្កដា ឆ្នាំ២០២៣ សាលាដំបូងរាជធានីភ្នំពេញបានបើកសវនាការលើសំណុំរឿងលោក ថាច់ សេដ្ឋា អនុប្រធានគណបក្សភ្លើងទៀនបន្ទាប់ពីមេធាវីការពារក្តីរបស់លោកបានដាក់ពាក្យស្នើសុំទៅតុលាការ សុំឱ្យលោកបាននៅក្រៅឃុំបណ្ដោះអាសន្នដើម្បីព្យាបាលជំងឺ ប៉ុន្តែត្រូវតុលាការបដិសេធសំណើនេះទាំងស្រុង ក្រោមហេតុផលថា ពន្ធនាគារមានថ្នាំ និងគ្រូពេទ្យគ្រប់គ្រាន់ហើយសម្រាប់ព្យាបាលអ្នកជំងឺដែលជាប់ឃុំ។ ជាងនេះទៀត លោក ថាច់ សេដ្ឋា ក៏អាចយកគ្រូពេទ្យពីខាងក្រៅចូលមកពិនិត្យក្នុងពន្ធនាគារបានដែរ។
កាលពីថ្ងៃទី២៧ ខែកក្កដា ឆ្នាំ២០២៣ មេធាវីការពារក្តីឱ្យលោក ថាច់ សេដ្ឋា គឺលោក ជូង ជូងី បានដាក់ពាក្យស្នើសុំឱ្យសាលាដំបូងរាជធានីភ្នំពេញដោះលែងអនុប្រធានគណបក្សភ្លើងទៀនលោក ថាច់ សេដ្ឋា ពីមន្ទីរឃុំឃាំង ព្រោះថានៅពេលនេះ លោកមានបញ្ហាសុខភាពធ្ងន់ធ្ងរច្រើនប្រភេទ ដូចជាខ្លាញ់រុំបេះដូង លើសឈាម ឡើងជាតិស្ករ ឡើងជាតិអាស៊ីត ដែលត្រូវការការព្យាបាលពីវេជ្ជបណ្ឌិតជាប្រចាំ។
លោក ជូង ជូងី លើកឡើងថា ចាប់តាំងពីលោក ថាច់ សេដ្ឋា ត្រូវបានចាប់ឃុំខ្លួនមក ចៅក្រមស៊ើបសួរបានបញ្ចប់ការស៊ើបសួរអស់ហើយ ដូច្នេះនីតិវិធីក្នុងរឿងក្ដីនេះ គឺនៅសល់តែសវនាការវិនិច្ឆ័យសេចក្តីតែប៉ុណ្ណោះ ដូចនេះមិនមានភាពចាំបាច់ត្រូវរក្សាលោក ថាច់ សេដ្ឋា ទុកជូនតុលាការចាត់ការតាមនីតិវិធីទៀតទេ។
លោក ថាច់ សេដ្ឋា ត្រូវសមត្ថកិច្ចចាប់ខ្លួនកាលពីថ្ងៃទី១៦ ខែមករា ឆ្នាំ២០២៣ កន្លងទៅ បន្ទាប់ពីលោកត្រូវបានចោទប្រកាន់ពីបទ ចេញសែកស្អុយ និងបទល្មើសចំនួនពីរទៀត គឺបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើងបន្ថែមពីលើសំណុំរឿងចាស់។
គិតមកទល់នឹងថ្ងៃទី៨ ខែសីហា ឆ្នាំ២០២៣ នេះ លោក ថាច់ សេដ្ឋា ត្រូវបានឃុំនៅពន្ធនាគារព្រៃស (ម១) អស់រយៈពេល ២០៤ថ្ងៃ ឬជាង ៦ខែហើយ ប៉ុន្តែប្រសិនបើតុលាការសម្រេចផ្ដន្ទាទោសលោកលើសំណុំរឿងថ្មីទាំងពីរខាងលើទៀត នោះអនុប្រធានគណបក្សភ្លើងទៀនរូបនេះនឹងត្រូវប្រឈមមុខជាប់ពន្ធនាគារពី ០៦ខែទៅ ២ឆ្នាំឯណោះ។
កាលពីចុងឆ្នាំ២០២២ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា បានលើកឡើងនៅក្នុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៩ នៅទីក្រុងហ្សឺណែវ ថា ទិដ្ឋភាពសិទ្ធិមនុស្សនៅក្នុងប្រទេសកម្ពុជានៅតែបង្កការព្រួយបារម្ភធ្ងន់ធ្ងរ ព្រោះថាសកម្មជន សមាជិក និងមន្ត្រីជាន់ខ្ពស់បក្សនយោបាយនានា រួមទាំងសកម្មជនបរិស្ថាន និងសកម្មជនសិទ្ធិមនុស្ស ជាដើម កំពុងរងនូវការគាបសង្កត់លើសិទ្ធិសេរីភាពពីសំណាក់រដ្ឋាភិបាលឯកបក្សសព្វថ្ងៃនេះជាបន្តបន្ទាប់៕