គណបក្សភឿថៃដ៏មានប្រជាប្រិយភាពបន្ទាប់ពីគណបក្សចលនាឆ្ពោះទៅមុខ បានសម្រេចជាផ្លូវការក្នុងការបង្កើតសម្ព័ន្ធភាពជាមួយនឹងគណបក្សភូមិឆាតថៃ ដែលគណបក្សនេះមានសម្ព័ន្ធភាពជាមួយនឹងពួកយោធា។
កាសែតបាងកកប៉ុស្តិ៍ និងបណ្ដាញផ្សាយព័ត៌មានអាល់ចាហ្សៀរ៉ា (al jazeera) បានចុះផ្សាយថា កិច្ចព្រមព្រៀងរបស់គណបក្សពីរនេះគឺមានគោលដៅដើម្បីឈានទៅដល់ការបង្កើតរដ្ឋាភិបាលចម្រុះមួយ ដែលមើលទៅមិនមែនមានតែបក្សភូមិឆាតថៃ និងបក្សភឿថៃ នោះទេ គឺអាចមានបក្សផ្សេងៗទៀត ហើយចង់មិនចង់ គណបក្សរបស់ពួកយោធាក៏អាចមាននៅក្នុងរដ្ឋាភិបាលចម្រុះរវាងបក្សទាំងពីរនេះដែរ។
ឥឡូវនេះ គេសង្កេតឃើញថាបក្សទាំងពីរនេះបានឈានដល់ការចុះហត្ថលេខាជាផ្លូវការជាមួយគ្នានេះក្នុងការចាប់ដៃគូគ្នាក្នុងការបង្កើតរដ្ឋាភិបាលថ្មីជំនួសរដ្ឋាភិបាលបច្ចុប្បន្ននេះ ដែលដឹកនាំដោយអតីតមេរដ្ឋប្រហារឆ្នាំ២០១៤ ឧត្តមសេនីយ៍ ប្រាយុទ្ធ ចាន់អូចា។
មេដឹកនាំគណបក្សភឿថៃ លោក ឆលណាន់ ស្រីកែវ បាននិយាយថា ការចងសម្ព័ន្ធភាពជាមួយនឹងគណបក្សភូមិឆាតថៃ គឺមានគោលដៅដើម្បីបំបែកភាពទាល់ច្រកនយោបាយ ហើយធ្វើឲ្យស្ថិរភាពនយោបាយនៅក្នុងរាជាណាចក្រថៃ មានភាពរឹងមាំឡើងវិញជាមួយនឹងការដែលរកឃើញរដ្ឋាភិបាលថ្មីត្រូវបានបង្កើតឡើង។
មេដឹកនាំបក្សភឿថៃរូបនេះបានបន្តថា បក្សភឿថៃ និងបក្សភូមិឆាតថៃ នឹងស្វែងរកការគាំទ្រពីគណបក្សផ្សេងៗទៀតដើម្បីបង្កើតរដ្ឋាភិបាលថ្មីមួយ ជាពិសេសគឺគាំទ្របេក្ខភាពនាយករដ្ឋមន្ត្រីពីគណបក្សភឿថៃ គឺលោក ស្រិថា ថាវីស៊ីន។ ជាមួយគ្នានេះ លោកបញ្ជាក់ថា បើបក្សភឿថៃ មិនមានការគាំទ្រពីបក្សផ្សេងៗទៀតទេ គឺបេក្ខជននាយករដ្ឋមន្ត្រីរបស់បក្សភឿថៃ នឹងមិនទទួលបានការគាំទ្រពេញលេញនោះទេ ហើយសង្ឃឹមថារដ្ឋាភិបាលដែលមានគណបក្សភូមិឆាតថៃ នឹងទទួលបានការគាំទ្រពីសមាជិកព្រឹទ្ធសភា។
គណបក្សភឿថៃ និងគណបក្សភូមិឆាតថៃ បើបូកបញ្ចូលគ្នាគឺមាន ២១២អាសនៈ។ គណបក្សពីរនេះត្រូវការសំឡេងយ៉ាងតិច ១៦៤អាសនៈទៀត ហើយសំឡេងភាគច្រើននោះពឹងទៅលើសមាជិកព្រឹទ្ធសភា ២៥០រូបដែលជាស្ថាប័ននីតិប្បញ្ញត្តិមួយលើកបន្តុបដោយពួកយោធាធ្វើរដ្ឋប្រហារឆ្នាំ២០១៤ និងតាមរយៈរដ្ឋធម្មនុញ្ញឆ្នាំ២០១៧ របស់ពួកយោធា។
មេដឹកនាំគណបក្សភូមិឆាតថៃ ឯណោះវិញ គឺលោក អានូទីន ឆានវីរៈគល់ បានថ្លែងថា គណបក្សរបស់លោកដែលចងសម្ព័ន្ធភាពនឹងបក្សភឿថៃ គឺដោយសារតែមើលឃើញអំពីភាពផុយស្រួយនៃការបែកបាក់សង្គមថៃ ដែលលោកថាមិនចង់ឲ្យមានរដ្ឋាភិបាលមួយតូចចង្អៀត ហើយមានរដ្ឋាភិបាលមួយដែលប៉ះពាល់អំណាចរបស់រាជានិយមនោះទេ។
លោក ឆានវីរៈគល់ បញ្ជាក់ថា បក្សរបស់លោកប្រឆាំងដាច់ខាតដល់បក្សទាំងឡាយណាដែលប៉ងទម្លាក់អំណាច និងប៉ះពាល់កិត្តិយសរបស់ព្រះមហាក្សត្រ។ លោកថា បក្សភឿថៃ ដែលមិនគាំទ្រការកាត់បន្ថយអំណាចរបស់ព្រះរាជា បានធ្វើឲ្យបក្សភូមិឆាតថៃ សម្រេចចងសម្ព័ន្ធភាពជាមួយគណបក្សនេះ។
តែយ៉ាងណា លោក វីរៈគល់ មិនបាននិយាយថា តើការសម្របសម្រួលដើម្បីធ្វើឲ្យបរិយាកាសនយោបាយមានស្ថិរភាពនេះ ដើម្បីជាការបើកផ្លូវឲ្យលោក ថាក់ស៊ីន អតីតនាយករដ្ឋមន្ត្រីថៃដែលជាប្រធានគណបក្សភឿថៃ តាមព្រឹត្តិន័យវិលចូលប្រទេសថៃវិញឬយ៉ាងណានោះទេ។
ប៉ុន្តែមេដឹកនាំគណបក្សភូមិឆាតថៃ រូបនេះត្រូវបានគេទម្លាយព័ត៌មានថា លោកបានទៅជួបលោក ថាក់ស៊ីន នៅទីក្រុងហុងកុង កាលពីសប្ដាហ៍មុននេះ ហើយទីបំផុត បក្សភឿថៃសម្រេចដើរចេញពីសម្ព័ន្ធភាពរបស់ខ្លួន ៨គណបក្សដែលគេថាសម្ព័ន្ធភាពអ្នកប្រជាធិបតេយ្យ។
អ្នកសង្កេតការណ៍មើលឃើញថា បក្សភឿថៃដែលចងសម្ព័ន្ធភាពនឹងគណបក្សមួយក្រោមឥទ្ធិពលរបស់ពួកយោធាពេលនេះ គឺភឿថៃត្រូវការមិនត្រឹមតែឲ្យខ្លួនគេជាមេដឹកនាំរដ្ឋាភិបាលចម្រុះនោះទេ គឺដើម្បីសម្របសម្រួលបរិយាកាសនយោបាយ ហើយផ្ដល់ឱកាសឲ្យមានការលើកលែងទោសពីព្រះមហាក្សត្រចំពោះលោក ថាក់ស៊ីន ទើបឈានទៅដល់ការដែលលោក ថាក់ស៊ីន អាចវិលចូលប្រទេសថៃវិញបាន។
លោក ថាក់ស៊ីន ដែលគេហៅថាមេដឹកនាំគណបក្សភឿថៃធ្លាប់ប្រកាសវិលចូលរាជាណាចក្រថៃវិញនៅថ្ងៃទី១០ ខែសីហា ក៏ប៉ុន្ដែនៅពេលដែលនយោបាយនៅរាជាណាចក្រថៃស្ថិតនៅក្នុងភាពតានតឹងដោយសារតែរករដ្ឋាភិបាលថ្មីមិនឃើញនោះ ជាពិសេសលោកត្រូវតែរង់ចាំរដ្ឋាភិបាលកើតចេញពីបក្សភឿថៃ ទើបលោកសម្រេចវិលមកប្រទេសថៃវិញ។ លោកសម្រេចលើកពេលនៃការត្រឡប់ចូលប្រទេសថៃវិញ គឺរហូតមានរដ្ឋាភិបាលថ្មី។
កាសែតបាងកកប៉ុស្តិ៍ចុះផ្សាយថា លោក ថាក់ស៊ីន កំពុងតែស្វែងរកអន្តរាគមន៍ពីបក្សទាំងឡាយណាដែលមាននិន្នាការនឹងពួកយោធា ដូចជាបក្សភូមិឆាតថៃ នេះ ដើម្បីឲ្យលោកវិលចូលប្រទេសវិញ ហើយស្ថិតនៅក្រោមរដ្ឋាភិបាលដែលបក្សភឿថៃ ជាមេដឹកនាំដែលមានកូនស្រីរបស់លោក គឺអ្នកស្រី ផៃថនថាន ស៊ីណាវ៉ាត់ ជាបេក្ខជននាយករដ្ឋមន្ត្រីរបស់គណបក្សភឿថៃ ផងដែរ ហើយអ្នកស្រី ផៃថនថាន ក៏គេរំពឹងដែរថានឹងមានតំណែងខ្ពស់បំផុតណាមួយក្នុងជួររដ្ឋាភិបាលថ្មីនេះ។
ដូច្នេះលោក ថាក់ស៊ីន វិលចូលរាជាណាចក្រថៃវិញក្រោយពីរដ្ឋាភិបាលថ្មីទូលំទូលាយមួយអាចកើតមាន ទោះបីរដ្ឋាភិបាលនោះមានបក្សរបស់ពួកយោធាក៏ដោយ៕