មន្ត្រីជាន់ខ្ពស់បក្សប្រឆាំង លើកឡើងថា រដ្ឋាភិបាលថៃ និងមេដឹកនាំថៃ មិនបានគំរាមប្រើគ្រាប់ BM-២១ បាញ់លើអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា និងអ្នកស្រី យីងឡាក់ ស៊ីណាវ៉ាត្រា នោះទេ បន្ទាប់ពីអតីតនាយករដ្ឋមន្ត្រីទាំងពីរនាក់បងប្អូននេះមានវត្តមាននៅលើទឹកដីកម្ពុជា ដែលផ្ទុយពីលោក ហ៊ុន សែន បានគំរាមប្រើគ្រាប់ BM-២១ បាញ់លោក សម រង្ស៊ី បើអតីតមេដឹកនាំបក្សប្រឆាំងរូបនេះប្រើប្រាស់ទឹកដីថៃជាឈ្នាន់ដើម្បីឈានជើងចូលទឹកដីខ្មែរវិញ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន សរសេរលើទំព័រហ្វេសប៊ុករបស់ខ្លួនកាលពីថ្ងៃទី៦ សីហា ថា មេដឹកនាំបក្សកាន់អំណាចលោក ហ៊ុន សែន មិនត្រូវគំរាមអតីតមេដឹកនាំបក្សប្រឆាំងលោក សម រង្ស៊ី ទៀតទេនៅពេលដែលលោក សម រង្ស៊ី ប្រកាសចូលទឹកដីថៃនៅថ្ងៃក្រោយ បន្ទាប់ពីលោក ហ៊ុន សែន អនុញ្ញាតឱ្យអតីតនាយករដ្ឋមន្ត្រីថៃដែលកំពុងស្ពាយទោសជាប់ខ្លួនតាមផ្លូវតុលាការរបស់ថៃ លោក ថាក់ស៊ីន ស៊ីណាវ៉ាត្រា និងអ្នកស្រី យីងឡាក់ ស៊ីណាវ៉ាត្រា ចូលប្រទេសកម្ពុជានៅពេលនេះ។
លោក អ៊ុំ សំអាន លើកឡើងថា នៅពេលដែលមេដឹកនាំខ្មែរអនុញ្ញាតឱ្យអតីតនាយករដ្ឋមន្ត្រីថៃ ដែលកំពុងស្ពាយទោសជាប់ខ្លួន លោក ថាក់ស៊ីន ស៊ីណាវ៉ាត្រា និងអ្នកស្រី យីងឡាក់ ស៊ីណាវ៉ាត្រា ចូលប្រទេសកម្ពុជាបាន អតីតមេដឹកនាំបក្សប្រឆាំងលោក សម រង្ស៊ី ក៏អាចចូលទឹកដីថៃបានដូចគ្នាដែរ។
កាលពីថ្ងៃទី៦ ខែសីហា ឆ្នាំ២០២៣ លោក ហ៊ុន សែន បង្ហាញវត្តមានអតីតនាយករដ្ឋមន្ត្រីថៃដែលកំពុងស្ពាយទោសជាប់ខ្លួនតាមផ្លូវតុលាការរបស់ថៃ លោក ថាក់ស៊ីន ស៊ីណាវ៉ាត្រា និងអ្នកស្រី យីងឡាក់ ស៊ីណាវ៉ាត្រា ក្នុងពិធីខួបកំណើតរបស់លោកតាមបណ្ដាញសង្គម Tik Tok ផ្ទាល់ខ្លួន ប៉ុន្តែលោក ហ៊ុន សែន មិនបានលើកឡើងពីខ្លឹមសារណាមួយចំពោះវត្តមានរបស់លោក ថាក់ស៊ីន ស៊ីណាវ៉ាត្រា និងអ្នកស្រី យីងឡាក់ ស៊ីណាវ៉ាត្រា នោះទេ។
ទាក់ទិននឹងបញ្ហានេះ គេនៅមិនទាន់ឃើញប្រតិកម្ម ឬការព្រមានណាមួយពីនាយករដ្ឋមន្ត្រីថៃ ឬរដ្ឋាភិបាលថៃ ទៅលើលោក ថាក់ស៊ីន ស៊ីណាវ៉ាត្រា និងអ្នកស្រី យីងឡាក់ ស៊ីណាវ៉ាត្រា ឬការព្រមានណាមួយទៅលើលោក ហ៊ុន សែន ឬរដ្ឋាភិបាលកម្ពុជានៅឡើយទេចំពោះវត្តមានរបស់អតីតនាយករដ្ឋមន្ត្រីថៃ ដែលបានចូលទៅក្នុងទឹកដីកម្ពុជានៅពេលនេះ។
ទាក់ទិននឹងបញ្ហានេះ កាលពីថ្ងៃទី៣១ ខែឧសភា ឆ្នាំ២០២៣ បុរសខ្លាំងក្រាញអំណាចតពូជនៅកម្ពុជា លោក ហ៊ុន សែន ធ្លាប់បានគំរាមបាញ់លោក សម រង្ស៊ី ដោយគ្រាប់ BM-21 បើសិនជាលោក សម រង្ស៊ី ហ៊ានប្រើប្រាស់ទឹកដីថៃជាឈ្នាន់ដើម្បីឈានជើងចូលទឹកដីខ្មែរវិញ។ ជាងនេះទៀត លោក ហ៊ុន សែន លើកឡើងក្នុងពិធីបើកការដ្ឋានមួយកាលពីថ្ងៃទី៧ ខែមិថុនា ឆ្នាំ២០២៣ ថា លោក សម រង្ស៊ី នឹងប្រើលិខិតឆ្លងដែនជនជាតិបារាំងចូលទៅទឹកដីវៀតណាមក្នុងនាមជាភ្ញៀវទេសចរ។
លោក ហ៊ុន សែន គំរាមថា រដ្ឋាភិបាលវៀតណាមនឹងមានបញ្ហាការទូតជាមួយរដ្ឋាភិបាលកម្ពុជា ប្រសិនបើវៀតណាមមិនចាប់បញ្ជូនខ្លួនលោក សម រង្ស៊ី ឱ្យរដ្ឋាភិបាលកម្ពុជានៅពេលដែលអតីតមេដឹកនាំបក្សប្រឆាំងរូបនោះចូលទៅដល់ទឹកដីរបស់ខ្លួនទេនោះ ប៉ុន្តែសារគំរាមនេះត្រូវលោក ហ៊ុន សែន លុបចោលវិញ បន្ទាប់ពីបង្ហោះលើបណ្ដាញសង្គមហ្វេសប៊ុកបានត្រឹមតែរយៈពេលប្រមាណជា ៧ម៉ោងប៉ុណ្ណោះ។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ចសង្គម និងវប្បធម៌របស់ប្រទេសជាតិ ខណៈសេចក្តីស្នើទាំងឡាយរបស់ប្រជាពលរដ្ឋ ត្រូវបានដោះស្រាយ និងពិនិត្យយ៉ាងហ្មត់ចត់ពីអង្គការរដ្ឋ ប៉ុន្តែរដ្ឋាភិបាលក្រោមការគ្រប់គ្រងរបស់បក្សកាន់អំណាចសព្វថ្ងៃនេះ ត្រូវគេមើលឃើញថាបានអនុវត្តផ្ទុយពីមាត្រាដែលបានចែងក្នុងរដ្ឋធម្មនុញ្ញទាំងស្រុង ដោយការគាបសង្កត់សិទ្ធិមូលដ្ឋានរបស់ពលរដ្ឋយ៉ាងធ្ងន់ធ្ងរ៕